နှစ်နိုင်ငံပူးပေါင်းဆောင်ရွက်မှု ကဏ္ဍသစ်ဖွင့်လှစ်ရန်သဘောတူခဲ့ကြ
နိုင်ငံခြားရေးဝန်ကြီးဌာန ပြည်ထောင်စုဝန်ကြီးဦးတင်မောင်ဆွေ၏ ဖိတ်ကြားချက်အရ အင်ဒိုနီးရှားနိုင်ငံခြားရေးဝန်ကြီး မစ္စတာ ဆူဂီအိုနိုသည် ဇွန် ၈ ရက်က နေပြည်တော်သို့တရားဝင်ခရီးစဉ်အဖြစ်ရောက်ရှိလာခဲ့သည်။
ထိုသို့ ရောက်ရှိလာပြီးနောက် ပြည်ထောင်စုဝန်ကြီးဦးတင်မောင်ဆွေနှင့်တွေ့ဆုံကာ နှစ်နိုင်ငံဝန်ကြီးအဆင့်ဆွေးနွေးပွဲပြုလုပ်ပြီး ရေရှည်တည်ရှိခဲ့သည့် အစဉ်အလာချစ်ကြည်ရေးကို အခြေခံကာ သံတမန်ဆက်ဆံရေး ကဏ္ဍသစ်ဖွင့်လှစ်နိုင်ရေး၊ စီးပွားရေးပူးပေါင်းဆောင်ရွက်မှုတိုးမြှင့်ရေးနှင့် အာဆီယံအပါအဝင် နိုင်ငံတကာမျက်နှာစာတွင် အတူတကွပူးပေါင်းဆောင်ရွက်ရေးတို့ကို ဆွေးနွေးခဲ့ကြသည်။
ထို့ပြင် နှစ်နိုင်ငံကြား ရှိရင်းစွဲမိတ်ဖက်ဆက်ဆံရေးကို ပိုမိုတိုးမြှင့်ရန်ရည်ရွယ်၍ စီးပွားရေးနှင့် ပြည်သူအချင်း ချင်းကူးလူးဆက်ဆံရေးတိုးမြှင့်ရန်၊ လူသားချင်းစာနာထောက်ထားမှုအကူအညီပေးရေး၊ ကျန်းမာရေးနှင့် ပညာရေးကဏ္ဍ၊ မြန်မာနိုင်ငံ၏ လူ့စွမ်းအားအရင်းအမြစ် ဖွံ့ဖြိုးတိုးတက်ရေးအတွက် အင်ဒိုနီးရှားနိုင်ငံမှ ပညာသင်ဆုများဆက်လက်ပံ့ပိုးပေးရန်တို့ကိုလည်း ဆွေးနွေးခဲ့ကြသည်။
ထို့နောက် ပြည်ထောင်စုဝန်ကြီးဦးတင်မောင်ဆွေက မြန်မာနိုင်ငံသည် အာဆီယံ၏ တာဝန်သိအဖွဲ့ဝင်နိုင်ငံအဖြစ်ရပ်တည်နေပြီး မြန်မာနိုင်ငံ၏အခြေအနေနှင့်ကိုက်ညီသည့် မြန်မာဦးဆောင်သော မြန်မာ့ကိုယ်ပိုင်လုပ်ငန်းစဉ်ဖြင့်သာဆက်လက်ဆောင်ရွက်သွားမည်ဖြစ်ကာ မြန်မာ့နိုင်ငံရေးဖြစ်ပေါ်တိုးတက်မှုများအပေါ် နားလည်မှုအပြည့်ဖြင့် အပြုသဘောဆောင်ရပ်တည်ပေးခဲ့သည့် အင်ဒိုနီးရှားနိုင်ငံနှင့် အာဆီယံအဖွဲ့ဝင်နိုင်ငံများကို အထူးအသိမှတ်ပြုကျေးဇူးတင်သည်ဟု အသိပေးပြောကြားခဲ့သည်။
ထို့အတူ အင်ဒိုနီးရှားနိုင်ငံခြားရေးဝန်ကြီးက အာဆီယံဘုံသဘောတူညီချက်(၅)ရပ်ကို မြန်မာ့ကိုယ်ပိုင်လုပ်ငန်းစဉ်ဖြင့်အကောင်အထည်ဖော်နေမှုကို အင်ဒိုနီးရှားနိုင်ငံက အပြုသဘောအသိအမှတ်ပြုပြီး တိုင်းရင်းသားလူမျိုးစုံရှိသည့် မြန်မာ့လူ့အဖွဲ့အစည်း၏ စိန်ခေါ်မှုများကိုနားလည်ကာ မြန်မာနိုင်ငံတွင် ရွေးကောက်ပွဲမှတစ်ဆင့် အစိုးရသစ်တစ်ရပ်ထွက်ပေါ်လာခြင်းနှင့်အတူ ငြိမ်းချမ်းရေး၊ အမျိုးသားပြန်လည်သင့်မြတ်ရေးနှင့် ဒီမိုကရေစီဖော်ဆောင်ရေးကြိုးပမ်းမှုများကို အင်ဒိုနီးရှားနိုင်ငံက ကြိုဆိုထောက်ခံပြီး မြန်မာ့ငြိမ်းချမ်းရေးလုပ်ငန်းစဉ်တွင်ပါဝင်ပံ့ပိုးလိုသည်ဟု ကမ်းလှမ်းပြောဆိုခဲ့သည်။