ဗီယက်နမ်နိုင်ငံကို ထွန်းသစ်စ စီးပွားရေးနိုင်ငံများအုပ်စု BRICS ၏ မိတ်ဖက်နိုင်ငံအဖြစ် တရားဝင် အသိအမှတ်ပြုလိုက်ပြီဖြစ်ကြောင်း ဘရာဇီးအစိုးရက သောကြာနေ့တွင် ကြေညာခဲ့သည်။
“ဗီယက်နမ်အစိုးရ၏ ဆုံးဖြတ်ချက်ကို ဘရာဇီးအစိုးရက ကြိုဆိုသည်” ဟု အဖွဲ့၏ ၂၀၂၅ ခုနှစ်အတွက် ဥက္ကဌဖြစ်သည့် တောင်အမေရိကနိုင်ငံ ဘရာဇီးက ပြောကြားခဲ့သည်။
BRICS အဖွဲ့ဝင်နိုင်ငံများ၊ မိတ်ဖက်များနှင့်အတူ နိုင်ငံတကာအစီအစဉ်အတွက် ပိုမိုပါဝင် ကိုယ်စားပြုရန် ကတိကဝတ်ပြုကြောင်း ၎င်း၏ South-South ပူးပေါင်းဆောင်ရွက်မှုနှင့် စဉ်ဆက်မပြတ်ဖွံ့ဖြိုးတိုးတက်ရေးအတွက် ကြိုးပမ်းဆောင်ရွက်မှုများသည် အဖွဲ့၏ အကျိုးစီးပွားနှင့် ပေါင်းစည်းမှုကို အားဖြည့်ပေးပါကြောင်း ဗီယက်နမ်နိုင်ငံခြားရေးဝန်ကြီးဌာန၏ သတင်း ထုတ်ပြန်ချက်တွင် ဖေါ်ပြထားသည်။
ဗီယက်နမ်သည် ဘီလာရုစ်၊ ဘိုလီဗီးယား၊ ကာဇက်စတန်၊ ကျူးဘား၊ မလေးရှား၊ နိုင်ဂျီးရီးယား၊ ထိုင်း၊ ယူဂန်ဒါ၊ ဥဇဘက်ကစ္စတန်တို့နှင့်အတူ BRICS ၏ ၁၀ နိုင်ငံမြောက် မိတ်ဖက်နိုင်ငံဖြစ်လာခဲ့သည်။
၂၀၂၄ ခုနှစ် အောက်တိုဘာလက ရုရှားနိုင်ငံ ကာဇန်တွင် ကျင်းပပြုလုပ်ခဲ့သော ၁၆ ကြိမ်မြောက် BRICS ထိပ်သီးအစည်းအဝေးတွင် အဖွဲ့တိုးချဲ့ရေးမဟာဗျူဟာ တစ်စိတ်တစ်ပိုင်းအဖြစ် မိတ်ဖက်နိုင်ငံအဆင့်အတန်းကို တရားဝင်မိတ်ဆက်ခဲ့သည်။
မိတ်ဖက်နိုင်ငံအဖြစ် အသိအမှတ်ပြုခံရသဖြင့် ၎င်း၏ ကမ္ဘာလုံးဆိုင်ရာ မိတ်ဖက်များကို စုစည်းရန်နှင့် ၎င်း၏ စီပွားရေးကို ခိုင်မာအားကောင်းစေရန် ဗီယက်နမ်၏ အရေးပါသောကြိုးပမ်းချက်၏ တစ်စိတ်တစ်ပိုင်းအဖြစ် ကျယ်ပြန့်စွာ ရှုမြင်ပါသည်။ မိတ်ဖက်နိုင်ငံအနေဖြင့် ဗီယက်နမ်သည် အဖွဲ့၏ ထိပ်သီးအစည်းအဝေးများနှင့် ဆွေးနွေးပွဲများသို့ ပါဝင်တက်ရောက်ခွင့်ရမည်ဖြစ်သည်။
Ref: အေအေ