ရှေးဟောင်းဝတ္ထုပစ္စည်းများဖြစ်သည့် ပျူခေတ်ငွေဒင်္ဂါး ၃၃၃ ပြားနှင့် ကုန်းဘောင်ခေတ် ဒင်္ဂါး ၃၂၈ ပြား အပ်နှံခဲ့သူများအား ဂုဏ်ပြုမှတ်တမ်းလွှာနှင့် ဆုကြေးငွေစုစုပေါင်း ကျပ်သိန်း ၅၄၀ ကျော် ချီးမြှင့်ပေးခဲ့ကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာနမှ သိရသည်။
အဆိုပါ ဂုဏ်ပြုချီးမြှင့်ပွဲကို ဇွန် ၅ ရက်က အမျိုးသားပြတိုက်(နေပြည်တော်)တွင် ကျင်းပခဲ့ပြီး ဟိုတယ်၊ ခရီးသွားလာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီး ဦးမောင်မြင့်၊ ဒုတိယဝန်ကြီးများဖြစ်ကြသည့် ဦးအေးထွန်းနှင့် ဦးဖြိုးဇော်စိုး၊ အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ တာဝန်ရှိသူများနှင့် ရှေးဟောင်းဝတ္ထုပစ္စည်း အပ်နှံသူများ တက်ရောက်ခဲ့ကြသည်။
မကွေးတိုင်းဒေသကြီး အောင်လံမြို့နယ် မိုးဖုံးအုပ်စု ဗဟန်းကျောင်းမှ ကျောင်းထိုင်ဆရာတော် ဦးဝရဉာဏက ကုန်းဘောင်ခေတ် သတ္တုစပ်ဒင်္ဂါး ၃၂၈ ပြားကို လာရောက်အပ်နှံခဲ့ခြင်းအတွက် ဆုကြေးငွေ ကျပ် ၅၆၂၅၀၀၀ နှင့် ဂုဏ်ပြုမှတ်တမ်းလွှာ ချီးမြှင့်ခံခဲ့ရကြောင်း သိရသည်။
ထို့ပြင် မန္တလေးတိုင်းဒေသကြီး ပြည်ကြီးတံခွန်မြို့နယ်မှ ဦးဝင်းကိုကိုမောင်က ပျူခေတ် ငွေဒင်္ဂါး ၃၃၃ ပြားကို လာရောက်အပ်နှံခဲ့ခြင်းအတွက် ကာလတန်ဖိုး၊ ခေတ်ကာလဆုကြေး၊ ခေတ်လက်ရာဆုကြေးနှင့် ရှားပါးလက်ရာထပ်ဆောင်းဆုကြေးများအပါအဝင် စုစုပေါင်း ဆုကြေးငွေ ကျပ် ၄၈၅၃၂၄၈၄ နှင့် ဂုဏ်ပြုမှတ်တမ်းလွှာ ချီးမြှင့်ခဲ့ကြောင်း သိရသည်။
ရှေးဟောင်းသုတေသနနှင့် အမျိုးသားပြတိုက်ဦးစီးဌာနအနေဖြင့် ၂၀၁၀-၂၀၁၁ ဘဏ္ဍာနှစ်မှ ၂၀၂၅-၂၀၂၆ ဘဏ္ဍာနှစ်အထိ ရွှေ၊ ငွေ၊ ကြေးနှင့် အခြားရှေးဟောင်းဝတ္ထုပစ္စည်း စုစုပေါင်း ၃၃၆၁၅ ခုအား လာရောက်အပ်နှံခဲ့သူ ၄၅၉ ဦးကို ဆုကြေးငွေစုစုပေါင်း ကျပ် ၅၉၈၆၇၉၀၇၂ ချီးမြှင့်ပေးထားပြီးဖြစ်ကြောင်း သိရသည်။