ပါကစ္စတန် စစ်တပ်အကြီးအကဲကို ထရမ့်ပ် လက်ခံတွေ့ဆုံ 

အမေရိကန်သမ္မတ ဒေါ်နယ်ထရမ့်ပ်သည် ပါကစ္စတန်နိုင်ငံ စစ်တပ်အကြီးအကဲ ဖီးမာရှယ်အဆင်းမူနီယာကို ဗုဒ္ဓဟူးနေ့က အိမ်ဖြူတော်တွင် လက်ခံတွေ့ဆုံခဲ့သည်။ ပါကစ္စတန်စစ်တပ် အကြီးအကဲကို ရှားရှားပါးပါး လက်ခံတွေ့ဆုံမှုသည် တောင်အာရှပြိုင်ဘက်နှစ်နိုင်ငံအကြား မကြာခင်က ပေါ်ပေါက်ခဲ့သော တိုက်ပွဲကို ရပ်တန့်စေရန် သူကူညီပေးခဲ့သည်ဆိုသော ထရမ့်ပ်၏ အခိုင်အမာ ပြောကြားချက်နှင့် ပတ်သက်၍ အိန္ဒိယနှင့် အငြင်းပွားမှုကို အသစ်တဖန်ဖြစ်ပေါ်စေခဲ့သည်။
        
ပါကစ္စတန် အရပ်ဖက်အရာရှိများ မပါဝင်ဘဲ ပါကစ္စတန်နိုင်ငံ၏ သြဇာကြီးမားသော စစ်တပ် အကြီးအကဲကို အမေရိကန်သမ္မတတစ်ဦးက အိမ်ဖြူတော်တွင် လက်ခံတွေ့ဆုံ ဆွေးနွေးခြင်းသည် ပထမဆုံးအကြိမ်ဖြစ်သည်။
           
မူနီယာနှင့် တွေ့ဆုံရသည့်အတွက် ဝမ်းမြောက်ဂုဏ်ယူကြောင်း ထရမ့်ပ်က ပြောကြားခဲ့ပြီး ၎င်းတို့သည် အီရန်အရေးနှင့် ပတ်သက်၍ ဆွေးနွေးခဲ့ကြောင်း သိရသည်။ အိန္ဒိယနှင့် စစ်ပွဲကို အဆုံးသတ်ခဲ့သည့်အတွက် မူနီယာကို ကျေးဇူးတင်ကြောင်း ထရမ့်ပ်က ပြောကြားခဲ့သကဲ့သို့ အင်္ဂါနေ့တွင် ဖုန်းဆက်သွယ်ပြောဆိုခဲ့သည့် အိန္ဒိယဝန်ကြီးချုပ် နာရင်ဒြာမိုဒီကိုလည်း ချီးကျူးစကားဆိုခဲ့သည်။
        
  “အရမ်းလူကြီးလူကောင်းဆန်တဲ့ ပုဂ္ဂိုလ်နှစ်ဦးဟာ နျူကလီးစစ်ပွဲတစ်ခုဖြစ်သွားနိုင်တဲ့ စစ်ပွဲကို ရှေ့ဆက်မတိုးဖို့ ဆုံးဖြတ်ခဲ့ကြတယ်” ဟု ထရမ့်ပ်က သတင်းထောက်များကို ပြောကြားခဲ့သည်။
         
မူနီယာအနေဖြင့် အီရန်နှင့် အစ္စရေး ပဋိပက္ခတွင် ဝင်မပါရေးနှင့် ယင်းအစား အပ-စ်အခတ်ရပ်စဲရေးကို တိုက်တွန်းပေးရေးအတွက်ထရမ့်ပ်ကို တောင်းဆိုသွားမည်ဟု မျှော်လင့်ထားကြောင်း ပါကစ္စတန် တာဝန်ရှိသူများက ပြောသည်။ အမေရိကနှင့် အီရန် တို့သည် သံတမန်ဆက်ဆံရေးမရှိသဖြင့် ဝါရှင်တန်တွင် အီရန်ဆိုင်ရာ အခန်းကဏ္ဍကို လက်ခံဆောင်ရွက်ပေးထားသော ပါကစ္စတန်က အီရန်အပေါ် အစ္စရေးက လေကြောင်းတို-က်ခို-က်မှုသည် နိုင်ငံတကာဥပဒေချိုးဖောက်မှုအဖြစ် ရှုတ်ချခဲ့သည်။
         
ဝါရှင်တန်သည် တရုတ်ကို တန်ပြန်ရန်အတွက် အိန္ဒိယနှင့် ဆက်ဆံရေးကို ပိုမိုဦးစားပေးသောကြောင့် ထရမ့်ပ်နှင့် ဘိုင်ဒင် အစိုးရနှစ်ရပ်စလုံးလက်ထက်တွင် တင်းမာနေခဲ့သော အမေရိက-ပါကစ္စတန် ဆက်ဆံရေးမှာ ၎င်းတို့၏ တွေ့ဆုံမှုကြောင့် ပြေလျော့သွားဖွယ်အလားအလာကို ပြ နေသည်။
         
မူနီယာနှင့် တွေ့ဆုံမှုမှ မည်သည့်အရာကို မျှော်လင့်ထားသလဲဟု မေးမြန်းခဲ့ရာတွင် ထရမ့်ပ်က “ကောင်းပြီး ငါစစ်ပွဲတစ်ခုကို ရပ်လိုက်တယ်။ ပါကစ္စတန်ကို နှစ်သက်တယ်။ မိုဒီက အံ့ဖွယ်လူပုဂ္ဂိုလ်လို့ ငါထင်တယ်။ ပြီးခဲ့တဲ့ညက ငါ သူနဲ့ ဖုန်းပြောခဲ့တယ်။ ကုန်သွယ်ရေး သဘောတူညီချက်ရဖို့ အိန္ဒိယရဲ့ မိုဒီနဲ့အတူ ငါတို့ ဆက်လုပ်နေကြတယ်” ဟု ထရမ့်ပ်က ပြောကြားခဲ့သည်။
          
အမေရိကန်ပြည်ထောင်စု၏ ကြားဝင်ညှိနှိုင်းမှုဖြင့် ဆွေးနွေးခဲ့ကြပြီးနောက် အိန္ဒိယနှင့် ပါကစ္စတန်တို့ အပ-စ်အခ-တ်ရပ်စဲရန် သဘောတူညီခဲ့ကြောင်းနှင့် ကုန်သွယ်မှုကို ဦးစားပေးရန် သူ တိုက်တွန်းခဲ့ကြောင်း ထရမ့်ပ်က ပြီးခဲ့သည့်လတွင် ပြောကြားခဲ့သေးသည်။
        
သို့ရာတွင် အင်္ဂါနေ့က ဖုန်းပြောဆိုရာ၌ အိန္ဒိယနှင့် ပါကစ္စတန်အကြား တို-က်ရို-က်စစ်ဖက်ဆိုင်ရာ ဆွေးနွေးမှုများမှတဆင့် အပစ်အခတ်ရပ်စဲရေး ရရှိခဲ့ခြင်းဖြစ်ကာ အမေရိက၏ ကြားဝင်ဆောင်ရွက်မှုကြောင့် မဟုတ်ကြောင်းကို မိုဒီက ထရမ့်ပ်ကို ပြောကြားခဲ့သည်ဟု အိန္ဒိယနိုင်ငံခြားရေးအတွင်းဝန် ဗစ်ခရမ် မစ်ဆရီက ထုတ်ပြန်ပြောကြားခဲ့သည်။

Ref: စီအင်န်အေ