အတိတ်ကာလကထက် လက်နက်များသည် အဖျက်စွမ်းအား၌ အဆများစွာပိုကြီးမားလာသဖြင့် နျူကလီးယားကင်းစင်သော ကမ္ဘာကြီးအတွက် လူငယ်များ တိုက်ပွဲဝင်ကြရမည်ဟု ယခုနှစ်၏ နို့ဘဲလ်ငြိမ်းချမ်းရေးဆုရှင်ဖြစ်သော အဏုမြူဗုံးဒဏ်ဘေးမှ လွတ်မြောက်ခဲ့သူများအဖွဲ့ Nihon Hidankyo ၏ ကိုယ်စားလှယ်တစ်ဦးက အင်္ဂါနေ့တွင် ပြောကြားလိုက်သည်။
၁၉၄၅ ခုနှစ်တွင် အဏုမြူဗုံးအကြံခံခဲ့ရသော ဂျပန်နိုင်ငံ ဟီရိုရှီးမားနှင့် နာဂါဆာကီမြို့များမှ အသက်ရှင်လွတ်မြောက်သူများအဖွဲ့ Nihon Hidankyo ၏ အခြေခံလှုပ်ရှားမှုသည် မျက်မြင်ဒိဋ္ဌကြုံခဲ့ရမှုများကို အသုံးချ၍ နျူကလီးယားကင်းစင်သော ကမ္ဘာကြီးအတွက် စည်းရုံးလှုံဆော်နေခြင်းဖြစ်သည်။
ဂျပန်၏ အဏုမြူဗုံးဒဏ်ဘေးမှ ရှင်သန်လွတ်မြောက်ခဲ့သူများ၏ ပျှမ်းမျှအသက်သည် ယခုအခါ ၈၅ နှစ်ရှိပြီဖြစ်ပြီး နော်ဝေဘုရင် Harald ၊ မိဖုရား Sonja နှင့် အခြား ဂုဏ်သရေရှိ ဧည့်သည်တော်များ တက်ရောက်ခဲ့သော နို့ဘဲလ်ဆု လက်ခံရယူခြင်း အခမ်းအနားတွင် အဖွဲ့၏ ပူးတွဲဥက္ကဌ တီရူမီ တာနာကာက အမှတ်တရစကား ပြောကြားခဲ့သည်။
“ခင်ဗျားတို့ထဲက တစ်ယောက်ယောက်ဟာ သားကောင် ဒါမှမဟုတ်ရင် ကျူးလွန်သူ အချိန်မရွေးဖြစ်သွားနိုင်ပါတယ်” ဟု အသက် ၉၂ နှစ်အရွယ် တာနာကာက တက်ရောက်လာသည့် ပရိသတ်ကို ပြောဆိုခဲ့သည်။
ယခုမှစ၍ ဆယ်နှစ်အတွင်း မိမိတို့ထဲမှ လက်တစ်ဆုပ်စာမျှသည်သာ ကိုယ်တွေ့လွတ်မြောက်လာသူများအဖြစ် သက်သေထွက်ချက်ပေးနိုင်လိမ့်မည်ဖြစ်ကြောင်း ယခုအချိန်မှစ၍ မျိုးဆက်သစ်များသည် မိမိတို့၏ ကြိုးစားအားထုတ်မှုများအပေါ် အခြေတည်၍ လှုပ်ရှားမှုကို ယခုထက်မက တိုးတက်အောင်မြင်စေမည့် နည်းလမ်းများရှာတွေ့လိမ့်မည်ဟု မျှော်လင့်ပါကြောင်း သူက ဆက်လက်ပြောဆိုခဲ့သည်။
အဏုမြူလက်နက်များ အသုံးပြုခြင်း သို့မဟုတ် နျူကလီးယားတားမြစ်ချက်ကို လက်မခံနိုင်သည့် ကမ္ဘာတစ်ဝန်းစံနှုန်းဖန်တီးရာတွင် သူ၏အဖွဲ့သည် အဓိကအခန်းကဏ္ဍမှ ပါဝင်ခဲ့သည်ကို သံသယဖြစ်စရာမရှိကြောင်း သို့ရာတွင် ထိုစံနှုန်းသည် အားနည်းနေခဲ့ကြောင်း သူက ပြောဆိုသည်။
“အရပ်သားအေ-သအပျောက်တွေအပြင် နျူကလီးယားတားမြစ်ချက်က ကျိုးပျက်နိုင်တဲ့ အခြေအနေဖြစ်နေတဲ့အပေါ် အလွန်တရာ ဝမ်းနည်း၊ ဒေါသထွက်ရပါတယ်” ဟု သူက ပြောဆိုခဲ့သည်။
ယူကရိန်းနှင့် ဂါဇာတွင် ဖြစ်နေသော စစ်ပွဲများတွင် နျူလက်နက် အသုံးပြုမည့် ခြိမ်းခြောက်မှုများ ရှိနေခဲ့ကြောင်း တာနာကာက ပြောကြားပြီး ကမ္ဘာတစ်ဝန်းတွင် နျူကလီးယားထိပ်ဖူးပေါင်း ၄,၀၀၀ ခန့်သည် ချက်ချင်း ပစ်လွှတ်ရန် အဆင့်သင့်ဖြစ်နေသည်ဟု သတိပေးခဲ့သည်။
Ref: ယူအက်စ်နူးစ်