ထိုင်ဝမ်သို့ အမေရိက,က လက်နက်ရောင်းချခြင်းကို တန်ပြန်သည့်အနေဖြင့် ကြာသပတေးနေ့မှစတင်ကာ အမေရိကန်စစ်ဖက် ကုမ္ပဏီ ၁၃ ခုကို တရုတ်နိုင်ငံက ပိတ်ဆို့ဒဏ်ခတ်အရေးယူရန် ဆုံးဖြတ်လိုက်သည်ဟု နိုင်ငံခြားရေးဝန်ကြီးဌာနက ပြောကြားခဲ့သည်။ ထိုင်ဝမ်သမ္မတ လိုင်ချင်းတေကို အမေရိကန်ပိုင်နက်မှ တဆင့်ခံ ခရီးသွားလာခွင့်ပြုခဲ့ပြီးနောက် အဆိုပါသတင်းထွက်လာခြင်းဖြစ်သည်။
F-16 တိုက်လေယာဉ်များနှင့် ရေဒါများအတွက် အပိုပစ္စည်းနှင့် အထောက်အကူပစ္စည်း အမေရိကန် ဒေါ်လာ ၃၈၅ သန်းဖိုးကို ထိုင်ဝမ်သို့ ရောင်းချခွင့်ပြုမည့် အမေရိက၏ လုပ်ရပ်ကို တရုတ်က ပြင်းပြင်းထန်ထန် ကန့်ကွက်ခဲ့ပြီးနောက် ယခုကဲ့သို့ တရုတ်ဘက်က တန်ပြန်လာခြင်းဖြစ်သည်။ ယင်းလုပ်ရပ်သည် တရုတ်နိုင်ငံ၏ အချုပ်အခြာအာဏာနှင့် နယ်မြေ တည်တံ့ခိုင်မြဲရေးကို ထိခိုက်စေသည်ဟု ပေကျင်းက ပြောဆိုခဲ့သည်။
ထိုင်ဝမ်ကို ၎င်း၏ ပိုင်နက်တစ်ခုအဖြစ်နှင့် သမ္မတ လိုင်ချင်းတေကို အန္တရာယ်ရှိသော ခွဲထွက်ရေးသမားတစ်ဦးအဖြစ် မှတ်ယူသော တရုတ်သည် ထိုင်ဝမ်ခေါင်းဆောင်များက မည်သည့်နိုင်ငံနှင့်မဆို အဆက်အဆံပြုခြင်း နှင့် အလည်အပတ်သွားလာခြင်းကို ဆန့်ကျင်သည်။
တရုတ်က ဒဏ်ခတ်အရေးယူမည့် ကုမ္ပဏီများတွင် Teledyne Brown Engineering Inc၊ BRINC Drones Inc နှင့် Shield Al Inc တို့လည်း ပါဝင်သည်ဟု နိုင်ငံခြားရေးဝန်ကြီးဌာန၏ ကြာသပတေးနေ့က သတင်းထုတ်ပြန်ချက်တွင် ဖေါ်ပြထားခဲ့သည်။
ထို့အပြင် Raytheon၊ BAE Systems နှင့် United Technologies အပါအဝင် ကုမ္ပဏီငါးခုမှ အမှုဆောင်ခြောက်ဦး၏ ပိုင်ဆိုင်မှုများကို တရုတ်နိုင်ငံက ထိန်းသိမ်းမည်ဖြစ်ကာ ၎င်းတို့ကို ပြည်ဝင်ခွင် ကိုလည်း ပိတ်ပင်သွားမည်ဖြစ်သည်။
တရုတ်အဖွဲ့အစည်းများနှင့် လူပုဂ္ဂိုလ်များအနေဖြင့် အဆိုပါ ဒဏ်ခတ်အရေးယူခံရသူများနှင့် ဆက်သွယ်ဆောင်ရွက်ခြင်းမပြုရန် တားမြစ်ကြောင်းလည်း သိရသည်။
Ref: ယူအက်စ်နူးစ်