TikTok သဘောတူညီချက်နှင့် ပတ်သတ်၍ သူနှင့် တရုတ်သမ္မတ ရှီကျင့်ဖျင်တို့သည် တိုးတက်မှုရှိခဲ့ပြီး ကုန်သွယ်ရေး၊ တရားမဝင် မူးယစ်ဆေးဝါးရောင်းဝယ်ရေးနှင့် ရုရှား၏ ယူကရိန်းစစ်ပွဲအရေးတို့ကိုဆွေးနွေးရန် ရက်သတ္တခြောက်ပတ်အတွင်း တောင်ကိုရီးယားတွင် လူချင်းတွေ့ဆုံသွားမည်ဖြစ်ကြောင်း အမေရိကန်သမ္မတ ဒေါ်နယ်ထရမ့်ပ်က ပြောကြားလိုက်သည်။
စူပါပါဝါနှစ်နိုင်ငံ၏ ခေါင်းဆောင်များအကြား သုံးလအတွင်း ပထမဆုံးဖုန်းပြောဆိုမှုတွင် နှစ်ဖက်တင်းမာမှုများ လျော့ကျသွားပုံရသော်လည်း လူကြိုက်များသော ဗီဒီယိုအက်ပ်၏ ကံကြမ္မာအတွက် မျှော်လင့်ထားသော ခိုင်မာသည့်သဘောတူညီချက်နှင့် ပတ်သတ်၍မှု လတ်တလောတွင် ရှင်းရှင်းလင်းလင်း မရှိလှပေ။
တောင်ကိုရီးယားနိုင်ငံ Gyeongju မြို့တွင် အောက်တိုဘာလ ၃၁ ရက်နေ့၌ စတင်ကျင်းပမည့် အာရှ-ပစိဖိတ် စီးပွားရေးပူးပေါင်းဆောင်ရွက်မှုဖိုရမ်၏ ပြင်ပတွင်ထပ်မံဆွေးနွေးသွားရန် ခေါင်းဆောင်နှစ်ဦးက သဘောတူခဲ့ကြပြီး လာမည့်နှစ်အစောပိုင်းတွင် သူတရုတ်နိုင်ငံသို့ အလည်အပတ်သွားရောက်မည်ဟု အမေရိကန်သမ္မတက ပြောကြားခဲ့သည်။ ထို့အပြင် နောက်ပိုင်း၌ ရှီသည်လည်း အမေရိကသို့ လာရောက်လိမ့်မည်ဟု ထရမ့်ပ်က ပြောကြားခဲ့သည်။
“ကုန်သွယ်ရေး၊ ဖန်တနိုင်းမူးယစ်ဆေးဝါးကိစ္စ၊ ရုရှားနဲ့ ယူကရန်းစစ်ပွဲ အဆုံးသတ်အခြေအနေတစ်ရပ် ဆောင်ကျဉ်းပေးဖို့ လိုအပ်မှု၊ TikTok သဘောတူညီချက်ကို အတည်ပြုဖို့အပါအဝင် အလွန်အရေးကြီးတဲ့ ကိစ္စရပ်အတော်များများမှာ ငါတို့တိုးတက်မှုရရှိခဲ့တယ်” ဟု ထရမ့်ပ်က ထရုဆိုရှယ်မီဒီယာတွင် ရေးသားခဲ့သည်။
“ဖုန်းပြောဆိုမှုက အရမ်းအဆင်ပြေပါတယ်။ ငါတို့ဖုန်းထပ်ပြောကြဦးမှာပါ။ TikTok အတည်ပြုရေးကို အလေးထားတယ်။ နောက်ပြီး အေပက်မှာ တွေ့ဆုံဆွေးနွေးကြဖို့ နှစ်ဖက်စလုံးက မျှော်လင့်ထားတယ်” ဟု ထရမ့်ပ်ပ က ရေးသားခဲ့သည်။ ယခုသီတင်းပတ်အစောပိုင်းတွင် နှစ်ဖက်အကြားရရှိခဲ့သော မူဘောင်သဘောတူညီချက်အပေါ် ပေကျင်းထံမှ နောက်ဆုံးအတည်ပြုချက်ရနိုင်ရေးသည် TikTok ဆက်လက်လည်ပတ်နေစေရန်အတွက် ထရမ့်ပ်ဖြေရှင်းရန်လိုအပ်သော အတားအဆီးများထဲမှ တစ်ခုဖြစ်သည်။
TikTok ပိုင်ရှင်ကုမ္ပဏီ ByteDance အနေဖြင့် ၎င်း၏ အမေရိကဆိုင်ရာပိုင်ဆိုင်မှုများကို မရောင်းချပါက ၂၀၂၅ ခုနှစ် ဇန်နဝါရီလ ၁ ရက် နေ့မှစ၍ အမေရိကန်အသုံးပြုသူများအတွက် အက်ပ်ကိုပိ-တ်ပ-စ်ရမည်ဟု ကွန်ဂရက်က အမိန့်ပေးထားသည်။
ထရမ့်ပ်၏ ထုတ်ပြန်ချက်တွင် မည်သို့သော တိုးတက်မှုများဆိုသည်ကို အသေးစိတ်မဖော်ပြခဲ့ဘဲ တရုတ်၏ထုတ်ပြန်ချက်တွင်လည်း TikTok နှင့်ပတ်သတ်သော သဘောတူညီချက်ကို အတိအကျရည်ညွှန်းခဲ့ခြင်းမရှိပေ။
Ref: သည်ကိုရီးယားတိုင်းမ်စ်