တောင်တရုတ်ပင်လယ်တွင်း နှောင့်ယှက်မှုများရပ်ရန် ဖိလစ်ပိုင်ကို တရုတ်တိုက်တွန်း

ပေကျင်း၊ မေ ၇ ရက်

တရုတ်နိုင်ငံ၏ ပင်လယ်ရေကြောင်း သိပ္ပံသုတေသနလုပ်ငန်းများကို ဖိလစ်ပိုင်ဘက်က နှောင့်ယှက်ဟန့်တားမှုကို တုံ့ပြန်သည့်အနေဖြင့် တရားမဝင် နိုင်လိုမင်းထက်ပြုမှုများ၊ ဂုဏ်သိက္ခာညှိုးနွမ်းစေရန် လုပ်ဆောင်မှုများနှင့် မီးမွှေးလှုံ့ဆော်သည့် ဝါဒဖြန့်မှုများကို ချက်ချင်းရပ်တန့်ရန် တရုတ်ကမ်းခြေစောင့်တပ်ဖွဲ့ပြောရေးဆိုခွင့်ရှိသူက ကြာသပတေးနေ့တွင် တိုက်တွန်းပြောကြားခဲ့သည်။

တရုတ်သုတေသနသင်္ဘော Xiangyanghong 33 သည် တရုတ်နိုင်ငံ၏ Houteng ကျောက်တန်း အနီးရှိ ရေပြင်တွင် ဥပဒေ နှင့်အညီပင်လယ်ရေကြောင်း ဂေဟစနစ်ကို စစ်တမ်းကောက်ယူနေစဉ်အတွင်း ဖိလစ်ပိုင်ကမ်းခြေစောင့်တပ်ဖွဲ့ပိုင် Islander လေယာဉ်တစ်စင်းက ဗုဒ္ဓဟူးနေ့တွင် ရည်ရွယ်ချက်ရှိရှိ ချဉ်းကပ်နှောင့်ယှက်ခဲ့ကြောင်း တရုတ်ကမ်းခြေစောင့်တပ်ဖွဲ့ ပြောရေးဆိုခွင့်ရှိသူ ကျန်း လွယ်က မှတ်ချက်ပြု ပြောကြားခဲ့သည်။

တရုတ်ကမ်းခြေစောင့်တပ်ဖွဲ့သည် အဆိုပါလေယာဉ်ကို ခြေရာခံ စောင့်ကြည့်ခဲ့ပြီး တရုတ်သင်္ဘော၏ ဘေးကင်းသော လုပ်ငန်းဆောင်ရွက်မှုများကို အာမခံနိုင်ရန် ဥပဒေ၊ လုပ်ထုံးလုပ်နည်းများနှင့်အညီ ကိုင်တွယ်ဖြေရှင်းခဲ့ကြောင်း ကျန်း က ဆိုသည်။ ဖိလစ်ပိုင်ဘက်မှ စွပ်စွဲချက်များသည် အချက်အလက်များကို လိမ်လည်လှည့်ဖြားခြင်းသာဖြစ်ပြီး လူထုကို လမ်းမှားရောက်စေရန် ရည်ရွယ်ခြင်းဖြစ်ကြောင်းလည်း ၎င်းက အလေးပေးပြောကြားခဲ့သည်။

တရုတ်ကမ်းခြေစောင့်တပ်ဖွဲ့အနေဖြင့် တရုတ်နိုင်ငံ၏ စီရင်ပိုင်ခွင့်အောက်ရှိ ရေပြင်များတွင် အခွင့်အရေး ကာကွယ်စောင့်ရှောက်ခြင်းနှင့် ဥပဒေစိုးမိုးရေး လုပ်ငန်းစဉ်များကို ဥပဒေနှင့်အညီ ဆက်လက်လုပ်ဆောင်သွားမည်ဖြစ်ကြောင်း ကျန်း က ထပ်လောင်းပြောကြားခဲ့သည်။

ထို့ပြင် တရုတ်နိုင်ငံ၏ သိပ္ပံစစ်တမ်းကောက်ယူမှုများ ဘေးကင်းစေရန်နှင့် တောင်တရုတ်ပင်လယ်အတွင်း ငြိမ်းချမ်းရေးနှင့် တည်ငြိမ်ရေးကို ထိန်းသိမ်းရန်အတွက် လိုအပ်သော အစီအမံအားလုံးကို လုပ်ဆောင်သွားမည်ဖြစ်ကြောင်း ၎င်းက ဆိုသည်။

Ref: ဆင်ဟွာ