တတိယအကြိမ်ပြည်ထောင်စုလွှတ်တော် ဒုတိယပုံမှန်အစည်းအဝေး ဒုတိယနေ့တွင် အရေးပေါ်အခြေအနေကြေညာခြင်း၊ စစ်အုပ်ချုပ်ရေးအမိန့်ထုတ်ပြန်ခြင်းနှင့် ဒီဇယ်ဆီအထူးကုန်စည်ခွန်နှင့် ကုန်သွယ်လုပ်ငန်းခွန် ကင်းလွတ်ခွင့်ပြုနိုင်ရေးကိစ္စရပ်များ ဆွေးနွေးမည်

ယနေ့ ဂျွန်လ ၉ ရက်၌ တတိယအကြိမ်ပြည်ထောင်စုလွှတ်တော် ဒုတိယပုံမှန်အစည်းအဝေး ဒုတိယနေ့ကိုကျင်းပရာ ပြည်ထောင်စုလွှတ်တော် တက်ရောက်ခွင့်ရှိသူကိုယ်စားလှယ် ၅၆၀ ဦးရှိရာ တက်ရောက်သူ ၅၅၈ ဦးရှိသည့်အတွက် အစည်းအဝေး အထမြောက်ခဲ့သည်။

အစည်းအဝေး ဒုတိယနေ့တွင် လွှတ်တော် နာယကမှ နိုင်ငံတော်သမ္မထံ နိုင်ငံတကာအဖွဲ့အစည်းများမှပေးပို့သည့် ဝမ်း‌ေမြာက်‌ေကြာင်းသဝဏ်လွှာအသီးသီးကို ဖတ်ကြားတင်ပြခဲ့ကာ၊ ဆက်လက်၍ နိုင်ငံတော်သမ္မတမှ ခန့်အပ်တာဝန်ပေးအပ်ရန် ပေးပို့ထားသော တိုင်းနှင့်ပြည်နယ်အသီးသီးမှ ဝန်ကြီးဌာနများ၏ဝန်ကြီးများအမည်စာရင်း၊ တိုင်းနှင့်ပြည်နယ်အသီးသီးမှ ဥပဒေချုပ်များ အမည်စာရင်း၊ တိုင်းနှင့်ပြည်နယ်အသီးသီးမှ စာရင်းစစ်ချုပ်များ အမည်စာရင်း၊ ကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ဉက္ကဌများ အမည်စာရင်း၊ တိုင်းနှင့်ပြည်နယ်အသီးသီးမှ တိုင်းရင်းသားလူမျိုးရေးရာဝန်ကြီးဌာနမှ ဝန်ကြီးများအမည်စာရင်း၊ တိုင်းနှင့်ပြည်နယ်အသီးသီးမှ တရားလွှတ်တော်တရားသူကြီးများ အမည်စာရင်း၊ မြို့တော်ဝန်များ အမည်စာရင်းကို ဖတ်ကြားတင်ပြခဲ့သည်။

ထို့နောက် ယနေ့ အစည်းအဝေးတွင် နိုင်ငံတော်သမ္မတရုံး၏ ဥပဒေကဲ့သို့အာဏာတည်သော အမိန့်အမှတ် (၁/၂၀၂၆) အရေးပေါ်အခြေအနေကြေညာခြင်းနှင့် အမိန့်အမှတ်(၂/၂၀၂၆) စစ်အုပ်ချုပ်ရေးအမိန့်ထုတ်ပြန်ခြင်းတို့နှင့် စပ်လျဉ်း၍ ဦးစိုးပိုင်၊ ဝန်းသိုမဲဆန္ဒနယ်၊ ဦးလှမင်း၊ ငါန်းဇွန်မဲဆန္ဒနယ်၊ ဒေါက်တာကျော်ဆွေ၊ တောင်တွင်းကြီးမဲဆန္ဒနယ်၊ ဦးထိန်လင်း၊ ဧရာဝတီတိုင်းဒေသကြီး၊ ကိုယ်စားလှယ်အမှတ်(၅) ကိုယ်စားလှယ်တို့မှ (၆) မိနစ်စီဆွေးနွေးကာ လွှတ်တော်၏ အဆုံးအဖြတ်ရယူမည်ဖြစ်ကာ၊ ဒီဇယ်ဆီ HSD(500ppm) အပေါ်ကျသင့်သည့် အထူးကုန်စည်ခွန်နှင့် ကုန်သွယ်လုပ်ငန်းခွန် ကင်းလွတ်ခွင့်ပြုနိုင်ရေးကိစ္စနှင့်စပ်လျဉ်း၍ ဦးစိုးပိုင်၊ ဝန်းသိုမဲဆန္ဒနယ်၊ ဒေါက်တာကျော်ဆွေ၊ တောင်တွင်းကြီးမဲဆန္ဒနယ်တို့မှ လွှတ်တော်ကိုယ်စားလှယ်များက (၆) မိနစ်စီ ဆွေးနွေးဆောင်ရွက်သွားမည်ဖြစ်သည်။