ဆွစ်နိုင်ငံတကာလေကြောင်းလိုင်း မှ လေယာဉ်တစ်စင်း သည်အရေးပေါ်ဆင်းသက်ခဲ့ရ၍ လေယာဉ်အမှုထမ်းတစ်ဦး ေ-သဆုံးခဲ့သည်ဟု လေကြောင်းလိုင်းက ဒီဇင်ဘာလ ၃၀ ရက်နေ့တွင် ပြောဆိုသည်။
ဒီဇင်ဘာလ ၂၃ ရက်က ခရီးသည် ၇၄ ဦး လေယာဉ်အမှုထမ်း ၅ ဦးနှင့်အတူ ဘူခါရက်စ်မြို့မှ ဇူးရစ်မြို့သို့ ပျံသန်းခဲ့သော အဲရ်ဘတ်စ် အေ၂၂၀-၃၀၀ လေယာဉ်သည် အင်ဂျင်ပြဿနာပေါ်ပေါက်ခဲ့ပြီး လေယာဉ်မှူးခန်းနှင့် ခရီးသည်ခန်းများတွင် မီးခိုးများပြည့်နှက်သွားမှုကြောင့် သြစတြီးယားနိုင်ငံ ဂရက်ဇ်မြို့ကို အရေးပေါ် ဆင်းသက်ခဲ့ရသည်။ လေယာဉ်သည် လုံခြုံဘေးကင်းစွာ ဆင်းသက်နိုင်ခဲ့သည်။
မိမိတို့၏ လုပ်ဖော်ကိုင်ဖက်လေယာဉ် အမှုထမ်းလူငယ်သည် ဒီဇင်ဘာ ၃၀ ရက်က ဂရက်ဇ်မြို့ရှိ ဆေးရုံတွင် ကွယ်လွန်သွားကြောင်းကို ဝမ်းနည်းခြင်းများစွာဖြင့် သတင်းထုတ်ပြန်ရပါကြောင်း ဆွစ်လေကြောင်းလိုင်း၏သတင်း ထုတ်ပြန်ချက်တွင် ဖေါ်ပြထားသည်။
အဆိုပါ ဆုံးရှုံးမှုသည် လေကြောင်းလိုင်းကို တုန်လှုပ်ခြောက်ခြားစေပြီး ဝမ်းနည်းကြေကွဲရသည်ဟု ဆွစ်လေကြောင်းလိုင်း အမှုဆောင်အရာရှိချုပ် Jens Fehlinger က ပြောကြားခဲ့ပြီး ကျန်ရစ်သူမိသားစုကို တတ်နိုင်သမျှ ထောက်ပံ့ကူညီသွားမည်ဟု ဆိုခဲ့သည်။
ချစ်ခင်ရသူများကို လေးစားသောအားဖြင့် မိမိတို့ဝန်ထမ်း၏ အသေးစိတ်အချက်အလက်များ သို့မဟုတ် ေ-သဆုံးရသည့် အကြောင်းရင်းတို့ကို ထုတ်ပြန်ပေးမည်မဟုတ်ဟု လေကြောင်းလိုင်းက ပြောကြားခဲ့သည်။
လေယာဉ်သည်အရေးပေါ် ဆင်းသက်ခဲ့ပြီးနောက် လေယာဉ်အမှုထမ်းတစ်ဦးကို ဂရက်ဇ်မြို့ ဆေးရုံတစ်ခုသို့ ရဟတ်ယာဉ်ဖြင့်ပို့ဆောင်ကာ အထူးကြပ်မတ်ကုသမှု ကိုခံယူစေခဲ့သည်။ ထို့အပြင် အခြားလေယာဉ်အမှုထမ်းတစ်ဦးကိုလည်း ဆေးရုံတင်ပေးခဲ့ရသည်။
ခရီးသည်အားလုံးကို ကယ်ထုတ်ပေးခဲ့ကာ ၁၂ ဦးကို ဆေးဝါးကုသမှုပေးခဲ့သည်။ ဆေးရုံတက်ရသည့် ခရီးသည်အားလုံးသည် ဆေးရုံမှဆင်းနိုင်ကြပြီဟု ဒီဇင်ဘာ ၃၀ တွင် ဆွစ် လေကြောင်းလိုင်းက ပြောဆိုခဲ့သည်။
ဖြစ်စဉ်နှင့်ပတ်သက်၍ စုံစမ်းစစ်ဆေးရာတွင် လေယာဉ်၏ အင်ဂျင်ကဲ့သို့သော စက်ပစ္စည်းအစိတ်အပိုင်းများကိုသာမက လေယာဉ်အမှုထမ်းများအတွက် အသက်ရှူကိရိယာများကိုလည်း အဓိကထားသွားမည်ဟု ဆွစ်က ပြောဆိုခဲ့သည်။
Ref: သည်စထရိတ်တိုင်းမ်စ်