ဧပြီလ ၁၁ ရက်
အမေရိက-ဖိလစ်ပိုင် နှစ်ပတ်လည် စစ်ရေးလေ့ကျင့်မှုများတွင် ဂျပန်နိုင်ငံ ပါဝင်လာခြင်းသည် “အလွန်အရေးပါသော ကိစ္စရပ်” တစ်ခုဖြစ်ကြောင်း လေ့လာဆန်းစစ်သူများက ဆိုကြသည်။ အဘယ်ကြောင့်ဆိုသော် ထိုသို့ပါဝင်ခြင်းမှာ တရုတ်နိုင်ငံနှင့် ရင်ဆိုင်ရနိုင်ဖွယ်ရှိသော ဒေသတွင်း အစုအဖွဲ့များတွင် ဂျပန်အနေဖြင့် ပိုမိုကြီးမားသော အခန်းကဏ္ဍမှ ပါဝင်လာကြောင်း ပြသနေခြင်းကြောင့် ဖြစ်သည်။
ယခုနှစ် Salaknib စစ်ရေးလေ့ကျင့်မှုကို လူဇုန်ကျွန်း မြောက်ပိုင်းတွင် တနင်္လာနေ့မှစတင်၍ ကျင်းပလျက်ရှိပြီး အမေရိကန်နှင့် ဖိလစ်ပိုင်တပ်မတော်တို့မှ စစ်သည်အင်အား ၇,၀၀၀ ကျော် ပါဝင်လေ့ကျင့်လျက်ရှိသည်။
အမေရိကန်တပ်မတော်၏ ပြောကြားချက်အရ အဆိုပါစစ်ရေးလေ့ကျင့်မှုသည် “တပ်မတော်နှစ်ရပ်အကြား တိုက်ပွဲဝင်ရန် အသင့်ဖြစ်မှုနှင့် အပြန်အလှန် ပူးပေါင်းဆောင်ရွက်နိုင်စွမ်းတို့ကို မြှင့်တင်ရန်ဖြစ်ပြီး စစ်ရေးဆိုင်ရာ နယ်ပယ်အသီးသီးကို အဓိကထား လုပ်ဆောင်သွားမည်” ဖြစ်သည်။
ယခုနှစ်တွင် ဂျပန်ကြည်းတပ်မှ စစ်သည်အင်အား ၄၂၀ ခန့်သည် သြစတြေးလျနှင့် နူးဇီလန်နိုင်ငံတို့မှ စစ်သည်များနှင့်အတူ ပထမဆုံးအကြိမ်အဖြစ် ပါဝင်လာခဲ့ပေသည်။
ဒုတိယကမ္ဘာစစ်အတွင်း ဂျပန်က ဖိလစ်ပိုင်ကို သိမ်းပိုက်ခဲ့ပြီးနောက်ပိုင်း တိုက်ပွဲဝင်ရန် အသင့်ဖြစ်နေသော ဂျပန်တပ်ဖွဲ့ဝင်များ သည် ဖိလစ်ပိုင်မြေပေါ်သို့ ပထမဆုံးအကြိမ်အဖြစ် ပြန်လည်ရောက်ရှိလာခြင်းလည်း ဖြစ်သည်။
Salaknib စစ်ရေးလေ့ကျင့်မှု၏ ပထမအဆင့်ကို ဧပြီလ ၁၇ ရက်အထိ ပြုလုပ်သွားမည်ဖြစ်သည်။ ရက်အနည်းငယ်အကြာတွင် နှစ်နိုင်ငံစလုံးမှ စစ်ဘက်ဆိုင်ရာ ကဏ္ဍအားလုံး ပါဝင်မည့် ပိုမိုကြီးမားသော Balikatan အမေရိက-ဖိလစ်ပိုင် စစ်ရေးလေ့ကျင့်မှုများကို ဆက်လက်ပြုလုပ်သွားမည် ဖြစ်သည်။
Ref: ဆော့သ်ချိုင်းနားမောနင်းပို့စ်