ကုလသမဂ္ဂသည် ၎င်း၏ အကြီးအကဲသစ်ကို ရွေးချယ်ရန် လုပ်ငန်းစဉ်များ ဆောင်ရွက်လျက်ရှိသည်။ လက်ရှိ အထွေထွေအတွင်းရေးမှူးချုပ် အန်တိုနီယို ဂူတာရက်စ်၏ နေရာတွင် အစားထိုးရန်အတွက် ယခုအချိန်အထိ လူလေးဦးကို အမည်စာရင်း တင်သွင်းထားပြီးဖြစ်သည်။
ဂူတာရက်စ်သည် သူ၏ ဒုတိယမြောက် (၅) နှစ်သက်တမ်းကို ထမ်းဆောင်နေခြင်းဖြစ်ပြီး ယင်းသက်တမ်းသည် ဒီဇင်ဘာ ၃၁ ရက်**တွင် ကုန်ဆုံးမည်ဖြစ်သည်။ ကုလသမဂ္ဂ အထွေထွေညီလာခံ ဥက္ကဋ္ဌက အဖွဲ့ဝင်နိုင်ငံများအနေဖြင့် ဗုဒ္ဓဟူးနေ့နောက်ဆုံးထား၍ လောင်းလျာများကို အမည်စာရင်းတင်သွင်းကြရန် တိုက်တွန်းနှိုးဆော်ထားသည်။
လက်ရှိ အမည်စာရင်း တင်သွင်းခံထားရသူ လေးဦးမှာ
၁/ ရာဖေးလ် ဂရော့ဆီ (Rafael Grossi)။ အပြည်ပြည်ဆိုင်ရာ အဏုမြူစွမ်းအင်အေဂျင်စီ (IAEA) ၏ ညွှန်ကြားရေးမှူးချုပ်။
၂/ မီချဲလ် ဘက်ချလက် (Michelle Bachelet)။ ချီလီနိုင်ငံ သမ္မတဟောင်း။
၃/ ရီဘက်ကာ ဂရင်းစပန် (Rebeca Grynspan)။ ကုလသမဂ္ဂ ကုန်သွယ်ရေးနှင့် ဖွံ့ဖြိုးမှုညီလာခံ (UNCTAD) ၏ အထွေထွေအတွင်းရေးမှူးချုပ်။
၄/ မက်ကီ ဆောလ် (Macky Sall)။ ဆီနီဂေါနိုင်ငံ သမ္မတဟောင်း။
တို့ဖြစ်ကြပြီး၊ အခြားသော လောင်းလျာများလည်း ထပ်မံတိုးလာနိုင်ဖွယ် ရှိသည်။
အမည်စာရင်း တင်သွင်းခံရသူ လေးဦးအနက် သုံးဦးမှာ လက်တင်အမေရိကနှင့် ကာရေဘီယံဒေသ မှ ဖြစ်ကြသည်။ ယင်းမှာ ကုလသမဂ္ဂ အကြီးအကဲ ရာထူးကို ဒေသအလိုက် အလှည့်ကျ ရွေးချယ်သည့် ထုံးတမ်းစဉ်လာနှင့်အညီ ဖြစ်သည်။
ထို့အပြင် လောင်းလျာများအနက် နှစ်ဦးမှာ အမျိုးသမီးများ ဖြစ်ကြသည်။ ကုလသမဂ္ဂ သမိုင်းတစ်လျှောက်တွင် အမျိုးသမီး အထွေထွေအတွင်းရေးမှူးချုပ် တစ်ဦးတစ်ယောက်မျှ မရှိခဲ့ဖူးသေးသဖြင့်၊ အထွေထွေညီလာခံ ဥက္ကဋ္ဌနှင့် အခြားသူများက အမျိုးသမီးလောင်းလျာများကို ပိုမိုအမည်စာရင်း တင်သွင်းကြရန် တိုက်တွန်းနေကြသည်။
အမည်စာရင်း တင်သွင်းခံထားရသူများသည် လာမည့် ဧပြီ ၂၀ ရက်တွင် စတင်မည့် ရက်သတ္တပတ်အတွင်း အပြန်အလှန် ဆွေးနွေးမှုများ(Interactive Dialogues) တွင် ပါဝင်ကြရမည်ဖြစ်သည်။
ကုလသမဂ္ဂ လုံခြုံရေးကောင်စီ၏ အမြဲတမ်းအဖွဲ့ဝင်နိုင်ငံများသည် အတွင်းရေးမှူးချုပ်သစ် ရွေးချယ်ရာတွင် ဩဇာလွှမ်းမိုးမှု အများဆုံးရှိသည်။ ယခုနှစ် ဆောင်းဦးပေါက် ကာလဝန်းကျင်တွင် အထွေထွေညီလာခံက ကုလသမဂ္ဂ အကြီးအကဲသစ်ကို ခန့်အပ်ခြင်း မပြုမီ လုံခြုံရေးကောင်စီ၏ ထောက်ခံချက်ကို ရရှိရန် လိုအပ်မည်ဖြစ်သည်။