ထိုင်းနိုင်ငံကမင်းသမီးတစ်ဦးလည်းဖြစ်သလို Miss Thailand World ခုနှစ်ရဲ့ Second Runner Up ဆုရှင်လည်းဖြစ်တဲ့ ChattarikaSittiprom ဟာ မြန်မာနိုင်ငံကို ဒီဇင်ဘာလ ၁၁ ရက်နေ့ ကနောက်ထပ်တစ်ကြိမ်အဖြစ် ထပ်မံရောက်ရှိလာခဲ့ပြန်ပါတယ်။ ဒီတစ်ခေါက်ကတော့ သူရဲ့ပထမဦးဆုံးရုပ်ရှင်ဇာတ်ကား TT & Donut ရုပ်ရှင်ဇာတ်ကားရဲ့ World Gala Premiere Show ကို တက်ရောက်ဖို့ရောက်ရှိလာခဲ့တာဖြစ်ပါတယ်။
” ဒီဇာတ်ကားက ကျွန်မအတွက်ပထမဦးဆုံးပွဲဦးထွက် ရုပ်ရှင်ဇာတ်ကားကြီးလည်းဖြစ်တယ်။ ပြီးတော့ ပထမဦးဆုံးဇာတ်ကားကို မြန်မာနိုင်ငံက ထိပ်တန်းမင်းသားတစ်ယောက်ဖြစ်တဲ့ ကိုပြေတီဦးနဲ့သရုပ်ဆောင်ခွင့်ရတဲ့အတွက်လည်းပီတိ ဖြစ်ရပါတယ်။ သူကအပြင်မှာလည်းတအားခင်ဖို့ကောင်းပါတယ်။ ပြီးတော့ ကိုပြေတီဦးနဲ့ သရုပ်ဆောင်ရတာ အတွေ့အကြုံတွေလည်းအများ ကြီးရပါတယ်။ ဒီနိုင်ငံမှာဆိုရင် လည်းကိုပြေတီဦးကို ချစ်ကြတဲ့ပရိသတ်တွေ ကအများကြီးရှိတယ်ဆိုတာသိပါတယ်။ ကိုပြေတီဦးရဲ့ ပရိသတ် တွေကထိုင်းမှာလည်း အများကြီးရှိတယ်ဆိုတာ ကိုထိုင်းမှာလုပ်တဲ့ပွဲတုန်းကတွေ့လိုက်ရတယ်လေ။ အဲ့ဒီတော့ ကိုပြေတီဦးကိုချစ် တဲ့ပရိသတ်တွေအနေနဲ့ ဒီရုပ်ရှင်ဇာတ်ကားကိုလာကြည့်ကြတဲ့အခါ တီတီကိုလည်းချစ်ကြသလို ဒိုးနပ်ကိုလည်း ချစ်ပေးပါလို့ပြောချင်ပါတယ်။(ရယ်လျက်)” လို့ Chattarika Sittiprom ဆိုပါတယ်။
ဇာတ်ကားတစ်ကားလုံးမှာတော့ အက်ရှင်၊ဟာသ၊ ရိုမန့်၊ ဒရာမာကိုပေါင်းစပ်ရိုက်ကူးထားတာမို့ ရိုက်ကူးစဉ်တုန်းကလည်းပျော်ရွှင်ရသလိုအားလုံးပြီးစီးသွားတဲ့ အချိန်မှာလည်းသရုပ်ဆောင်မှုတွေအပေါ် အားရကျေနပ်မှုရှိပါတယ်လို့လည်းဆိုပါတယ်။
” အကြိုက်နှစ်သက်ဆုံး ဇာတ်ဝင်ခန်းဆိုတာထက် သရုပ်ဆောင်ခဲ့တဲ့ ဇာတ်ဝင်ခန်းတိုင်းကိုတော့ အကောင်းဆုံး ကြိုးစားသရုပ်ဆောင်ခဲ့ပါတယ်။ ကျွန်မ အနေနဲ့ ပြောရရင်နောက်ဆုံး ဇာတ်ဝင်ခန်းမှာဝတ်ရတဲ့ မြန်မာဝတ်စုံလေးကို ကြိုက်နှစ်သက်တယ်။ အဲ့ဒီတုန်းက မြန်မာဝတ်စုံဝတ်ထားတဲ့ ကိုယ့်ကိုယ်ကိုယ် ကြည့်ပြီးအတော်လေး ကြည်နူးမိတယ်” လို့ Chattarika Sittiprom ကဆိုပါတယ်။
Chattarika Sittiprom သာ ကသူ့အနေနဲ့ TT & Donut ရုပ်ရှင်ဇာတ်ကားတစ်ခုတည်းနဲ့ပဲ မြန်မာ-ထိုင်း ပူးပေါင်းရိုက်ကူးတယ်ဆိုတာမျိုးကို ရပ်တန့် သွားမှာမဟုတ်ဘဲသူဟာ သရုပ်ဆောင်တစ်ဦးဖြစ်တဲ့အတွက် သူ့ကိုမြန်မာနိုင်ငံက ထုတ်လုပ်ရေးတွေအနေနဲ့ ထပ်မံကမ်းလှမ်းလာတာမျိုးရှိလာမယ်ဆိုရင်လည်း အလုပ်တွေအများကြီးတွဲလုပ်ချင်ပါတယ် လို့ပြောပါတယ်။
ထက်လူ
ဓာတ်ပုံ-မင်းမင်းထွန်း