မြန်မာနိုင်ငံကမ်းခြေစောင့်တပ်ဖွဲ့ ဖွဲ့စည်းခဲ့သည်မှာ ယနေ့ အောက်တိုဘာ ၉ ရက်တွင် (၄)နှစ်မြောက်နှစ်ပတ်လည်တိုင်ခဲ့ပြီဖြစ်၍ နှစ်ပတ်လည်နေ့အခမ်းအနားကို ကမ်းခြေစောင့်တပ်ဖွဲ့ ကွပ်ကဲမှုဌာနချုပ်၌ကျင်းပရာ ကာကွယ်ရေးဝန်ကြီးဌာန၊ ပြည်ထောင်စုဝန်ကြီးဗိုလ်ချုပ်ကြီးမောင်မောင်အေး တက်ရောက်ခဲ့သည်။
ထိုသို့ တက်ရောက်ပြီးနောက် မြန်မာနိုင်ငံကမ်းခြေစောင့်တပ်ဖွဲ့ ဖွဲ့စည်းခဲ့ရသည့်အကြောင်းရင်းကိုရှင်းလင်းပြောကြားပြီး တပ်ဖွဲ့သည် ရေကြောင်းအကျိုးစီးပွားများကို ထိန်းသိမ်းကာကွယ်စောင့်ရှောက်ရာတွင် အရေးကြီးသည့်အခန်းကဏ္ဍမှ တာဝန်ထမ်းဆောင်ရမည်ဖြစ်ပြီး နိုင်ငံတော်တည်ငြိမ်အေးချမ်းရေး၊ ပင်လယ်ရေကြောင်းတရားဥပဒေစိုးမိုးရေးနှင့် စီးပွားရေးအင်အားတောင့်တင်းလာစေရန်တည်ဆောက်ရေး စသည့်လုပ်ငန်းများ၌ ကျရာအခန်းကဏ္ဍမှတာဝန်ကျေပွန်အောင်ထမ်းဆောင်ကြရမည်ဟု ပြောသည်။
” ဒါ့အပြင် ပင်လယ်ပြင်တရားဥပဒေစိုးမိုးရေးအဖွဲ့အ စည်းတွေနဲ့ နိုင်ငံတကာပင်လယ်ရေကြောင်းဆိုင်ရာ ကိစ္စတွေမှာ အဖြူရောင်သံတမန်အဖြစ် ရည်မှန်းချက်ထားဆောင်ရွက်ရပါမယ်။ မြန်မာနိုင်ငံကမ်းခြေစောင့်တပ်ဖွဲ့ဥပဒေ၊ တည်ဆဲရေကြောင်းဥပဒေတွေအတိုင်း စည်းမျဉ်းစည်းကမ်းတွေနဲ့အညီလိုက်နာပြီး နိုင်ငံတော်ရဲ့ရေကြောင်းအကျိုးစီးပွားတွေ ပိုမိုဖွံ့ဖြိုးလာစေဖို့ဆောင်ရွက်ရပါမယ်။ မြန်မာနိုင်ငံကမ်းခြေစောင့်တပ်ဖွဲ့ဥပဒေနဲ့ ဆက်စပ်ကျင့်သုံးရမယ့် ရေကြောင်းဆိုင်ရာဥပဒေတွေကိုလည်း စဉ်ဆက်မပြတ်လေ့လာပြီး နိုင်ငံတော်ရဲ့ရေကြောင်းအကျိုးစီးပွားတွေကို ကာကွယ် စောင့်ရှောက်ရပါမယ်”ဟု ဗိုလ်ချုပ်ကြီးမောင်မောင်အေးက ပြောကြားခဲ့သည်။
ထို့နောက် ဗိုလ်ချုပ်ကြီးမောင်မောင်အေးက ကမ်းခြေစောင့်တပ်ဖွဲ့မှ အရာရှိ၊ စစ်သည်များအားနှုတ်ဆက်အားပေးစကားပြောကြားပြီး ကမ်းခြေစောင့်တပ်ဖွဲ့ ကွပ်ကဲမှုဌာနချုပ်အထိမ်းအမှတ်ပြခန်းအတွင်း ခင်းကျင်းပြသထားရှိမှုများနှင့် ကမ်းခြေစောင့်တပ်ဖွဲ့ဆိပ်ခံဘောတံတားတွင် ဆိုက်ကပ်ထားသည့် ကမ်းခြေစောင့် တပ်ဖွဲ့ရေယာဉ်တို့အား ကြည့်ရှုစစ်ဆေးခဲ့သည်။