လုံခြုံရေးအဖွဲ့ဝင်များသည် နိုဝင်ဘာ ၂၄ ရက်၊ ၂၅ ရက်နှင့် ၂၆ ရက်တို့က ရှမ်းပြည်နယ် (တောင်ပိုင်း) ၊ ကျေးသီးမြို့နယ်၊ မိုင်းနောင်မြို့အနီး၌ အွန်လိုင်းလိမ်လည်လောင်းကစားမှုလုပ်ကိုင်နေသည့် တရုတ်နိုင်ငံသား (၂၆) ဦးနှင့် မြန်မာနိုင်ငံသား (၈) ဦးတို့အား လုပ်ငန်းသုံးပစ္စည်းများ၊ လက်နက်ခဲယမ်းများနှင့်အတူ ဖမ်းဆီးရမိခဲ့ကြောင်း သိရသည်။
ပြီးခဲ့သည့် နိုဝင်ဘာ ၂၄ ရက်က လုံခြုံရေးအဖွဲ့ဝင်များသည် မိုင်းနောင်မြို့၊ နောင်တောက်ကျေးရွာ၏ အနောက်မြောက်ဘက်နေရာတစ်ဝိုက်တွင် အွန်လိုင်းလိမ်လည်မှုနှင့် လောင်းကစားမှုများလုပ်ဆောင်နေသည့် အ ဆောက်အအုံများနှင့် လုပ်ငန်းသုံးပစ္စည်းများဖြစ်သည့် ပလပ်စတစ်ထိုင်ခုံ (၁၅ဝ) လုံး၊ မှန်တင်ခုံကြီး (၁) လုံး၊ သစ်သားခုံ (၅) ခုံ၊ မော်နီတာ (၂) လုံးနှင့် STARLINK (၁) လုံးတို့ကိုသိမ်းဆည်းရမိခဲ့ကြောင်း သိရသည်။
ထို့ပြင် နိုဝင်ဘာ ၂၅ ရက်တွင်လည်း မိုင်းနောင်မြို့၊ ကောင်းဟိုင်းကျေးရွာအနီး၌ အွန်လိုင်းလိမ်လည်လောင်းကစားမှုများလုပ်ကိုင်ခဲ့သည့် အဆောက်အအုံများနှင့် လုပ်ငန်းသုံးပစ္စည်းများဖြစ်သော မီးစက် (၃) လုံး၊ ရေခဲသေတ္တာအသေး (၁) လုံး၊ FREEZER (၁) လုံး၊ AIR COOLER (၅) လုံးနှင့် လန်ခရူဇာကား (၁) စီးတို့ကို ထပ်မံသိမ်းဆည်းရမိခဲ့ကြောင်း သိရသည်။
ထို့အတူ နိုဝင်ဘာ ၂၆ ရက်၌ မိုင်းနောင်မြို့၊ ဝမ်ကျောင်းကျေးရွာအနီး၌ အွန်လိုင်းလိမ်လည်မှုနှင့် လောင်းကစားလုပ်ငန်းဆောင်ရွက်ရန်ဆောက်လုပ်လျက်ရှိသည့် အဆောက်အအုံများနှင့် ဂါလံ (၈၀၀) ဆံ့ တိုင်ကီအပြာ (၄) လုံး၊ နောင်တောက်ကျေးရွာ၏ တောင်ဘက်နေရာတစ်ဝိုက်တွင် အွန်လိုင်းလိမ်လည် လောင်းကစားမှုများလုပ်ကိုင်သူများဖြစ်သည့် တရုတ်နိုင်ငံသား (၂၆) ဦးနှင့် မြန်မာနိုင်ငံသား (၈) ဦးတို့ကို ဖမ်းဆီးသိမ်းဆည်းရမိခဲ့ကြောင်း သိရသည်။
စစ်ဆေးချက်များအရ ယင်းကျေးရွာအနီးတွင်သိုဝှက်သိမ်းဆည်းထားသည့် MA-1 သေနတ် (၁) လက်၊ MA-13 သေနတ် (၁) လက်၊ AK-12 သေနတ် (၁) လက်၊ ကာဘိုင် သေနတ် (၁) လက်၊ WICHESTER 12 V သေနတ် (၁) လက်၊ ၉ မမကျည် (၁ဝ) တောင့်၊ 12 V ကျည် (၂) တောင့်၊ ၉ မမကျည်အိမ် (၁) ခု၊ AK ကျည်အိမ် (၁) ခုနှင့် ကာဘိုင်ကျည်အိမ် (၁) ခုတို့ကိုသိမ်းဆည်းရမိခဲ့ကြောင်း သိရသည်။
ထို့ကြောင့် လုံခြုံရေးအဖွဲ့ဝင်များက သိမ်းဆည်းရမိခဲ့သည့် လုပ်ငန်းသုံးပစ္စည်းများနှင့် အဆောက်အအုံများကိုမီးရှို့ဖျ-က်စီးပြီး ဖမ်းဆီးရမိသူများနှင့် ပါဝင်ပတ်သက်သူများအားစိစစ်ဖော်ထုတ်လျက်ရှိကာ တရုတ်နိုင်ငံသားများကိုလည်း လူသားချင်းစာနာထောက်ထားမှုနှင့် နိုင်ငံအချင်းချင်းချစ်ကြည်ရင်းနှီးမှုတို့ကိုရှေးရှု၍ သက်ဆိုင်ရာနိုင်ငံများသို့ ပြန်လည်လွှဲပြောင်းပေးနိုင်ရန်ဆောက်ရွက်လျက်ရှိပြီး လက်နက်ခဲယမ်းများကိုလည်း လုပ်ထုံးလုပ်နည်းနှင့်အညီ ဆက်လက်ဆောင်ရွက်လျက်ရှိကြောင်း သိရသည်။