ဘောလုံးသမိုင်းတစ်လျှောက် အကြီးမားဆုံးနှင့် စိတ်လှုပ်ရှားစရာအကောင်းဆုံး ဖြစ်လာမည့် ၂၀၂၆ ဖီဖာကမ္ဘာ့ဖလား (FIFA World Cup 2026) ပြိုင်ပွဲကြီးကို ဇွန်လ (၁၁) ရက်နေ့က မက္ကဆီကိုနိုင်ငံ၊ မက္ကဆီကိုစီးတီးမြို့ရှိ နာမည်ကျော် Estadio Azteca အားကစားကွင်းကြီးတွင် ပရိသတ် (၈) သောင်းကျော်ရှေ့မှောက်၌ တခမ်းတနား စတင်ဖွင့်လှစ်လိုက်ပြီ ဖြစ်သည်။
ယခုနှစ် ကမ္ဘာ့ဖလားပြိုင်ပွဲသည် ပြိုင်ပွဲသမိုင်းတစ်လျှောက် ပထမဆုံးအကြိမ်အဖြစ် အမေရိကန်၊ ကနေဒါနှင့် မက္ကဆီကို (၃) နိုင်ငံ ပူးတွဲအိမ်ရှင်အဖြစ် လက်ခံကျင်းပခြင်းဖြစ်ပြီး ပြိုင်ပွဲဝင်အသင်းပေါင်းကိုလည်း (၄၈) သင်းအထိ တိုးချဲ့ကျင်းပသည့် ထူးခြားသော နှစ်တစ်နှစ် ဖြစ်သည်။
ဖွင့်ပွဲအခမ်းအနားတွင် ကမ္ဘာကျော်အဆိုတော်များဖြစ်ကြသည့် Shakira နှင့် Burna Boy တို့က ၂၀၂၆ ကမ္ဘာ့ဖလား တရားဝင်သီချင်းဖြစ်သော “Dai Dai” ဖြင့် အားပါးတရ သီဆိုဖျော်ဖြေခဲ့ကြသလို မက္ကဆီကိုနိုင်ငံ၏ စွဲမက်ဖွယ် ရိုးရာယဉ်ကျေးမှု အကအလှများ၊ ရောင်စုံအစီအစဉ်များဖြင့် ကမ္ဘာ့ဘောလုံးပရိသတ်များကို ဆွဲဆောင်ခဲ့သည်။
ပြိုင်ပွဲ၌ အသင်း (၄၈) သင်းကို အုပ်စု (၁၂ )စု ခွဲခြားထားကာ ပြိုင်ပွဲတစ်ခုလုံးတွင် ပွဲစဉ်ပေါင်း (၁၀၄) ပွဲအထိ ကျင်းပမည်ဖြစ်ကြောင်း သိရသည်။
အုပ်စုတစ်ခုစီမှ ထိပ်ဆုံး (၂)သင်းနှင့် တတိယနေရာရအသင်းများထဲမှ အကောင်းဆုံး (၈) သင်းတို့သည် (၃၂) သင်း ရှုံးထွက်အဆင့်သို့ တက်ရောက်ခွင့်ရရှိမည်ဖြစ်သည်။
ဖီဖာ (FIFA) ၏ ပြောကြားချက်အရ ယခုပုံစံသစ်သည် ကမ္ဘာ့နိုင်ငံအသီးသီးမှ အသင်းများကို ကမ္ဘာ့ဖလားစင်မြင့်ထက်တွင် ပိုမိုပါဝင်ယှဉ်ပြိုင်ခွင့်ရရှိစေရန် ရည်ရွယ်ခြင်းဖြစ်ကြောင်း သိရသည်။
မက္ကဆီကိုတွင် ပထမဆုံးဖွင့်ပွဲကို စတင်ခဲ့သော်လည်း ကျန်အိမ်ရှင်နိုင်ငံများတွင်လည်း သီးခြားဖွင့်ပွဲအခမ်းအနားများ ဆက်လက်ကျင်းပသွားမည်ဖြစ်ပြီးဇွန်လ (၁၂) ရက်နေ့တွင် ကနေဒါနိုင်ငံ တိုရွန်တိုမြို့နှင့် အမေရိကန်နိုင်ငံ လော့စ်အိန်ဂျလိစ်မြို့တို့၌ ဖွင့်ပွဲအခမ်းအနားများကို အသီးသီး ထပ်မံကျင်းပရန် စီစဉ်ထား သည်။
ယခု ၂၀၂၆ ကမ္ဘာ့ဖလားပြိုင်ပွဲကြီးကို ဇွန်လ (၁၁) ရက်နေ့မှ ဇူလိုင်လ (၁၉)ရက်နေ့အထိ အိမ်ရှင် (၃) နိုင်ငံရှိ မြို့ကြီး (၁၆) မြို့တွင် တစ်လကျော်ကြာ ကျင်းပသွားမည်ဖြစ်ကာ၊ အောင်ပွဲခံမည့် ကမ္ဘာ့ချန်ပီယံအသစ်ကိုရွေးချယ်မည့် ဗိုလ်လုပွဲကြီးကိုမူ ဇူလိုင်လ (၁၉) ရက်နေ့တွင် အမေရိကန်နိုင်ငံ၊ နယူးယောက်မြို့အနီးရှိ MetLife Stadium ကွင်းကြီး၌ ကျင်းပသွားမည်ဖြစ်ကြောင်း သိရှိရသည်။