ဒေါ်နယ်ထရမ့်သည် ၂၀၂၄ ခုနှစ် အမေရိကန်သမ္မတ ရွေးကောက်ပွဲအတွက် မဲဆွယ်စည်းရုံးရေးကို အရှိန်မြှင့်ရန် ကြိုးပမ်းလာသောကြောင့် မက်တာအား သူ၏ ဖေ့ဘွတ်ခ်အကောင့်ကို ပြန်လည်အသုံးပြုခွင့်ပေးရန် တိုက်တွန်းခဲ့ကြောင်း သည်ဂါးဒီယန်း သတင်းစာ က ဖော်ပြထားသည်။
၂၀၂၀ ပြည့်နှစ် သမ္မတရွေးကောက်ပွဲတွင် ထရမ့်၏ ထောက်ခံသူအချို့က ဂျိုးဘိုင်ဒင်၏ အနိုင်ရရှိမှုအား တရားဝင် ထုတ်ပြန်ခြင်းကို တားဆီးရန်အတွက် အမေရိကန် ကွန်ဂရက်လွှတ်တော် အဆောက်အအုံကို တိုက်ခိုက်ခဲ့သောကြောင့် သမ္မတဟောင်းသည် လွန်ခဲ့သည့် ၂ နှစ်ကျော်ကတည်းက ဖေ့ဘွတ်ခ်၏ ပိတ်ပင်ခြင်းကို ခံခဲ့ရသည်။
ဇန်နဝါရီလ ၁၈ ရက် ဗုဒ္ဓဟူးနေ့တွင် မက်တာသို့ ပေးပို့ခဲ့သောစာ၌ ထရမ့်၏ အကြံပေးက ထိုသို့ ဖေ့ဘွတ်ခ်အကောင့် ပိတ်ပင်ထားခြင်းသည် ပြည်သူလူထုအား အကျယ်တဝင့် ဟောပြောမဲဆွယ်ရာတွင် သိသိသာသာ အဟန့်အတား ဖြစ်စေသောကြောင့် ပြန်လည်ရုပ်သိမ်းပေးသင့်ကြောင်း ပြောခဲ့သည်ဟု အင်န်ဘီစီ နူးစ် သတင်းဌာနက ဖော်ပြထားသည်။
မက်တာက လာမည့်အပတ်များအတွင်း ဆုံးဖြတ်ချက်ကို ကြေညာသွားမည်ဟု ထုတ်ပြန်ခဲ့သည်။
ထရမ့်ကို မကြာသေးမီကမှ တွစ်တာက အကောင့်ပြန်လည်ဖွင့်ပေးထားပြီး တွစ်တာပေါ်တွင် ဖော်လိုဝါပေါင်း ၈၈ သန်းခန့်ရှိကာ ဖေ့ဘွတ်ခ်ပေါ်တွင် ဖော်လိုဝါပေါင်း ၃၄ သန်းခန့် ရရှိထားသူ ဖြစ်သည်။
Source:WION