မြန်မာနိုင်ငံ၌ ၂၀၂၄ ခုနှစ်၊ အောက်တိုဘာ ၁ ရက်မှ ၁၅ ရက်အထိ ပြည်လုံးကျွတ်လူဦးရေနှင့် အိမ်အကြောင်းအရာ သန်းခေါင်စာရင်းကောက်ယူမည်ဖြစ်ကြောင်း ဗဟိုသန်းခေါင်စာရင်းကော်မရှင် နာယက နစက ဒု-ဥက္ကဋ္ဌ၊ ဒု-ဗိုချုပ်မှူးကြီးစိုးဝင်းက ပြောကြားခဲ့သည်။
ဇူလိုင်လ ၁၁ ရက်၊ နံနက် ၉ နာရီခွဲက နေပြည်တော်ရှိ မြန်မာအပြည်ပြည်ဆိုင်ရာကွန်ဗန်းရှင်းဗဟိုဌာန-၂ တွင် ကျင်းပခဲ့သည့် ၂၀၂၃ ခုနှစ် ကမ္ဘာ့လူဦးရေနေ့ အထိမ်းအမှတ်အခမ်းအနားတွင် အမှာစကားပြောကြားရာ၌ ထည့်သွင်းပြောကြားခဲ့ခြင်းဖြစ်သည်။
မြန်မာနိုင်ငံတွင် လက်ရှိကြုံတွေ့နေရသည့် အခက်အခဲအကျပ်အတည်းနှင့် စိန်ခေါ်မှုများကို ကြံ့ကြံ့ခံရင်ဆိုင်ကာ လူဦးရေဆိုင်ရာ ပြောင်းလဲလာမှုများမှ အခွင့်အလမ်းများအဖြစ် ပြောင်းလဲရယူရမည်ဟု ပြောကြားသည်။
ထို့ကြောင့် မြန်မာနိုင်ငံတွင် လူဦးရေဆိုင်ရာပြောင်းလဲမှုမှ အခွင့်အလမ်းများရယူနိုင်ရန် ၁၀ နှစ်တစ်ကြိမ် မဖြစ်မနေဆောင်ရွက်သည့် ပြည်လုံးကျွတ်သန်းခေါင်စာရင်းကောက်ယူရေးအကြို စမ်းသပ်ဆောင်ရွက်ချက်အဖြစ် ၂၀၂၃ ခုနှစ် အောက်တိုဘာလတွင် စမ်းသပ်သန်းခေါင်စာရင်း ကောက်ယူမည်ဖြစ်ပြီး ၂၀၂၄ ခုနှစ် အောက်တိုဘာလ ၁ ရက်မှ ၁၅ ရက်အထိ ပြည်လုံးကျွတ်လူဦးရေနှင့်အိမ်အကြောင်းအရာသန်းခေါင်စာရင်းကောက်ယူသွားမည်ဖြစ်ကြောင်း ပြောကြားသည်။
“အရေးကြီးတဲ့ လူဦးရေအချက်အလက်တွေနဲ့ မှန်ကန်တဲ့ ကိန်းဂဏန်းတွေ ရရှိမှသာ နိုင်ငံရဲ့ဘက်စုံ၊ ကဏ္ဍစုံဖွံ့ဖြိုးတိုးတက်မှုအတွက် အခွင့်အလမ်းတွေပေါ်ထွက်ရရှိလာမှာဖြစ်သလို စစ်မှန်စည်းကမ်းပြည့်ဝတဲ့ ပါတီစုံဒီမိုကရေစီဖြစ်ပေါ်လာစေရေး၊ ဒီမိုကရေစီနှင့် ဖက်ဒရယ်စနစ်ကို အခြေခံတဲ့ ပြည်ထောင်စု ဖြစ်ပေါ်လာစေဖို့အတွက် ကောင်းမွန်တဲ့ အနာဂတ်တည်ဆောက်နိုင်ရေးကို ဦးတည်ဆောင်ရွက်နိုင်မှာဖြစ်ပါတယ်”ဟု နစက ဒု-ဥက္ကဋ္ဌကပြောကြားသည်။
ထို့ကြောင့် ကမ္ဘာ့အဆင့်မီစွာ မြန်မာနိုင်ငံ၏ လူဦးရေနှင့်ကိန်းဂဏန်းအချက်အလက်များရရှိရန် ၂၀၂၃ ခုနှစ် စမ်းသပ်သန်းခေါင်စာရင်းနှင့် ၂၀၂၄ ခုနှစ် လူဦးရေနှင့်အိမ်အကြောင်းအရာသန်းခေါင်စာရင်းကောက်ယူရေးလုပ်ငန်းစဉ်များကို ဝိုင်းဝန်းကူညီဆောင်ရွက်ကြရမည်ဖြစ်ကြောင်း မှာကြားခဲ့သည်။
