ယခုနှစ် စက်တင်ဘာလတွင် ကုန်ဆုံးမည့် ဘဏ္ဍာနှစ်တွင် မြန်မာနိုင်ငံ၏ ပြည်တွင်းအသားတင် ထုတ်လုပ်မှုတန်ဖိုး GDP သည် (၃) ရာခိုင်နှုန်းခန့် တိုးတက်မှုရှိလာနိုင်ကြောင်း ကမ္ဘာ့ဘဏ်က ခန့်မှန်းထားသည်။
ကမ္ဘာ့ဘဏ်၏ မြန်မာ့စီးပွားရေး စောင့်ကြည့်အစီရင်ခံစာတွင် ၂၀၁၉ ခုနှစ်ကထက် တစ်ဦးချင်း GDP သည် (၁၃) ရာခိုင်နှုန်း နိမ့်ကျနေဆဲ ဖြစ်မည်ဟု ယှဉ်ပြထားသည်။ ကမ္ဘာ့ဘဏ်၏ အစီရင်ခံစာအရ မြန်မာ့စီးပွားရေးသည် သိသာထင်ရှားသည့် မတည်ငြိမ်မှုတွေနှင့် မသေချာမရေရာမှုတွေ ရှိနေပြီး လျှပ်စစ်မီးပြတ်တောက်မှု၊ ကုန်သွယ်ရေးနှင့် နိုင်ငံခြားငွေလဲလှယ်မှုကန့်သတ်ချက်များ၊ အဓိကသွင်းအားစုအချို့ပြတ်တောက်မှုနှင့် မကြာခဏပြောင်းလဲနေသည့်စည်းမျဉ်း၊ စည်းကမ်းတွေကြောင့် စီးပွားရေးလုပ်ငန်းများ ရပ်နားခဲ့ရကြောင်း ဖော်ပြထားသည်။
ကမ္ဘာ့ကုန်စည်ဈေးနှုန်းများ လျော့ကျလာခြင်းကြောင့် နှစ်အလိုက်ငွေကြေးဖောင်းပွမှုနှုန်းသည် ၂၀၂၂ ဘဏ္ဍာနှစ်တွင် ၁၆ ဒသမ ၅ ရာခိုင်နှုန်းရှိခဲ့ရာမှ ၂၀၂၃ ဘဏ္ဍာနှစ် စက်တင်ဘာလတွင် ငွေကြေး ဖောင်းပွမှုနှုန်းသည် ၇ ရာခိုင်နှုန်းအထိ လျော့ကျလာနိုင်သည်ဟု ကမ္ဘာ့ဘဏ်က ခန့်မှန်းထားသည်။
ပြီးခဲ့သည့် ဇူလိုင်လကတည်းက ထုတ်လုပ်မှုနှင့် အမှာစာအသစ်များလျော့နည်းသွားခဲ့ပြီး၊ ရင်းနှီးမြှုပ်နှံမှုအပိုင်းတွင်လည်း ပြည်တွင်းရင်းနှီးမြှုပ်နှံမှုသာ တက်လာကာ နိုင်ငံခြားမှရင်းနှီးမြုပ်နှံ FDI စီးဝင်မှုမှာ အားနည်းနေဆဲ ဖြစ်သည်။
လာမည့်ဘဏ္ဍာနှစ်တွင် ငွေကြေး ဖောင်းပွမှုဖိအားများ လျော့ပါးသွားခြင်းကြောင့် ဝန်ဆောင်မှုကဏ္ဍ အလယ်အလတ် တိုးတက်မည်ဟု ခန့်မှန်းထားပြီး နိုင်ငံတကာခရီးသွားလုပ်ငန်း တိုးတက်မှုအနည်းငယ် ရှိလာနိုင်ကြောင်း ကမ္ဘာ့ဘဏ်က ခန့်မှန်းထားသည်။
ကမ္ဘာ့ဘဏ်၏အစီရင်ခံစာအနှစ်ချုပ်ကို ဖေဖော်ဝါရီ ၃ရက်နေ့က UMFCCI တွင် ဖတ်ကြားရှင်းလင်းပြီးနောက် ကုန်သည်ကြီးများနှင့်အပြန်အလှန်ဆွေးနွေးကြရာတွင် လယ်ယာစိုက်ပျိုးရေးကဏ္ဍတွင် ချေးငွေရရှိခြင်းနှင့် ဓါတ်မြေသြဇာစျေးကျခြင်းက လာမည့်မိုးရာသီအခွင့်အလမ်းကောင်းများ၊ သွင်းကုန်အစားထိုးအလေ့အထကောင်းများပေါ်ထွက်လာခြင်း၊လက်လီကဏ္ဍ နှင့်ပတ်သက်၍ နည်းလမ်းများစွာကိုချိန်ညှိခြင်းက သော့ချက်ဖြစ်ခြင်း၊လျှပ်စစ်ရရှိရေးက အခက်ခဲတစ်ခုဖြစ်နေ၍ အစားထိုးနိုင်မည့်အခြားသော ပြန်လည်ပြည့်ဖြိုးမြဲစွမ်းအင်ရရှိရေး၊ငွေကြေးလဲလှယ်မှုနှုန်းများ၏ အတက်အကျ ၊ကျွမ်းကျင်လုပ်သားရှားပါးမှု၊လိုင်စင်အခက်ခဲများ၊တိုးတက်ရန်လိုအပ်နေသည့်စီမံခန့်ခွဲမှုယန္တယားများအတွက် အဖြေရှာ ဆွေးနွေးခဲ့ကြသည်။