ယနေ့ ဒီဇင်ဘာ (၁၂)ရက်တွင် ဖိလစ်နိုင်ငံက အိမ်ရှင်အဖြစ်လက်ခံကျင်းပသည့် ဖိလစ်ပိုင်-မြန်မာ အာဆီယံမစ်ဆူဘီရှီဖလား ပွဲစဉ်တွင် မောင်မောင်လွင်၏ ဦးဆောင်ဂိုးဖြင့် မြန်မာအသင်းက ပထမပိုင်းပွဲချိန်အတွင်း အသာစီးကစားခဲ့ရသော်လည်း ဒုတိယပိုင်းပွဲပြီးခါနီးတွင် ခြေပဂိုးပေးရပြီး သရေရလဒ်ဖြင့်သာ ကျေနပ်ခဲ့ရသည်။
မြန်မာအသင်းအနေဖြင့် ပထမပိုင်းပွဲစဉ် (၂၅) မိနစ်အချိန်၌ ပင် မောင်မောင်လွင်၏ ဖရီးကစ်ဖြင့် အဖွင့်ဂိုး ရရှိခဲ့ပြီး ဒုတိယပိုင်း ပွဲချိန် မိနစ် (၆၀) ကျော်တွင် ရဲရင့်အောင်၏ သွင်းဂိုးကို ကွင်းလယ်ဒိုင်က လူကျွံဘောသတ်မှတ်ခဲ့သည့်အတွက် အနိုင်ဂိုး (၁) ဂိုး နစ်နာခဲ့ရသည်။
ထို့နောက် ဒုတိယပိုင်း ပွဲချိန် (၇၂) မိနစ်တွင် ဖိလစ်ပိုင်အသင်းက ပင်နယ်တီမှ တဆင့် ချေပဂိုး ပြန်လည်သွင်းယူခဲ့ရာမှ ပွဲပြီးချိန်တွင် တစ်ဖက်(၁)ဂိုးစီဖြင့် သရေရလဒ် ထွက်ပေါ်ခဲ့ခြင်း ဖြစ်သည်။
ဖိလစ်ပိုင်-မြန်မာ ပွဲစဥ်အား ကွင်းလယ်ဒိုင်အဖြစ် Kim Dae Yong (တောင်ကိုရီးယား) က တာဝန်ယူ ဆောင်ရွက်ခဲ့ခြင်းလည်းဖြစ်သည်။
မြန်မာအသင်း ယနေ့ ပွဲထွက်ကစားသမားစာရင်းတွင် ဟိန်းဖြိုးဝင်း၊ သက်ဟိန်းစိုး၊ နန္ဒကျော်၊ လွင်မိုးအောင်၊ သီဟဇော်၊ မောင်မောင်လွင်၊ ဝေလင်းအောင် ၊ အောင်ကောင်းမာန်၊ သီဟထက်အောင်၊ ဇော်ဝင်းသိန်းနှင့် ဂိုးသမားအဖြစ် ဇင်ညီညီအောင်တို့ ဝင်ရောက်ကစားခဲ့ကြပြီး ယနေ့ပွဲစဉ်၌ သီဟဇော်က အသင်းခေါင်းဆောင်အဖြစ် တာဝန်ယူ ယှဉ်ပြိုင်ခဲ့ကြခြင်း ဖြစ်သည်။