အွန်လိုင်းငွေလိမ်လုပ်ငန်းနှင့် ဆက်စပ်သောပိုင်ဆိုင်မှု ဒေါ်လာသန်း ၃၀၀ ကျော်ကို သိမ်းဆည်းကာ လူ ၄၂ ဦးကို ဖမ်းဝရမ်းထုတ်

ထိုင်းနိုင်ငံသည် ဒေသတွင်း အလိမ်အညာကွန်ရက်များကို ပြင်းထန်စွာနှိမ်နင်းနေရာ ဒေသတွင်း အဓိကစွမ်းအင်ကုမ္ပဏီတစ်ခု၏ ရှယ်ယာများအပါအဝင် အမေရိကန်ဒေါ်လာသန်း ၃၀၀ ကျော်တန်ဖိုးရှိသော ပိုင်ဆိုင်မှုများကို သိမ်းဆည်းခဲ့ပြီး လူ ၄၂ ဦးကို ဖမ်းဝရမ်းများထုတ်ခဲ့ကြောင်း အရာရှိများက ဗုဒ္ဓဟူးနေ့တွင် ပြောကြားခဲ့သည်။
           
သိမ်းဆည်းမှုများနှင့် ဖမ်းဝရမ်းများတွင် အမေရိက၏ ဒ-ဏ်ခတ်ပိတ်ဆို့ခံထားရသော Prince Group ကို ဦးဆောင်သည့် တရုတ်-ကမ္ဘောဒီးယား သူဌေးကြီး ချန်ရှီနှင့်နိုင်ငံဖြတ်ကျော် အွန်လိုင်းငွေလိမ်လုပ်ငန်းများနှင့် ဆက်စပ်နေကြောင်း အာဏာပိုင်များက ပြောကြားထားသည့် ကမ္ဘောဒီးယားနိုင်ငံသားများဖြစ်သော ကော့ခ်အန်နှင့် ယင်လိခ်တို့ ပါဝင်ခဲ့သည်။
        
ယခုကိစ္စနှင့် ပတ်သက်၍ မေးမြန်းသောအခါ Prince Group က လတ်တလောတွင် တုန့်ပြန်ဖြေကြားခြင်းမရှိသကဲ့သို့ အမေရိက၏ တရားစွဲဆိုခြင်းကိုလည်း ခံထားရသော ချန်ကိုလည်း ဆက်သွယ်၍ မရခဲ့ပေ။ ပြီးခဲ့သည့်လအတွင်းက Prince Group က ပြောကြားရာတွင်မူ ကုမ္ပဏီသည်လည်းကောင်း၊ ချန်သည်လည်းကောင်း တရားမဝင်လုပ်ငန်းများတွင် ဆက်စပ်ပတ်သက်ခြင်းမရှိဟု ငြင်ဆိုခဲ့သည်။
          
အမေရိကန်ဒေါ်လာ ၃၁၈ သန်းတန်ဖိုးရှိ ပိုင်ဆိုင်မှုများကို မိမိတို့ သိမ်ဆည်းခဲ့ပြီး လူပုဂ္ဂိုလ် ၄၂ ဦးကို ရာဇဝတ်တရားရုံးက ဖမ်းဝရမ်းထုတ်ခဲ့သည်ဟု ထိုင်းဗဟိုစုံစမ်းစစ်ဆေးရေးဗျူရို ဒုတိယကော်မရှင်နာ မင်းကြီးဆော့ဖွန်း ဆာရာဖတ်က သတင်းစာရှင်းလင်းပွဲတွင် ပြောကြားခဲ့သည်။
       
“မနေ့ကအထိ လူ ၂၉ ဦးကို ဖမ်းဆီးထားပါတယ်” ဟု သူကဆိုသည်။
      
သိမ်းဆည်းခဲ့သည့် ပိုင်ဆိုင်မှုများထဲမှ အချို့သည် Prince Group အကြီးအကဲ ချန်နှင့် ပတ်သက်နေသည်။ စုံစမ်းစစ်ဆေးသူများသည် ချန်နှင့် ၎င်း၏ အပေါင်းအပါများနှင့် ဆက်စပ်နေသော အွန်လိုင်းလိမ်လည်မှု၊ လူကုန်ကူးမှုနှင့် ငွေကြေးခဝါချမှုကွန်ရက်များဆိုင်ရာ အချက်အလက်များကို တွေ့ရှိခဲ့သည်ဟု ထိုင်းနိုင်ငံ ငွေကြေးခဝါချမှု တို-က်ဖျ-က်ရေးရုံး၏ သတင်းထုတ်ပြန်ချက်တွင် ဖေါ်ပြထားသည်။ နောက်ထပ်အသေးစိတ်အချက်အလက်များကိုမူ ၎င်းတို့က မပေးခဲ့ပေ။
        
ချန် တစ်ယောက် မည်သည့်နေရာတွင် ရှိနေသည်ကို မသိရသကဲ့သို့ ဝရမ်းထုတ်ခံရသူများထဲတွင် ၎င်းပါဝင်သည်၊ မပါဝင်ပါ ဆိုသည်ကိုလည်း လတ်တလောတွင် ရှင်းလင်းစွာ မသိရသေးပေ။

Ref: ချိုင်းနားဒေးလီး