ပြည်သူအားလုံး အွန်လိုင်းမှတဆင့်လွယ်ကူစွာထီကံစမ်းနိုင်ရန် အွန်လိုင်းထီစနစ်ကို စတင်လုပ်ဆောင်ရခြင်းနှင့်ပတ်သက်၍ နစက ဥက္ကဋ္ဌမှ ဇွန် ၈ ရက်နံနက်ပိုင်းက နေပြည်တော်ရှိ MICC-2 ၌ကျင်းပသည့် အောင်ဘာလေအွန်လိုင်းသိန်းဆုထီစနစ်စတင်ခြင်းဖွင့်ပွဲအခမ်းအနားတွင် ပြောကြားခဲ့ခြင်းဖြစ်သည်။
လက်ရှိ အောင်ဘာလေသိန်းဆုထီလက်မှတ်များအား ပုံနှိပ်ဖြန့်ဖြူးရောင်းချသည့်စနစ်အပြင် ပြည်သူအားလုံး အွန်လိုင်းမှတစ်ဆင့် လွယ်ကူစွာထီကံစမ်းနိုင်ရန် ရည်ရွယ်ချက်ဖြင့် အွန်လိုင်းထီစနစ်ကို စတင်လုပ်ဆောင်ရခြင်းဖြစ်သည်ဟု ဆိုသည်။
နိုင်ငံတကာတွင် ခေတ်မီဆန်းသစ်သည့် Digital နည်းပညာများဖြင့်လုပ်ကိုင်လာချိန်တွင် မြန်မာနိုင်ငံ၌လည်း အွန်လိုင်းထီစနစ်ကို အကောင်အထည်ဖော်ခြင်းဖြင့် ထီကံစမ်းသူများ အလွယ်တကူစိတ်ကြိုက်နံပါတ်များရွေးချယ်ဝယ်ယူနိုင်မည်ဖြစ်ကာ မြို့ပြနှင့်ကျေးလက်နေပြည်သူများအားလုံး အဆင်ပြေလွယ်ကူစွာ ထီကံစမ်းနိုင်မည်ဟု ဆိုသည်။
အောင်ဘာလေအွန်လိုင်းသိန်းဆုထီ အက်ပလီကေးရှင်းကိုအသုံးပြု၍ ကံစမ်းသူများအနေဖြင့် ထီလက်မှတ်ဝယ်ယူခြင်း၊ထီဖိုးငွေပေးချေခြင်းမှစ၍ ဆုငွေရယူခြင်းအဆင့်အထိ ရိုးရှင်းလွယ်ကူစွာဆောင်ရွက်နိုင်မည်ဖြစ်ကာ ထီဖွင့်ပွဲကျင်းပချိန်တွင်လည်း ထီတိုက်ရန်မလိုဘဲ ကံထူးသူများ၏ မိုဘိုင်းတယ်လီဖုန်းများကို SMS ပေးပို့အကြောင်းကြားသွားမည်ဟု ဆိုသည်။
“ထီဆုငွေထုတ်ယူရာမှာလည်း မှန်ကန်လွယ်ကူစေဖို့ ပမာဏနည်းတဲ့ဆုကြေးငွေတွေကို အွန်လိုင်းကလွှဲပြောင်းပေးတာ၊ထီကံထူးသူတွေရဲ့ ဘဏ်ငွေစာရင်းအကောင့်ဆီပေးပို့တာတွေကို အီလက်ထရောနစ်နည်းလမ်းနဲ့ ဆောင်ရွက်သွားမှာဖြစ်ပါတယ်”ဟု နစက ဥက္ကဋ္ဌကပြောသည်။
အောင်ဘာလေအွန်လိုင်းသိန်းဆုထီ အက်ပလီကေးရှင်းအားစတင်နိုင်ခြင်းသည် ဒီဂျစ်တယ်နည်းပညာနှင့်မိုဘိုင်းငွေပေးချေမှုစနစ်များ အသုံး ပြုပြီး လွယ်ကူစွာထီကံစမ်းနိုင်သည့် Digital Lottery Platform စနစ်သစ်ကို စတင်မိတ်ဆက်အသုံးပြုနိုင်ခြင်းပင်ဖြစ်သည်ဟု ဆိုသည်။
“အကျိုးဆက်အနေနဲ့ အနာဂတ်မှာ နိုင်ငံတော်အခွန်ဘဏ္ဍာရရှိမှုတိုးတက်စေဖို့၊ နိုင်ငံတော်ရဲ့ ဒီဂျစ်တယ်စီးပွားရေးအခြေခံအဆောက်အအုံဖွံ့ဖြိုးတိုးတက်စေဖို့၊ငွေသားကိုင်တွယ်သုံးစွဲမှုလျော့ချစေဖို့စတဲ့ ကောင်းကျိုးများစွာကို အထောက်အပံ့ဖြစ်စေနိုင်မှာဖြစ်ပါတယ်”ဟု နစက ဥက္ကဋ္ဌကပြောသည်။
အောင်ဘာလေအွန်လိုင်းသိန်းဆုထီစနစ်အား စီမံကိန်းနှင့်ဘဏ္ဍာရေးဝန်ကြီးဌာန၏ ဦးဆောင်မှုနှင့်အတူ သက်ဆိုင်ရာဝန်ကြီးဌာနများ၊ဦးစီးဌာနများနှင့် Telecom International Myanmar Co., Ltd တို့မှ ပူးပေါင်းအကောင်အထည်ဖော်ဆောင်ရွက်ထားခြင်းဖြစ်သည်ဟု ဆိုသည်။
စနစ်သစ်တစ်ခုအား ပြောင်းလဲဖော်ဆောင်ရာတွင် နိုင်ငံတော်ကိုကိုယ်စားပြုဆောင်ရွက်ရ၍ အလွန်တာဝန်ကြီးမားလှကာ နိုင်ငံတော်အတွက် အသစ်စတင်မိတ်ဆက်နိုင်ခဲ့သော ပြည်သူ့အကျိုးပြုလုပ်ငန်းဖြစ်သည့် အောင်ဘာလေအွန်လိုင်း သိန်းဆုထီစနစ်ကို တစ်ဆင့်ပြီးတစ်ဆင့် တိုးတက်အောင်မြင်အောင် ကြိုးပမ်းဆောင်ရွက်ရမည်ဟု နစက ဥက္ကဋ္ဌကမှာကြားခဲ့သည်။
