အိန္ဒိယ၌ အိုင်ဖုန်း ၁၄ ထုတ်လုပ်သွားရန် အက်ပဲလ် စီစဉ်နေ
အမေရိကန်နည်းပညာကုမ္ပဏီကြီးဖြစ်သည့် အက်ပဲလ်သည် ၎င်း၏ နောက်ဆုံးပေါ်ဖုန်းဖြစ်သည့် အိုင်ဖုန်း ၁၄ ကို တရုတ်နိုင်ငံအစား အိန္ဒိယနိုင်ငံတွင် စတင်ထုတ်လုပ်ရန် စီစဉ်နေကြောင်း ဘလွန်းဘတ် သတင်းဌာနက ဖော်ပြခဲ့သည်။
ဝါရှင်တန်နှင့် ရှီကျင့်ဖျင်အစိုးရတို့၏ ထိပ်တိုက်တွေ့မှုများ၊ တရုတ်နိုင်ငံတစ်ဝန်း၌ကိုဗစ်-၁၉ ကပ်ရောဂါကြောင့် ပိတ်ဆို့မှုများ စသည်တို့ကြောင့် အက်ပဲလ်၏ အိုင်ဖုန်း ၁၄ ထုတ်လုပ်မှုကို နှောင့်နှေးစေခဲ့ပြီးနောက် အဆိုပါဖြစ်ရပ် ထွက်ပေါ်လာခြင်းဖြစ်သည်။
အက်ပဲလ်သည် အိန္ဒိယတွင် အိုင်ဖုန်း ၁၄ ထုတ်လုပ်မှုကို မြှင့်တင်ရန်နှင့် အိုင်ဖုန်းတစ်ခု ထုတ်လုပ်ပြီးနောက် အိုင်ဖုန်းအမျိုးအစားအသစ် ထပ်မံထုတ်လုပ်ရန် ပုံမှန်ကြာလေ့ရှိသည့် ခြောက်လမှ ကိုးလ အချိန်ကာလကိုပါ လျှော့ချရန် ကုန်ပစ္စည်းထောက်ပံ့သူများနှင့် လက်တွဲဆောင်ရွက်နေကြောင်း အဆိုပါ ကိစ္စနှင့်နီးစပ်သူများကို ကိုးကား၍ ဘလွန်းဘတ်က သြဂုတ် ၂၃ ရက် အင်္ဂါနေ့တွင် ဖော်ပြခဲ့သည်။
၎င်း၏ ဖော်ပြချက်အရ အက်ပဲလ်၏ ထိုင်ဝမ်အခြေစိုက် ကုန်ပစ္စည်းထောက်ပံ့သူ ဖော့စ်ကွန်းသည် အိန္ဒိယနိုင်ငံတောင်ပိုင်း ချနိုင်း မြို့အပြင်ဘက်ရှိ ၎င်း၏စက်ရုံတွင် တရုတ်နိုင်ငံမှ ပစ္စည်းများတင်ပို့ခြင်းနှင့် အိုင်ဖုန်း ၁၄ တပ်ဆင်ခြင်းလုပ်ငန်းစဉ်များကို လေ့လာနေကြောင်း သိရသည်။
အိန္ဒိယမှ ပထမဆုံး အိုင်ဖုန်း ၁၄ အက်စ် ထုတ်လုပ်မှုကို အောက်တိုဘာလနှောင်းပိုင်း သို့မဟုတ် နိုဝင်ဘာလတွင် အပြီးသတ်နိုင်ဖွယ်ရှိကြောင်း ဘလွန်းဘတ်က ဖော်ပြထားသည်။
အက်ပဲလ်သည် အဆိုပါ သတင်းနှင့် ပတ်သက်၍ လတ်တလော မှတ်ချက်မေပးသေးပေ။
အက်ပဲလ်သည် တရုတ်နိုင်ငံရှိ အိုင်ဖုန်း ထုတ်လုပ်သည့် စက်ရုံအချို့ကို ကမ္ဘာ့ဒုတိယအကြီးဆုံး စမတ်ဖုန်းဈေးကွက်ဖြစ်သည့် အိန္ဒိယ အပါအဝင် အခြားနိုင်ငံများသို့ ပြောင်းရွှေ့နေပြီး အိုင်ပက် တက်ဘလက်များကိုပါ အိန္ဒိယတွင် ထုတ်လုပ်တပ်ဆင်သွားရန် စီစဉ်လျက်ရှိသည်။
Source: CNA