အိန္ဒိယနိုင်ငံတွင် ကျင်းပသည့် ဗုဒ္ဓဓာတ်တော်မွေတော်အမွေအနှစ်များ ထုတ်ဖော်ပြသသည့်အခမ်းအနားသို့ အိန္ဒိယသမ္မတနိုင်ငံဆိုင်ရာ မြန်မာသံအမတ်ကြီး ဦးဇော်ဦး တက်ရောက်

အိန္ဒိယနိုင်ငံဆိုင်ရာ မြန်မာသံအမတ်ကြီး ဦးဇော်ဦးသည် အိန္ဒိယနိုင်ငံ၊ ယဉ်ကျေးမှုဝန်ကြီးဌာန၏ ဖိတ်ကြားချက်အရ ဇန်နဝါရီ ၃ ရက်နေ့ က နယူးဒေလီမြို့ရှိ Rai Pithora Cultural Complex ခန်းမ၌ ကျင်းပသော The Light and the Lotus: Relics of the Awakened One အမည်ဖြင့် ကျင်းပသည့် ဗုဒ္ဓဓာတ်တော်မွေတော်ယဉ်ကျေးမှုအမွေအနှစ်များ ထုတ်ဖော်ပြသသည့်ပြတိုက်ဖွင့်ပွဲ အခမ်းအနားသို့ တက်ရောက်ခဲ့ကြောင်း သိရသည်။

အဆိုပါ အခမ်းအနားသို့ အဓိကဧည့်သည်တော်အဖြစ် အိန္ဒိယနိုင်ငံဝန်ကြီးချုပ် H.E. Mr. Shri Narendar Modi က တက်ရောက်၍ အမှာစကားပြောကြားခဲ့ခြင်းလည်းဖြစ်သည်။

ထို့ပြင် အိန္ဒိယနိုင်ငံ၊ ယဉ်ကျေးမှုဝန်ကြီးဌာန ဝန်ကြီး H.E. Mr. Shri Gajendra Singh Shekhawat, ပါလီမန်ရေးရာ ဝန်ကြီးဌာန ဝန်ကြီး H.E. Mr. Shri Kiren Rijiju ၊ နယူးဒေလီမြို့အခြေစိုက် အာဆီယံနိုင်ငံများမှ သံအမတ်ကြီးများ၊ နိုင်ငံတကာသံရုံးများမှ သံရုံးအကြီးအကဲများနှင့်သံတမန်များလည်း တက်ရောက်ခဲ့ကြောင်း သိရသည်။

အိန္ဒိယနိုင်ငံ၏ Piprahwa ဗုဒ္ဓ၏ဓာတ်တော်မွေတော်များ၊ တစ်မူထူးခြားသည့် ဗုဒ္ဓ၏ရှေးဟောင်း အသုံးအဆောင်ပစ္စည်းများ ၊ ရှေးခေတ်လက်မှုလက်ရာများနှင့် ရှေးဟောင်းအမွေအနှစ်ပစ္စည်းများသည် အိန္ဒိယနိုင်ငံကိုလိုနီလက်အောက်သို့ ကျရောက်ခဲ့သည့် အချိန်ကာလမှစ၍ နိုင်ငံပြင်ပသို့ ယူဆောင်သွားခြင်းခံခဲ့ရပြီးနောက် နှစ်ပေါင်း (၁၂၇) နှစ်အကြာမှသာ အိန္ဒိယနိုင်ငံသို့ ပြန်လည်ရောက်ရှိလာခဲ့ပြီးနောက် ယခုကဲ့သို့ တစ်စုတစ်စည်းတည်း ခင်းကျင်းပြသထားခြင်း ဖြစ်ကြောင်း သိရသည်။