အိန္ဒိယက တရုတ်ကျွမ်းကျင်ပညာရှင်များအတွက် ဗီဇာကို ဖြေလျှော့ပေး

         
အိန္ဒိယသည် တရုတ်ကျွမ်းကျင်ပညာရှင်များအတွက် စီးပွားရေးလုပ်ငန်းဗီဇာကိုမြန်ဆန် စွာရရှိစေရန် ကြိုးနီစနစ်များကို ဖြေလျှော့ပေးခဲ့ကြောင်း အရာရှိနှစ်ဦးက ပြောကြားခဲ့ပြီး အဆိုပါ ဆောင်ရွက်ချက်သည် အာရှအင်အားကြီးနှစ်နိုင်ငံအကြား ဆက်ဆံရေးကို မြှင့်တင်ရန်နှင့် ကျွမ်းကျင်ပညာရှင်ရှားပါးမှုကြောင့် ဒေါ်လာကို ဘီလျံ နှင့်ချီ ၍ကုန်ကျစေသည့် ကာလရှည်ကြာစွာ ကတည်းက ဖြစ်နေခဲ့သော နှောင့်နှေးကြန့်ကြာမှုကို အဆုံးသတ်ရန် အဓိကခြေလှမ်းတစ်ခုဖြစ်ကြောင်း ပြောကြားခဲ့သည်။
        
ဝန်ကြီးချုပ် နာရင်ဒြာမိုဒီသည် အမေရိက၏ အခွန်စည်းကြပ်ခြင်းပြစ်ဒဏ်နှင့် ရင်ဆိုင်နေရပြီး ပေကျင်းနှင့် ဆက်ဆံရေးကို ချိန်ချိန်ဆဆဖြင့်စတင်နေချိန်တွင် နူးဒေလီက ဗျူရိုကရေစီ ယန္တရားကို ဖြေလျှော့ကာ ဗီဇာခွင့်ပြုချက်ပေးချိန်ကို တစ်လအောက်အထိ လျှော့ချပေးခဲ့ကြောင်း အရာရှိများက ပြောကြားခဲ့သည်။
       
နျူကလီးယားလက်နက်ပိုင် အိမ်နီးချင်းနှစ်နိုင်ငံသည် ၂၀၂၀ ပြည့်နှစ်အလယ်ပိုင်းက ၎င်းတို့၏ ဟိမဝန္တာနယ်စပ်တွင် ပဋိပက္ခပေါ်ပေါက်ပြီးနောက် အိန္ဒိယသည် တရုတ်၏ လာရောက်လည်ပတ်မှုအားလုံးကို ပိတ်ပင်ခဲ့ပြီး ပြည်ထဲရေးနှင့် နိုင်ငံခြားရေးဝန်ကြီးဌာနများကသာမက အခြားဌာနများကပါ စီးပွားရေးဗီဇာများကို စိစစ်ခဲ့သည်။
         
ဗီဇာများရယူခြင်းနှင့် ပတ်သက်သည့် ပြဿနာများကို ယခုအခါ လုံးဝဖြေရှင်းပြီးဖြစ်ကြောင်း အဆိုပါကိစ္စကိုသိရှိသည့် အမည်မဖော်လိုသူ အရာရှိနှစ်ဦးအနက် တစ်ဦးက ပြောကြားခဲ့သည်။
         
မိမိတို့အနေဖြင့် အုပ်ချုပ်ရေးဌာန၏ စိစစ်ခြင်းကို ဖယ်ရှားခဲ့ပြီး စီးပွားရေးဗီဇာများကို လေးပတ်အတွင်း စီမံဆောင်ရွက်ပေးလျက်ရှိကြောင်း အရာရှိက ဆက်လက်ပြောကြားခဲ့သည်။
          
ယခုသတင်းနှင့် ပတ်သက်၍ မှတ်ချက်ပေးရန် အိန္ဒိယနိုင်ငံခြားရေး၊ ပြည်ထဲရေးနှင့် ကုန်သွယ်ရေးဝန်ကြီးဌာနများအပြင် ဝန်ကြီးချုပ်ရုံးနှင့် မူဝါဒဆိုင်ရာ ထိပ်တန်းပညာရှင်အဖွဲ့တို့ကို တောင်းဆိုခဲ့သော်လည်း တုန့်ပြန်ဖြေကြားခဲ့ခြင်း မရှိပေ။

Ref: သည်စထရိတ်တိုင်းမ်စ်