ကဘူးလ်၊ ဇွန် ၅
အာဖဂန်နစ္စတန်နိုင်ငံ မြောက်ပိုင်းရှိ မူလတန်းကျောင်း နှစ်ကျောင်းတွင် အမည်မသိ လူတစ်စု၏ အဆိပ်ခတ်တိုက်ခိုက်မှုကြောင့် ကျောင်းသူ ၈၀ ခန့် အဆိပ်သင့်ကာ ဆေးရုံသို့ တင်ထားရကြောင်း ဒေသတွင်းမှ ပညာရေး အရာရှိတစ်ဦးက ဇွန်လ ၄ ရက် တနင်္ဂနွေနေ့တွင် ပြောကြားခဲ့သည်။
၂၀၂၁ ခုနှစ် ဩဂုတ်လတွင် တာလီဘန်တို့ အာဖဂန်နစ္စတန်ကို ပြန်လည်အုပ်ချုပ်ခွင့်ရရှိကာ အမျိုးသမီးနှင့် မိန်းကလေးများ၏ အခွင့်အရေးနှင့် လွတ်လပ်ခွင့်များကို စတင်ဖြိုခွဲလာပြီးနောက်ပိုင်း ယခုကဲ့သို့ တိုက်ခိုက်မျိုး ပထမဆုံးအကြိမ် ဖြစ်ပွားခဲ့ခြင်း ဖြစ်သည်။
အဆိုပါ တိုက်ခိုက်မှုများသည် စနေနှင့် တနင်္ဂနွေနေ့များတွင် ဖြစ်ပွားခဲ့ပြီး ဆန်းချရက် ဒေသရှိ နက်စ်ဝန် အီ ခဘ အက်ဘ် ကျောင်းမှ ကျောင်းသူ ၆၀ ဦးနှင့် နက်စ်ဝန် အဲ ဖိုင်ဇာဘတ် ကျောင်းမှ ကျောင်းသူ ၁၇ ဦး စုစုပေါင်း လူ ၇၇ ဦး အဆိပ်သင့်ခဲ့ကြောင်း ပြည်နယ်ပညာရေးမှုး မိုဟာမတ် ရာမာနီက ပြောခဲ့သည်။
“မူလတန်းကျောင်း နှစ်ကျောင်းဟာ တစ်ခုနဲ့ တစ်ခု နီးနီးကပ်ကပ် တည်ရှိနေပြီး တစ်ကျောင်းပြီးမှ တစ်ကျောင်း အပစ်ခံခဲ့ရတာပါ” ဟု ရာမနီက အေပီ သတင်းဌာနကို ပြောပြခဲ့သည်။
တာဝန်ရှိသူများသည် စုံစမ်းစစ်ဆေးမှုများ ဆက်လက်လုပ်ဆောင်လျက်ကြောင်း၊ ကနဦး စုံစမ်းမှုများအရ မလိုမုန်းတီးသူတစ်ဦးက ပြင်ပအဖွဲ့တစ်ခုကို ပိုက်ဆံပေး၍ အဆိပ်ခတ် တိုက်ခိုက်စေခဲ့ကြောင်း သူက ပြောခဲ့သည်။
ကျောင်းသူများ မည်သို့ အဆိပ်ခတ်ခံခဲ့ရပုံနှင့် မည်သို့သော ထိခိုက်ဒဏ်ရာများ ရရှိခဲ့ကြောင်းကိုမူ ထုတ်ဖော်ပြောဆိုခြင်း မရှိခဲ့ပေ။
Source: CNA
