အာဆီယံအသိုက်အဝန်းထူထောင်ရေးကြိုးပမ်းမှုအရှိန်အဟုန်အား ဆက်လက်ထိန်းသိမ်းထားနိုင်မည်ကိုယုံကြည်ဟု အောက်တိုဘာ ၂၈ ရက်ကကျင်းပသည့် (၄၇) ကြိမ်မြောက် အာဆီယံထိပ်သီးအစည်းအဝေး၏ဆက် စပ်အစည်းအဝေးများတွင် နိုင်ငံခြားရေးဝန်ကြီးဌာန၏ အမြဲတမ်းအတွင်းဝန်က ဆွေးနွေးပြောကြားခဲ့သည်။
အာဆီယံသည် မိတ်ဖက်နိုင်ငံများနှင့်ပူးပေါင်းဆောင်ရွက်မှုများပြုလုပ်ရာတွင် တစ်ပေါင်းတစ်စည်းတည်းသော အာဆီယံအဖြစ်သာ ရပ်တည်ဆောင်ရွက်လျက်ရှိပြီး မြန်မာနိုင်ငံအနေဖြင့် မိတ်ဖက်နိုင်ငံများနှင့် ပူးလပေါင်းဆောင်ရွက်မှု မူဘောင်အတွင်းမှ ပူးပေါင်းဆောင်ရွက်မှုများပြုလုပ်ရန်အသင့်ရှိသည်ဟု ပြောသည်။
ထို့ပြင် မြန်မာနိုင်ငံသည် အာဆီယံ၏ တာဝန်ကျေပွန်သော အဖွဲ့ဝင်နိုင်ငံဖြစ်သည်နှင့်အညီ အဆက်ဆက်သော အာဆီယံအလှည့်ကျဥက္ကဋ္ဌများနှင့် ၎င်းတို့၏ ဦးဆောင်ဦးရွက်ပြုမှုများကို အပြည့်အဝပူးပေါင်းဆောင်ရွက်ခဲ့သကဲ့သို့ ဖိလစ်ပိုင်နိုင်ငံမှ အာဆီယံအလှည့်ကျဥက္ကဋ္ဌတာဝန်ထမ်းဆောင်မှုအပေါ်အပြည့်အဝထောက်ခံသည်ဟုလည်း ပြောကြားခဲ့သည်။
အောက်တိုဘာ ၂၈ ရက်က အာဆီယံ-တရုတ် လွတ်လပ်သောကုန်သွယ်မှုဒေသ(၃.၀)အဆင့်မြှင့်တင်ခြင်း လက်မှတ်ရေးထိုးပွဲ၊ (၂၈)ကြိမ်မြောက် အာဆီယံ-တ ရုတ်ထိပ်သီးအစည်းအဝေး၊ (၂၂)ကြိမ်မြောက် အာဆီယံ-အိန္ဒိယထိပ်သီးအစည်းအဝေး၊ အာဆီယံ-နယူးဇီလန်မိတ်ဖက်ဆက်ဆံရေး နှစ်(၅၀)ပြည့်အထိမ်းအမှတ် ထိပ်သီးအစည်းအဝေး၊ အာဆီယံ-နယူးဇီလန် ဂုဏ်ပြုနေ့လယ်စာစားပွဲ၊ (၅)ကြိမ်မြောက် အာဆီယံ-ဩစတြေးလျ ထိပ်သီးအစည်းအဝေး၊ (၂၈)ကြိမ်မြောက် အာဆီယံ-ဂျပန်ထိပ်သီးအစည်းအဝေး၊ (၄၇)ကြိမ်မြောက် အာဆီယံထိပ်သီးအစည်းအဝေးနှင့် ဆက်စပ်ထိပ်သီးအစည်းအဝေးများပိတ်ပွဲ၊ ဖိလစ်ပိုင်နိုင်ငံသို့ အာဆီယံအလှည့်ကျဥက္ကဋ္ဌတာဝန်လွှဲပြောင်းပေးအပ်ပွဲတို့ကို ကျင်းပခဲ့သည်။
မိတ်ဖက်နိုင်ငံများနှင့်ကျင်းပသည့် ထိပ်သီးအစည်းအဝေးများ၌ သက်ဆိုင်ရာလုပ်ငန်းအစီအစဉ်အောက်တွင် ပူးပေါင်းဆောင်ရွက်သွားမည့်ကိစ္စရပ်များကို အဓိက ဆွေးနွေးခဲ့ကြပြီး အပြန်အလှန်အကျိုးဖြစ်ထွန်းစေမည့် ဦးဆောင်ဦးရွက်ပြုမှုများဖြင့် ဒေသတွင်းနှင့် ဒေသလွန်ဖွံ့ဖြိုးတိုးတက်မှုများအတွက် အတူတကွပူးပေါင်းဆောင်ရွက်ရန် သဘောတူညီခဲ့ကြသည်။