မျိုးချစ်စိတ်ကို ဖော်ညွှန်းသည့် တစ်နိုင်ငံလုံး ပါဝင်ဆင်နွှဲမည့် ပွဲတော်တစ်ခုဖြစ်ပြီး မြန်မာလူမျိုးဖြစ်ရသည်ကို ဂုဏ်ယူသည့် စိတ်ဖြစ်အောင် အရှေ့တောင်အာရှ အားကစားပြိုင်ပွဲတွင် ကြည့်ရှုခံစားခဲ့ရသည့် စိတ်ခံစားမှုမျိုး ပြန်လည်ရရှိအောင် အမျိုးသားအားကစားပွဲတော်ကို ကျင်းပသွားမည်ဖြစ်ကြောင်း ပြန်ကြားရေးဝန်ကြီးဌာန ပြည်ထောင်စုဝန်ကြီးဦးမောင်မောင်အုန်းကပြောသည်။
ဇွန် (၆) ရက်တွင် ပြုလုပ်သည့် ပဉ္စမအကြိမ် အမျိုးသားအားကစားပွဲတော်ကျင်းပနိုင်ရေး ကြိုတင်ညှိနှိုင်းအစည်းအဝေးတွင် ပြောကြားခဲ့ခြင်းဖြစ်သည်။
ယခင်ကျင်းပခဲ့သည့် အမျိုးသားအားကစားပွဲတော်နှင့် ၂၀၁၃ ခုနှစ်တွင် အိမ်ရှင်အဖြစ် လက်ခံကျင်းပခဲ့သည့် အရှေ့တောင်အာရှ အားကစားပြိုင်ပွဲတွင် ဆောင်ရွက်ခဲ့မှုများနှင့်ပေါင်းစပ်ပြီးကျင်းပလျှင် သင့်တော်မည်ဟု အကြံပြုလိုကြောင်း အစည်းအဝေးတွင် ပြည်ထောင်စုဝန်ကြီးက ဆိုသည်။
အနုပညာရှင်၊ အတတ်ပညာရှင်များလည်း ပါဝင်ဆွေးနွေးသွားမည်ဖြစ်ပြီး ဝန်ကြီးဌာနများအနေဖြင့် ဆောင်ရွက်လိုသည်များကို အသေးစိတ်ဆွေးနွေးကြစေလိုကြောင်း၊ အကြမ်းဖျင်းအားဖြင့် ဖွင့်ပွဲကို ခမ်းခမ်းနားနားကျင်းပရန် လျာထားကြောင်း၊ ပိတ်ပွဲအခမ်းအနားတွင် ဘောလုံးပွဲစဉ်၊ အမျိုးသားအားကစား ပွဲတော်ဂုဏ်ပြုတေးသီချင်းများ၊ စုပေါင်းသရုပ်ပြဖျော်ဖြေတင်ဆက်မှု အစီအစဉ်များဖြင့် ပိတ်သိမ်းသွားမည်ဖြစ်ကြောင်း၊ အမျိုးသားအားကစားပွဲတော်သည် အမျိုးသားရေးအတွက် အနှစ်သာရရှိသည့် ပွဲတော်ကြီးတစ်ခုဖြစ်ကြောင်း ပြည်ထောင်စုဝန်ကြီးကဆိုသည်။
ပဉ္စမအကြိမ် အမျိုးသားအားကစားပွဲတော်ကို ဒီဇင်ဘာ (၉) ရက်မှ (၂၀) ရက်အထိ နေပြည်တော်၊ ဝဏ္ဏသိဒ္ဓိ အားကစားကွင်းတွင် နိုင်ငံတော်အဆင့် ခမ်းခမ်းနားနား ကျင်းပသွားမည်ဖြစ်သည်။
ပဉ္စမအကြိမ် အမျိုးသားအားကစားပွဲတော်ဖွင့်ပွဲတွင် နိုင်ငံတော်အလံကို Free Fall လေထီးဖြင့် ကွင်းအတွင်းသို့ သယ်ဆောင်လွှင့်တင်မည်ဖြစ်ပြီး အဖွင့်သီချင်းကို အနုပညာရှင်များ၊ ကျောင်းသားကျောင်းသူများက သီဆိုကပြဖျော်ဖြေမည်ဖြစ်ကြောင်း သိရသည်။
အဆိုပါ အားကစားပွဲတော်ကိုအစီအစဉ် (၁၇) ခုဖြင့် ကျင်းပရန်လျာထားပြီး မြန်မာနိုင်ငံ ရုပ်ရှင်အစည်းအရုံး၊ မြန်မာနိုင်ငံဂီတအစည်းအရုံး၊ မြန်မာနိုင်ငံသဘင် ပညာရှင်များအစည်းအရုံးနှင့် မြန်မာနိုင်ငံဟာသပညာရှင်များ အစည်းအရုံးတို့မှ ဖျော်ဖြေတင်ဆက်မှု အစီအစဉ်များလည်း ပါဝင်မည်ဖြစ်ကြောင်း သိရသည်။
၂၀၁၃ ခုနှစ် သမ္မတ ဦးသိန်းစိန်လက်ထက်တွင် ဒုသမ္မတ ဦးဉာဏ်ထွန်းဦးစီးကာ ကျင်းပခဲ့သည့် ၂၇ ကြိမ်မြောက်ဆီးဂိမ်းသည် လူအင်အား၊နည်းပညာအားများစွာသုံးကာ ခမ်းခမ်းနားနား ကျင်းပခဲ့ခြင်းဖြစ်သည်။ထိုပွဲအား တစ်နှစ်ကြိုတင်ပြင်ဆင်ခဲ့ပြီး တိုင်းနှင့်ပြည်နယ်အနှံ့မှကျောင်းသားများကိုစခန်းသွင်းလေ့ကျင့်ခဲ့သည်။
Photos- နေပြည်တော်တွင်ကျင်းပခဲ့သည့် ၂၇ ကြိမ်မြောက် အရှေ့တောင်အာရှ အားကစားပွဲပုံများ
