အရှည် ၃၄၁၆ ပေရှိသည့် ရွှေပြည်သာတံတားကြီးအား သတ်မှတ်ခံနိုင်ဝန်အတိုင်း ဆက်လက်အသုံးပြုနိုင်ကြောင်း သိရ

အရှည် ၃၄၁၆ ပေရှိသည့် ရွှေပြည်သာတံတားကြီးအား သတ်မှတ်ခံနိုင်ဝန်အတိုင်း ဆက်လက်အသုံး ပြုနိုင်ကြောင်း ရွှေပြည်သာတံတား ပြင်ဆင်ထိန်းသိမ်းခြင်းလုပ်ငန်းအား တာဝန်ယူဆောင်ရွက်လျက်ရှိသည့် တံတားဦးစီးဌာနမှ ညွှန်ကြားရေးမှူး(မြို့ပြ)၊ ဦးဇော်မိုးလွင်က ပေါ်ပြူလာနယူးစ်သို့ ပြောကြားခဲ့သည်။

ရန်ကုန်တိုင်းဒေသကြီး၊ ရွှေပြည်သာမြို့နယ်နှင့် လှိုင်သာယာမြို့နယ်တို့အား ဆက်သွယ်ထားသည့် ရွှေပြည်သာတံတား(၃၄၁၆ ပေ)၏ ရေလယ်တိုင်အမှတ်(၄)တွင် တံတားသံပေါင်အထိုင်မှာ အံလွဲနေကြောင်းနှင့် မူလီပေါက်များ ပြတ်ထွက်နေသဖြင့် အန္တရာယ်ရှိကြောင်း ၂၀၂၆ ခုနှစ် ဖေဖော်ဝါရီလအတွင်း လူမှုကွန်ရက်စာမျက်နှာအသုံးပြုတစ်ဦးက တင်ထားခဲ့သည်။

အဆိုပါကိစ္စနှင့် ပတ်သက်၍ တံတားကြီး၏လက်ရှိအခြေအနေနှင့်ပတ်သက်ပြီး ရွှေပြည်သာတံတား၏ ရေလည်ပင်မတံတားမှာ သံမဏိသံပေါင်အမျိုးအစားဖြစ်ပြီး ရေလယ်တိုင်အမှတ် RP1 မှ RP6 အထိ သံပေါင်တစ်ဆက်တစ်စပ်တည်း အရှည် (၁၇၃၂ ပေ) ရှိကြောင်း၊ ရာသီဥတုအပူနှင့်အအေးကွာခြားမှုကြောင့် သံပေါင်များ ကျုံ့ဝင်ခြင်း၊ ဆန့်ထွက်ခြင်းတို့ ဖြစ်ပေါ်သဖြင့် တံတားသံပေါင်အောက်တွင် ရွေ့လျားနိုင်သည့် တံတားအထိုင် (Bearing )များ တပ်ဆင်ထားကြောင်း၊ တံတားအောက် သံပေါင်အထိုင်များတွင် ရွေ့လျားနိုင်သည့် အထိုင်(Moveable Bearing)နှင့် အသေ တပ်ဆင်ထားသည့် အထိုင်(Fixed Bearing)ဟူ၍ (၂)မျိုးရှိကြောင်းနှင့် ရေလယ်တိုင် အမှတ်(၄)ပေါ်တွင် တပ်ဆင်ထားသည့် သံပေါင်အထိုင်မှာ ရွေ့လျားအထိုင်(Moveable Bearing) အမျိုးအစား ဖြစ်ကြောင်း တံတားဦးစီးဌာနမှ တာဝန်ရှိသူတစ်ဦးက ပြောကြားခဲ့သည်။

ရေလယ်တိုင်အမှတ်(၄)ပေါ်ရှိ သံပေါင်အထိုင် Bearing ထားရှိမည့် နေရာရှိ အောက်ခံ ကွန်ကရစ်ခုံ(Shoe Pedestal)မှာ တိုင်ထိပ်အလယ်တည့်တည့်တွင် တည်ရှိရမည်ဖြစ်သော်လည်း ရွှေပြည်သာဘက်ကမ်းသို့ ၄ လက်မခန့် မူလတည်ဆောက်စဉ်ကတည်းက ရောက်ရှိနေကြောင်း တိုင်းတာမှုမှတ်တမ်း(Survey Records)များအရ သိရှိရသည်။ သို့ရာတွင် သံပေါင်မှ သက်ရောက်သည့် အလေးချိန်ဝန်အား ထမ်းမည့် အောက်ခံအထိုင်သံပြားသည် အောက်ခံကွန်ကရစ်ခုံ ( Shoe Pedestal)တွင် သတ်မှတ်ဧရိယာအတွင်းသာ တည်ရှိနေပြီး သံပေါင်အလေးချိန်ဝန်အား အပြည့်အဝထမ်းနိုင်ကြောင်း သိရှိရသည်။

အပူချိန်မြင့်တက်ချိန်တွင် သံပေါင်ဆန့်ထွက်ခြင်းဖြစ်ပေါ်ကာ သံပေါင်အထိုင် Bearing မှာ လှိုင်သာယာဘက်ခြမ်းသို့ ရွေ့လျားသဖြင့် အဆိုပါတိုင်ထိပ်ရှိ အောက်ခံကွန်ကရစ်ခုံ (Shoe Pedestal) နှင့် တံတားသံပေါင်အထိုင် အံလွဲနေသကဲ့သို့ ထင်ရကြောင်း သိရှိရသည်။

မူလီပေါက်များ ပြတ်ထွက်နေခြင်းဆိုသည်မှာလည်း အဆိုပါမူလီပေါက်များသည် သံပေါင် အထိုင်(Bearing)တပ်ဆင်ချိန်တွင် Bearing အပေါ်ဘက်ခြမ်းနှင့် အောက်ဘက်အခြမ်းယာယီတွဲထားသည့် မူလီပေါက်(Bolts & Nuts)များ ဖြစ်ပြီး တပ်ဆင်ပြီးပါက သံပေါင်ရွေ့လျားနိုင်ရန် ပြန်လည် ဖြုတ်ပေးရသဖြင့် ယခုကဲ့သို့ ကျန်ရှိနေကြောင်း သိရှိရသည်။

လူမှုကွန်ရက်မီဒီယာပေါ်တွင် ဖော်ပြသည့် Video ဖိုင်ပါ အချက်အလက်များသည် ပြည်သူများ အတွက် တံတားကြီးအား အန္တရာယ်ရှိနိုင်သကဲ့သို့ အထင်ရောက်နိုင်သော်လည်း အမှန်တကယ်တွင် အန္တရာယ်လုံးဝမရှိပါကြောင်း၊ သို့ရာတွင် မျက်မြင်အရ ပြည်သူများ ပိုမိုစိတ်ချယုံကြည်စွာ တံတားကြီးအား အသုံးပြုနိုင်ရန်အတွက် ရေလယ်တိုင်အမှတ်(၄)ရှိ သံပေါင်အထိုင်၏ အောက်ခံကွန်ကရစ်ခုံ (Shoe Pedestal)အား လှိုင်သာယာဘက်ခြမ်းသို့ ၉ လက်မခန့်တိုးချဲ့ပြီး တံတားသံပေါင် ဆန့်ထွက် ချိန်တွင် အံလွဲနေသည့်ပုံ မဖြစ်စေရန် ဆောင်ရွက်ပြီးဖြစ်ပါကြောင်းနှင့် ရေလယ်တိုင် RP1, RP2, RP3, RP4, RP5, RP6 တို့၏ သံပေါင်အထိုင် (Bearing)များအား သံချေးချွတ်ပြီး ဆေးသုတ်ခြင်းလုပ်ငန်း များကိုပါ ဆောင်ရွက်ထားကြောင်း သိရသည်။

တံတားတိုင်ထိပ်ပေါ်သို့ လူငယ်စုံတွဲများ တက်ရောက်ခြင်းမပြုနိုင်ရန်နှင့် အခြားမလိုလားအပ်သည့် အန္တရာယ်များ မဖြစ်ပေါ်စေရန်အတွက် အကာအရံများလည်း တပ်ဆင်ဆောင်ရွက်ထားကြောင်းနှင့် တံတားကြီးအား သတ်မှတ်ခံနိုင်ဝန်အတိုင်း ဆက်လက်အသုံးပြုနိုင်ကြောင်း သိရှိရသည်။

ဓာတ်ပုံ- တံတားဦးစီးဌာန