အမှတ်တံဆိပ် မှတ်ပုံတင်လျှောက်ထားချက်များကို အီလတ်ထရောနစ်စနစ်ဖြင့်လည်းကောင်း၊ လျှောက်လွှာလက်ခံဌာနများမှလည်းကောင်း လက်ခံဆောင်ရွက်ပေးလျက်ရှိ

အမှတ်တံဆိပ် မှတ်ပုံတင်လျှောက်ထားချက်များကို အီလတ်ထရောနစ်စနစ်ဖြင့်လည်းကောင်း၊ လျှောက်လွှာလက်ခံဌာနများမှလည်းကောင်း လက်ခံစစ်ဆေးဆောင်ရွက်ပေးလျက်ရှိပြီး လစဉ်လဆန်း ၁ ရက် နေ့တိုင်း အမှတ်တံဆိပ်မှတ်ပုံတင်လျှောက်ထားချက်များအား ကန့်ကွက်နိုင်ကြောင်းကို ထုတ်ပြန်ကြေညာလျက်ရှိကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာနမှ ညွှန်ကြားရေးမှူးချုပ် ဒေါက်တာမိုးမိုးသွယ်က ပြောကြားခဲ့သည်။

အမှတ်တံဆိပ်မှတ်ပုံတင်ခြင်းနှင့် စပ်လျဉ်း၍ ကိုယ်စားလှယ်များနှင့်ဆွေးနွေးပွဲကို ၂၀၂၅ ခုနှစ်၊ ဒီဇင်ဘာလ ၉ ရက်နှင့် ၁၀ ရက်တို့တွင် ရန်ကုန်မြို့ရှိ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာန၊ ညီလာခံခန်းမတွင်ကျင်းပပြုလုပ်ခဲ့ပြီး ဆွေးနွေးပွဲသို့ မူပိုင်ခွင့်ဦးစီးဌာနမှ တာဝန်ရှိသူများနှင့် အမှတ်တံဆိပ်မှတ်ပုံတင်ခြင်းဆိုင်ရာ ကိုယ်စားလှယ်များ စုစုပေါင်း ၁၂၀ ဦးခန့် တက်ရောက်ခဲ့ကြသည်။

အဆိုပါဆွေးနွေးပွဲ၏ ဖွင့်ပွဲအခမ်းအနားတွင် မူပိုင်ခွင့်ဦးစီးဌာနမှ ညွှန်ကြားရေးမှူးချုပ် ဒေါက်တာမိုးမိုးသွယ်က မူပိုင်ခွင့်ဥပဒေများကို ၂၀၁၉ ခုနှစ်တွင် အတည်ပြုပြဋ္ဌာန်းနိုင်ခဲ့ပြီး ကုန်အမှတ်တံဆိပ်မူပိုင်ခွင့်ဥပဒေ၊ စက်မှုဒီဇိုင်းမူပိုင်ခွင့်ဥပဒေနှင့် စာပေနှင့်အနုပညာမူပိုင်ခွင့်ဥပဒေများကို ၂၀၂၃ ခုနှစ်တွင် လည်းကောင်း၊ တီထွင်မှုမူပိုင်ခွင့်ဥပဒေကို ၂၀၂၄ ခုနှစ်တွင်လည်းကောင်း အာဏာသက်ဝင်နိုင်ခဲ့ကြောင်း ပြောကြားခဲ့သည်။

အမှတ်တံဆိပ်မှတ်ပုံတင်ခြင်းဆိုင်ရာ ကိုယ်စားလှယ်သင်တန်းများကို ဘဏ္ဍာနှစ် တစ်နှစ်လျှင် (၂) ကြိမ် ဖွင့်လှစ်ပေးလျက်ရှိကြောင်း၊ အမှတ်တံဆိပ်ကိုယ်စားလှယ်အဖြစ် ဆောင်ရွက်လျက်ရှိသော ကိုယ်စားလှယ်များအနေဖြင့် အမှတ်တံဆိပ်များလျှောက်ထားရာတွင် မူပိုင်ခွင့်ဦးစီးဌာနမှ တောင်းခံသည့်လိုအပ်သောအချက်အလက်များကို ဆောင်ရွက်ရာတွင် လွဲမှားမှုများလျော့နည်းစေရန်နှင့် ကိုယ်စားလှယ်တစ်ယောက်၏ တာဝန်ခံမှု၊ တာဝန်ယူမှုကို ပိုမိုသိရှိနားလည်စေရန်၊ အမှတ်တံဆိပ်ပိုင်ရှင်ကိုယ်စားဆောင်ရွက်ရာတွင် ဝန်ဆောင်မှုကောင်းမွန်စွာပေးနိုင်စေရန်၊ မူပိုင်ခွင့်ဦးစီးဌာနနှင့် အပြန်အလှန်ဆက်သွယ်ဆောင်ရွက်ရာတွင် အဆင်ပြေချောမွေ့စေရန်ရည်ရွယ်၍ ဆွေးနွေးပွဲကို ကျင်းပရခြင်းဖြစ်ပါကြောင်း ၎င်းက ဆက်လက်ပြောကြားခဲ့သည်။

ဆွေးနွေးပွဲပထမနေ့တွင် အမှတ်တံဆိပ်မှတ်ပုံတင်လျှောက်ထားခြင်းများနှင့်စပ်လျဉ်း၍ ဆောင်ရွက်ထားရှိပြီးအခြေအနေများ၊ အပြည်ပြည်ဆိုင်ရာကုန်ပစ္စည်းနှင့် ဝန်ဆောင်မှုများအမျိုးအစားခွဲခြားခြင်း (Nice Classification) အရ ခွဲခြားရာတွင် လွဲမှားလေ့ရှိသောအကြောင်းအရာများ၊ အမှတ်တံဆိပ်မှတ်ပုံတင်လျှောက်ထားခြင်းဆိုင်ရာ နောက်ဆက်တွဲ လျှောက်လွှာများတင်သွင်းခြင်း၊ ဖြည့်စွက်ခြင်းနှင့် လိုက်နာဆောင်ရွက်ရမည့်အချက်များ၊ ကုန်အမှတ်တံဆိပ်မူပိုင်ခွင့် လျှောက်ထားချက်များအား WIPO FILE စနစ်မှတစ်ဆင့် လျှောက်ထားရာတွင် လိုက်နာဆောင်ရွက်ရမည့်အချက်များနှင့် ထုတ်ပြန်ကြေညာချက်များ ရှာဖွေနိုင်သည့်နည်းလမ်းများနှင့်စပ်လျဉ်း၍ ဆွေးနွေးခဲ့သည်။

ဆွေးနွေးပွဲဒုတိယနေ့တွင်လည်း ဆက်လက်ဆွေးနွေးခဲ့ကြပြီး အထွေထွေဆွေးနွေးခြင်း၊ မေးခွန်းများမေးမြန်းခြင်းများအပေါ် တာဝန်ရှိသူများက ပြန်လည်ဖြေကြားခဲ့ကြကြောင်း သိရသည်။