တရုတ်သမ္မတ ရှီကျင့်ဖိန်သည် အင်္ဂါနေ့က ကျင်းပသော အမျိုးသားနေ့နှစ်ပတ်လည် မိန့်ခွန်းတွင် ထိုင်ဝမ်ကိစ္စနှင့် ပတ်သက်၍ ပြ-တ်သားသော သတိပေးချက်တစ်ခု ထုတ်ပြန်ခဲ့ပြီး၊ ပေကျင်းသည် “ပြင်ပမှ စွက်ဖက်မှု” ကို ပြ-တ်ပြ-တ်သားသား ဆန့်ကျင်ကာ ၎င်း၏ နယ်မြေပိုင်ဆိုင်ခွင့်ကို ကာကွယ်ရမည်ဟု ပြောကြားခဲ့သည်။
နိုင်ငံပိုင် သတင်းအေဂျင်စီ ရှင်းဟွာမှ ထုတ်ပြန်သော ရှီ၏မိန့်ခွန်းအရ၊ ပေကျင်းသည် ထိုင်ဝမ်နှင့် ရေလက်ကြားတစ်လျှောက် ဖလှယ်မှုများကို နက်ရှိုင်းအောင် လုပ်ဆောင်ရမည်၊ “‘ထိုင်ဝမ် လွတ်လပ်ရေး’ နှင့် ပြင်ပမှ စွက်ဖက်မှုကို ရှာဖွေသောခွဲထွက်ရေးလှုပ်ရှားမှုများကို ပြ-တ်ပြ-တ်သားသား ဆန့်ကျင်ပြီး၊ အမျိုးသား အချုပ်အခြာအာဏာနှင့် နယ်မြေပိုင်ဆိုင်ခွင့်ကို ခိုင်မာစွာ ကာကွယ်ရမည်” ဟု သူက ပြောကြားခဲ့ကြောင်းသိရသည်။
ပြီးခဲ့သည့်နှစ် အမျိုးသားနေ့မိန့်ခွန်းတွင်လည်း သူသည် ထိုင်ဝမ်နှင့်ပတ်သက်၍ အလားတူ စကားလုံးများကို အသုံးပြုခဲ့သော်လည်း၊ ထိုအချိန်က ရှီသည် ပြင်ပအင်အားစုများကို သီးခြားဖော်ပြခဲ့ခြင်း မရှိခဲ့ချေ။
ထိုင်ဝမ်သည် တရုတ်နိုင်ငံ၏ “အလေးအမြတ်ထားသော” အစိတ်အပိုင်းဖြစ်ကြောင်းနှင့် “ထိုင်ဝမ် ရေလက်ကြား နှစ်ဖက်ရှိ ပြည်သူများသည် သွေးခြင်းဆက်နွှယ်နေကြောင်း” တို့ကို ၂၀၂၄ ခုနှစ် မိန့်ခွန်းတွင် ရှီကအလေးထား ပြောကြားခဲ့သည်။
ကိုယ်ပိုင်အုပ်ချုပ်ခွင့်ရ ထိုင်ဝမ်ကျွန်း၏ ခေါင်းဆောင် ဆိုင်အင်ဝမ် (Tsai Ing-wen)၏ နေရာကို ဝီလျံ လိုင် ချင်တဲ (William Lai Ching-te) က ဆက်ခံပြီး မကြာမီ လအနည်းငယ်အကြာတွင် ပြီးခဲ့သည့်နှစ်က မိန့်ခွန်းထွက်ပေါ်လာခဲ့ခြင်းဖြစ်သည်။