အမေရိက က ပို့ကုန်အမည်ပျက်စာရင်းကို တိုးချဲ့

ဝါရှင်တန်–အမေရိကန်ပြည်ထောင်စုသည် တနင်္လာနေ့ (စက်တင်ဘာလ ၂၉ ရက်နေ့) တွင် ကုန်သွယ်ရေး အမည်ပျက် စာရင်း ပါပြီးသားကုမ္ပဏီများ၏ လုပ်ငန်းခွဲများက ကုန်သွယ်ရေး ပိတ်ပင်အရေးယူ ထားခြင်းကို ကျော်ဖြတ်ရန် ကြိုးစားလာခြင်းကို အလိုအလျောက် ထိန်းချုပ်ရန် ရည်ရွယ်၍ စည်းမျဉ်း အသစ် တစ်ရပ်ကို ထုတ်ပြန်လိုက်သည်။

ကုမ္ပဏီစာရင်း တွင် အနည်းဆုံး 50 ရာခိုင်နှုန်း ပိုင်ဆိုင်သည့် လုပ်ငန်းခွဲများသည် လိုင်စင်ရယူရန်လိုအပ်ချက်များ ကို လိုက်နာရမည်ဖြစ်ပြီး လျှောက်လွှာအများစုသည် ငြင်းပယ်ခံရဖွယ်ရှိကြောင်း ကုန်သွယ်ရေးဌာနက ပြောကြားခဲ့သည်။

ထိုကဲ့သို့ စည်းမျဉ်းကို ပြောင်းလဲမှုသည် အမည်ပျက်စာရင်းသွင်းထားသော ကုမ္ပဏီများကို တွဲဖက်လုပ်ကိုင်သူများမှတစ်ဆင့် ငွေပေးငွေယူ လုပ်သည့် အရေးကြီးသော ဟာကွက်ကို ပိတ်လိုက်ခြင်းဖြစ်ကြောင်း တာဝန်ရှိသူများက ပြောကြားခဲ့သည်။

ထိုသို့ စည်မျဉ်းအသစ်ထုတ်ပြန် သောလုပ်ရပ်ကို တရုတ်နိုင်ငံ၏ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက အလွန်ဆိုးရွားသော လုပ်ရပ်အဖြစ် ရှုတ်ချခဲ့သည်။ ၎င်း လုပ်ရပ်သည် ကုမ္ပဏီများ၏ အခွင့်အရေးများကို ထိပါးကာ ကမ္ဘာ့စက်မှုလုပ်ငန်းနှင့် ထောက်ပံ့ရေးကွင်းဆက်များ၏ လုံခြုံရေးနှင့် တည်ငြိမ်မှုကို ဆိုးရွားစွာ ထိခိုက်စေသည်ဟု ပြောကြားခဲ့သည်။

ဝါရှင်တန်နှင့် ပေကျင်းတို့သည် ထိလွယ်ရှလွယ် သောကုန်သွယ်ရေးဆွေးနွေးပွဲများကို ပြုလုပ်နေချိန်တွင် အဆိုပါကြေညာချက်ထွက်ပေါ်လာခြင်းဖြစ်သည်။ ၎င်း စည်းမျဉ်းအသစ်သည် Nvidia ၏ H20 မော်ဒယ်ကဲ့သို့ အဆင့်မြင့် AI ချစ်ပ်များအပေါ် မကြာသေးမီက ကန့်သတ်ချက်များကို ဖြေလျှော့လိုက်ခြင်းနှင့် ဆန့်ကျင်ဘက်ဖြစ်သည်။

အချို့သော ငွေပေးငွေယူ လုပ်ဆောင်မှုများကို ရက် ပေါင်း ၆၀ ခွင့်ပြုမည်ဖြစ်ကြောင်း သိရသည်။

Ref: cna