အမေရိကန်၌ မျောက်ကျောက်ရောဂါကိုကလေးငယ်များတွင် စတွေ့
နယူးယော့ခ်၊ဇူလိုင် ၂၃
အမေရိကန်ပြည် ထောင်စုကယ်လီဖိုးနီးယားပြည်နယ်ရှိ လမ်းလျှောက်စကလေးငယ်တစ်ဦးနှင့် အမေရိကန်နိုင်ငံသားမဟုတ်သည့် လသားကလေးငယ်တစ်ဦးတို့ မျောက်ကျောက်ရောဂါကူးစက် နေကြောင်း ကျန်းမာရေးဌာနမှတာဝန်ရှိသူများက ဇူလိုင်လ ၂၂ ရက် သောကြာနေ့တွင်ထုတ်ပြန်ကြေငြာခဲ့သည်။
ရောဂါဖြစ်ပွားမှုနှစ်ခုသည် ဆက်စပ်မှုမရှိသဖြင့် မိသားစုအတွင်းကူးစက်ခြင်း ဖြစ်နိုင်ကြောင်း ရောဂါထိန်းချုပ်ရေးနှင့် ကာကွယ်ရေးဗဟိုဌာန (CDC)၏ထုတ်ပြန်ချက်တွင်ဖော်ပြထားသည်။ကလေးငယ်များသည် ကျန်းမာရေးကောင်းမွန်ပြီး ဆေးကုသမှုခံယူနေကြောင်းလည်း သိရှိရသည်။
တုပ်ကွေးကဲ့သို့ သောရောဂါလက္ခဏာများရှိပြီး အရေပြားဒဏ်ရာများကိုလည်းဖြစ်စေတတ်သော မျောက်ကျောက်ရောဂါသည် အာဖရိကအနောက်ပိုင်းနှင့်အလယ်ပိုင်းတွင် အဓိကဖြစ်ပွားခဲ့ပြီး အနီးကပ်ထိတွေ့မှုရှိမှသာကူးစက်တတ်သည့် ရောဂါမျိုးဖြစ်သည်။ယခုနှစ်အထိ နိုင်ငံပေါင်း ၆၀ ကျော်တွင် မျောက်ကျောက်ရောဂါဖြစ်ပွားမှုပေါင်း ၁၄,၀၀၀ ကျော်ရှိပြီး အာဖရိကတွင် ငါးဦးသေဆုံးခဲ့ပြီဖြစ်သည်။
အိမ်ဖြူတော်၏ ကိုဗစ်တိုက်ဖျက်ရေးညှိနှိုင်းရေးမှူး ဒေါက်တာ Ashish Jha က အစိုးရအနေဖြင့် မျောက်ကျောက်ကာကွယ်ဆေး အလုံးရေ ၃၀၀,၀၀၀ ကိုပေးပို့ထားပြီး ဒိန်းမတ်နိုင်ငံမှ နောက်ထပ် အလုံးရေ ၇၈၆,၀၀၀ တင်ပို့မှုကိုလည်း အမြန်ရရှိနိုင်ရန်အရှိန်မြှင့်လုပ်ဆောင်နေကြောင်း ပြောကြားခဲ့သည်။
နယူးယော့ခ်ရှိ မျောက်ကျောက်ကာကွယ်ဆေးထိုးနိုင်သောလူဦးရေ၏ ထက်ဝက်ကျော်နှင့် ဝါရှင်တန်ဒီစီရှိ ကာကွယ်ဆေးထိုးနိုင်သောလူဦးရေ၏ ၇၀ ရာခိုင်နှုန်းကျော်အတွက် ပထမဆုံး ကာကွယ်ဆေးထိုးရန်အလုံအလောက်ရှိနေပြီဟုလည်း၎င်းကပြောသည်။
မျောက်ကျောက်အများဆုံးဖြစ်ပွားရာ အာဖရိကဒေသများတွင် သေဆုံးမှုသည် ၁ ရာခိုင်နှုန်းဝန်းကျင်သာရှိပြီး အစုလိုက်အပြုံလိုက်မဖြစ်ပွားသည့် နိုင်ငံများတွင် သေဆုံးချေနည်းပါးနိုင်ကြောင်းသိရှိရသည်။သို့သော်လည်း ရောဂါပြင်းထန်မှုကြောင့် ဆေးရုံတက်နေရသည့် လူနာအများအပြားကိုလည်းတွေ့ရသည်။
မျောက်ကျောက်ရောဂါဖြစ်ပွားမှုအား ပြည်သူ့ကျန်းမာရေး အရေးပေါ်အခြေအနေအဖြစ် ကြေညာရန်သင့်မသင့်ကို အမေရိက အနေဖြင့်အကဲဖြတ်နေဆဲဖြစ်ကြောင်းဒေါက်တာ Jha ကပြောကြားခဲ့သည်။”တကယ်လို့ လိုအပ်လာရင်တော့ အရေးပေါ်အခြေနေကြေငြာဖို့အတွက် ကျွန်တော်တို့သေချာစောင့်ကြည့်နေပါတယ်” ဟုလည်း၎င်းကဆိုခဲ့သည်။
Source – Reuters/gr