အသက် ၆ နှစ်အရွယ် သားငယ်တစ်ဦး၏ မိခင်ဖြစ်သူ Renee Nicole Good (အသက် ၃၇ နှစ်) သည် ယနေ့အစောပိုင်းက Minneapolis မြို့ရှိ သူမ၏နေအိမ်နှင့် လမ်းအနည်းငယ်သာဝေးသောနေရာတွင် ICE (လူဝင်မှုကြီးကြပ်ရေးနှင့် အကောက်ခွန်အရာရှိ) တစ်ဦး၏ ပ-စ်ခတ်မှုကြောင့် ကွယ်လွန်ခဲ့သည်။
“[ICE အေးဂျင့်တစ်ဦးသည်] ယနေ့နံနက်ပိုင်းက Minneapolis တောင်ပိုင်းတွင် ဒေသခံများနှင့် ဖက်ဒရယ်အရာရှိများကြား ထိပ်တိုက်တွေ့ဆုံမှုအတွင်း အမျိုးသမီးတစ်ဦးကို ေ-သနတ်ဖြင့် ပ-စ်ခတ်ခဲ့သည်။ […] အခင်းဖြစ်ပွားမှုကို မြင်တွေ့ခဲ့သည့် ဒေသခံအချို့၏ ပြောကြားချက်အရ အေးဂျင့်များသည် ထိုအမျိုးသမီးအား ကားပေါ်မှဆင်းရန် အမိန့်ပေးနေခဲ့သည်ဟု ဆိုသည်။ ဗီဒီယိုမှတ်တမ်းတစ်ခုတွင် ယာဉ်မောင်းဖြစ်သူက ကားကို နောက်ဆုတ်ပြီးနောက် ရှေ့သို့ပြန်မောင်းစဉ် အေးဂျင့်များက ကားကိုဝိုင်းထားသည်ကို တွေ့ရသည်။ ထို့နောက် အေးဂျင့်တစ်ဦးသည် ကားအတွင်းသို့ ကျည်ဆန်အမြောက်အမြားဖြင့် ပ-စ်ခတ်ခဲ့ပုံရသည်။”ဟု Minnesota Star Tribune သတင်းစာက ရေးသားဖော်ပြထားသည်။
ယခုအခါ Private လုပ်ထားသည့် Renee Nicole Good ၏ Instagram အကောင့်ကိုယ်ရေးအကျဉ်းတွင် သူမကိုယ်သူမ “ကော်လိုရာဒိုပြည်နယ်မှ ကဗျာဆရာ၊ စာရေးဆရာ၊ ဇနီးသည်၊ မိခင်နှင့် ဂစ်တာကို မတောက်တခေါက်တီးတတ်သူတစ်ဦး၊ ယခုအခါ Minneapolis တွင် နေထိုင်သူ” ဟု ဖော်ပြထားသည်။ ၂၀၂၀ ပြည့်နှစ်က Renée Nicole Macklin ဟူသော ကလောင်အမည်ဖြင့် သူမသည် “On Learning to Dissect Fetal Pigs” အမည်ရှိ ကဗျာဖြင့် ဂုဏ်သရေရှိ Academy of American Poets ဆုကို ရရှိခဲ့သည်။
အခင်းဖြစ်ပွားပြီးနောက် Minneapolis မြို့တော်ကောင်စီဝင်များက စုပေါင်းထုတ်ပြန်ချက်တစ်စောင်ထုတ်ပြန်ကာ၊ ICE အေးဂျင့်များအား မြို့အတွင်းမှ ထွက်ခွာသွားရန် တောင်းဆိုခဲ့ကြသည်။
“ဒီမနက်မှာ ICE အေးဂျင့်တစ်ဦးက ကျွန်မတို့လူထုထဲက တစ်ဦးဖြစ်တဲ့ Renee Nicole Good ကို ေ-သနတ်နဲ့ ပစ်သ-တ်ခဲ့ပါတယ်” ဟု ထိုထုတ်ပြန်ချက်တွင် ဖော်ပြထားသည်။ “ကျွန်မတို့မြို့ထဲမှာ လူသ-တ်မှုကျူးလွန်သူ ဘယ်သူမဆို အဖမ်းခံရရမယ်၊ စုံစမ်းစစ်ဆေးခံရရမယ်၊ ပြီးတော့ ဥပဒေအရ အပြင်းထန်ဆုံး အရေးယူခံရရမှာ ဖြစ်ပါတယ်။”
ကောင်စီဝင်များက ၎င်းတို့သည် Minneapolis ရှိ ရွှေ့ပြောင်းနေထိုင်သူ လူထုဘက်မှ ရပ်တည်ကြောင်း ပြောကြားခဲ့ပြီး၊ ဖက်ဒရယ်လူဝင်မှုကြီးကြပ်ရေး အာဏာပိုင်များသည် မြို့အတွင်းသို့ “ရုတ်ရုတ်သဲသဲဖြစ်မှုနှင့် အကြမ်းဖက်မှုများ” ကို ယူဆောင်လာသည်ဟု စွပ်စွဲကာ ဒေသခံများကို အကာအကွယ်ပေးရန် ပြည်နယ်အဆင့် မိတ်ဖက်အဖွဲ့အစည်းများနှင့် ပူးပေါင်းဆောင်ရွက်သွားမည်ဟု ကတိပြုခဲ့ကြသည်။
မင်နီဆိုတာပြည်နယ်နှင့် တစ်နိုင်ငံလုံးရှိ အခြားဒီမိုကရက်တစ် အမတ်များကလည်း ICE အေးဂျင့်၏ ထိုသ-တ်ဖြ-တ်မှုကို ရှုတ်ချခဲ့ကြပြီး Minneapolis မြို့မှ ထွက်ခွာရန် တောင်းဆိုခဲ့ကြသည်။
သမ္မတ ဒေါ်နယ်ထရမ့်အစိုးရအဖွဲ့ တာဝန်ရှိသူများနှင့် ကွန်ဂရက်လွှတ်တော် ရီပတ်ဘလီကန် ခေါင်းဆောင်များကမူ Good သည် သူမ၏ကားဖြင့် အေးဂျင့်များကိုတို-က်ရန် ကြိုးပမ်းခဲ့သည်ဟု အခိုင်အမာပြောဆိုကြသော်လည်း၊ ဗီဒီယိုမှတ်တမ်းများအရ ထိုသို့မဟုတ်ကြောင်း ဒီမိုကရက်တစ်အမတ် အများအပြားက ထောက်ပြခဲ့ကြသည်။
သို့သော်လည်း ရီပတ်ဘလီကန်များကမူ ထိုသတ်ဖြတ်မှုအပေါ် ဒီမိုကရက်များနှင့် လူထု၏ ဝေဖန်မှုများရှိနေသော်လည်း ICE အပေါ် ၎င်းတို့၏ ထောက်ခံမှုကို ထပ်လောင်းအတည်ပြုခဲ့ကြသည်။
“ICE အရာရှိတိုင်း သိထားစေချင်တာကတော့ ခင်ဗျားတို့ရဲ့ သမ္မတ၊ ဒုသမ္မတနဲ့ အစိုးရအဖွဲ့တစ်ခုလုံးဟာ ခင်ဗျားတို့နောက်မှာ ရှိနေတယ်ဆိုတာပါပဲ” ဟု ဒုသမ္မတ JD Vance က X တွင် ရေးသားခဲ့သည်။
ထို့အပြင် ပ-စ်ခတ်မှုဖြစ်ပွားပြီးနောက် Good အား ကူညီရန် ကြိုးပမ်းခဲ့သည့် ဆရာဝန်တစ်ဦးအားလည်း ICE အေးဂျင့်များက တားဆီးပိတ်ပင်ခဲ့ကြောင်း၊ ၎င်းတို့၏ ကိုယ်ပိုင်ဆေးတပ်ဖွဲ့ဝင်များလာနေပြီဖြစ်ကြောင်း ထိုဆရာဝန်အားပြောကြားခဲ့သည်ကို မြင်တွေ့ခဲ့ရသည်ဟု မျက်မြင်သက်သေများကဆိုသည်။