အမေရိကန်သမ္မတနှင့် ဗီယက်နမ်သမ္မတတို့တွေ့ဆုံဆွေးနွေး

နူးယော့ခ်၊စက်တင်ဘာ ၂၆

အမေရိကန်သမ္မတ ဂျိုးဘိုင်ဒင်နှင့်ဗီယက်နမ်သမ္မတတို့သည် နူးယော့ခ်၌ကျင်းပနေသည့် ကုလသမဂ္ဂအထွေထွေညီလာခံပြင်ပ၌ တွေ့ဆုံဆွေးနွေးခဲ့ကြကြောင်းသိရသည်။

အမေရိကအနေဖြင့် ထုတ်လုပ်မှု၏အချက်အခြာဖြစ်ပြီး တရုတ်နှင့်လည်းမိတ်ဖက်ဆက်ဆံရေးရှိနေသည့် ဗီယက်နမ်နှင့် ပူးပေါင်းဆောင်ရွက်မှု ကို မြှင့်တင်ခြင်းဖြင့် အရှေ့တောင်အာရှနိုင်ငံများအပေါ် တရုတ်၏ဩဇာလွှမ်းမိုးမှုကိုတန်ပြန်ရန်ရည်ရွယ်ခြင်းလည်းဖြစ်သည်။

ဗီယက်နမ်သမ္မတမစ္စတာလန်သည် နူးယော့ခ်၌ အမေရိကန်သမ္မတနှင့်သာမက အမေရိကန်စီးပွားရေးကုမ္ပဏီများ၏ ကိုယ်စားလှယ်များနှင့်လည်းတွေ့ဆုံဆွေးနွေးခဲ့ပြီး မက်တာကုမ္ပဏီလည်းအပါအဝင်ဖြစ်ကြောင်းသိရသည်။ မက်တာသည် လူဦးရေသန်း ၁၀၀ ရှိသည့် ဗီယက်နမ်နိုင်ငံ၌ ရင်းနှီးမြှုပ်နှံမှုများတိုးချဲ့ရန် ကတိပြုထားသောကုမ္ပဏီတစ်ခုလည်းဖြစ်သည်။

သမ္မတလန်က နှစ်နိုင်ငံအကြားဆက်ဆံရေးကို ချီးကျူးစကားဆိုကာ သမ္မတဘိုင်ဒင်၏ ဆက်ဆံရေးမြှင့်တင်နိုင်ရန်ကြိုးပမ်းမှုကိုလည်းကျေးဇူးတင်စကားဆိုခဲ့သည်။ သမ္မတဘိုင်ဒင်ကလည်း ၎င်းတို့အနေဖြင့် လွတ်လပ်စွာရေကြောင်းသွားလာခွင့်နှင့် တရားဥပဒေစိုးမိုးရေးဆိုင်ရာ ကတိကဝတ်များအတိုင်း စည်းလုံးညီညွတ်စွာရပ်တည်မည်ဟုဆိုခဲ့သည်။

ဆက်လက်၍ သမ္မတဘိုင်ဒင်က ကုလသမဂ္ဂအထွေထွေညီလာခံ၌ပြောကြားခဲ့သည့်မိန့်ခွန်းထဲက ကဲ့သို့ပင် အချင်းချင်းလက်တွဲလုပ်ဆောင်သွားမည် ဆိုပါက ကျွန်တော်တို့မလုပ်နိုင်သည့်အရာ အရာ ဘာမျှမရှိပါဘူးဟုလည်းပြောကြားခဲ့သည်။

Source : ရိုက်တာ/အက်ဖ်အက်စ်