အစ္စရေးနှင့် ပဋိပက္ခအရှိန်မြင့်လာသောကြောင့် ရာနှင့်ချီသော အမေရိကန်နိုင်ငံသားများသည်အီရန်နိုင်ငံမှ ထွက်ခွာနေခဲ့ကြသည်ဟု နိုင်ငံခြားရေးဝန်ကြီးဌာနတွင်း အစီရင်ခံစာတစ်ခုက ဆိုသည်။
စစ်ပွဲတွင် အမေရိက ဝင်ပါမည့်အခြေအနေကို သမ္မတ ဒေါ်နယ်ထရမ့်ပ်က ချိန်ဆနေသောကြောင့် အီရန်ရှိ အမေရိကန်နိုင်ငံသားများ သည်အန္တရာယ်ရှိနေသည်ဟု သောကြာနေ့က အခြေအနေအစီရင်ခံစာ အသေးစိတ်တွင် ဖော်ပြခဲ့သည်။
အီရန်တွင်ရှိနေသည့် အမေရိကန်နိုင်ငံသား အရေအတွက်အတိအကျကို မသိရဘဲ နိုင်ငံခြားရေးဌာနအနေဖြင့် ပြည်ပရောက် အမေရိကန်နိုင်ငံသားများကို မှတ်ပုံတင်ရန် မလိုအပ်ပေ။
အမေရိကသည် အစ္စရေးရှိ သိန်းနှင့် ချီသော အမေရိကန်နိုင်ငံသားများကို နိုင်ငံမှ ပြန်ခေါ်ထုတ်ရန် သယ်ယူပို့ဆောင်ရေးဆိုင်ရာ အစီအစဉ်များကိုလုပ်ဆောင်နေသကဲ့သို့ အီရန်ရောက် နိုင်ငံသားများအတွက်မူ ယင်းအစီအစဉ်များကို ရရှိမည်မဟုတ်ပေ။ အမေရိကသည် အီရန်တွင် သံတမန်ဆက်ဆံရေးထားရှိခြင်း မရှိပေ။
“အီရန်ကနေ ထွက်ခွာဖို့ရာ အမေရိကန်အစိုးရရဲ့ တို-က်ရို-က်အကူအညီ ကမ်းလှမ်းမှုရှိမှာမဟုတ်ပါဘူး” ဟု နိုင်ငံခြားရေးဌာန ပြောရေးဆိုခွင့်ရှိသူ တမ်မီဘရုစ်က သောကြာနေ့က သတင်းစာရှင်းလင်းပွဲတွင် ပြောကြားခဲ့သည်။
အမေရိကန်နိုင်ငံသား အချို့သည် အီရန်မှ ထွက်ခွာရန် အခက်အခဲများကြုံနေရသည်ဟု အစီရင်ခံစာတွင် ဖော်ပြခဲ့သည်။
တစ်ချိန်တည်းမှာပင် အမေရိကန်အစိုးရသည် အစ္စရေးရောက် နိုင်ငံသားများကို ခေါ်ထုတ်ရန်အတွက် စစ်ဖက်၊ အရပ်ဖက်၊ စင်းလုံးငှားလေယာဉ်များနှင့် အပျော်စီးသင်္ဘောများ ရရှိရေးဆောင်ရွက်နေကြောင်း အစ္စရေးနိုင်ငံဆိုင်ရာ အမေရိကန်သံအမတ် မိုက်ဟုကဘီးက ကြာသပတေးနေ့တွင် ပြောကြားခဲ့သည်။
Ref: စီအင်န်အင်န်