ဂရင်းလန်းကျွန်းသို့ အမေရိကန်၏ စစ်ရေးအရ ကျူးကျော်ဝင်ရောက်လာနိုင်ခြေကို တားဆီးရန်အတွက် နေတိုး (NATO) အဖွဲ့သည် သမ္မတ ဒေါ်နယ်ထရမ့်ကို ရည်ရွယ်သည့် အဆင့်နှစ်ဆင့်ပါဝင်သော သံတမန်ရေးရာ ကြိုးပမ်းမှုတစ်ရပ်ကို စတင်လိုက်ပြီဖြစ်ကြောင်း Politico သတင်းဌာနက ရင်းမြစ်များကို ကိုးကား၍ ဖော်ပြခဲ့သည်။
သတင်းဖော်ပြချက်အရ နေတိုးဆိုင်ရာ သံအမတ်ကြီးများက အာတိတ်ဒေသတွင် ကာကွယ်ရေးအသုံးစရိတ် တိုးမြှင့်ရန်၊ စစ်လက်နက်ပစ္စည်းများ ထပ်မံဖြန့်ကြက်ရန်နှင့် စစ်ရေးလေ့ကျင့်မှုများကို အရှိန်မြှင့်တင်ရန် အဆိုပြုခဲ့ကြသည်။ အဆိုပါဒေသသည် လုံလောက်သော လုံခြုံမှုရှိကြောင်း ထရမ့်အား သက်သေပြရန်အတွက်ဖြစ်သည်။ ဘရပ်ဆဲလ်မြို့တွင် ပြုလုပ်သည့် တံခါးပိတ်အစည်းအဝေးတစ်ခုအတွင်း နေတိုးသံအမတ်ကြီးများက ဂရင်းလန်း၏ အနာဂတ်နှင့်ပတ်သက်၍ ထရမ့်၏ ရပ်တည်ချက်အပေါ် အလျှော့အတင်းလုပ်ဆောင်မည့် နည်းလမ်းကို ရှာဖွေရမည်ဟု ဆုံးဖြတ်ခဲ့ကြကြောင်း မှတ်ချက်ပြုထားသည်။
ဂရင်းလန်းကျွန်းကို ထိန်းချုပ်နိုင်ခြေနှင့် ပတ်သက်၍ ထရမ့်၏ ပြောဆိုမှုများ ပိုမိုပြင်းထန်လာချိန်တွင် အမေရိကန်အစိုးရအဖွဲ့ အကြီးအကဲနှင့် တို-က်ရို-က်ထိပ်တိုက်တွေ့ရန် အသင့်ပြင်ထားကြဖို့ ဥရောပသမဂ္ဂအတွင်း တောင်းဆိုသံများ ထွက်ပေါ်နေကြောင်း Politico က အစောပိုင်းတွင် ဖော်ပြခဲ့သည်။ ဥရောပအစိုးရများသည် ယခင်က ထရမ့်၏ ခြိမ်းခြောက်မှုများကို အလေးအနက် မထားခဲ့ကြသော်လည်း ယခုအခါတွင်မူ အခြေအနေ၏ စိုးရိမ်ရမှုကို သဘောပေါက်လာကြပြီဖြစ်ကြောင်း အဆိုပါသတင်းစာက မှတ်ချက်ပြုခဲ့သည်။