အမေရိကန်နဲ့ အီရန်နိုင်ငံကြား နားလည်မှုစာချွန်လွှာတစ်စောင် လက်မှတ်ရေးထိုးလိုက်ပြီဆိုတာကို အမေရိကန် သမ္မတ ဒေါ်နယ်ထရန့်က အတည်ပြုလိုက်ပါတယ်။
ပြင်သစ်သမ္မတ အန်မန်နျူရယ် မက်ခရွန်နဲ့ တွေ့ဆုံပြီးတဲ့နောက်မှာ ထရန့်က “လက်မှတ်ထိုးပြီးသွားပါပြီ” လို့ ပြောခဲ့တာပါ။ သတင်းထောက်တွေကိုလည်း “ကျွန်တော် ဗာဆိုင်းနန်းတော်မှာ လက်မှတ်ထိုးခဲ့တာ၊ ခုတင်တင်ပဲ လက်မှတ်ထိုးလိုက်တာပါ” လို့ ထပ်ပြောခဲ့ပါသေးတယ်။
အဲဒီမတိုင်ခင်ကလည်း NewsNation သတင်းဌာနရဲ့ သတင်းထောက် ကယ်လီ မေယာက အမေရိကန် အရာရှိတစ်ယောက်ရဲ့ ပြောပြချက်ကို ကိုးကားပြီး အမေရိကန်သမ္မတ ဒေါ်နယ်ထရန့်နဲ့ အီရန်သမ္မတ မာဆု ပီဇက်ရှ်ကီယန်တို့ နားလည်မှုစာချွန်လွှာ လက်မှတ်ရေးထိုးခဲ့ကြတယ်လို့ ပြောခဲ့ပါတယ်။
Axios သတင်းဌာနရဲ့ သတင်းထောက် ဘာရက် ရာဗစ်ဒ်ကလည်း “သမ္မတ ထရန့်ဟာ ဗာဆိုင်းနန်းတော်မှာ ပြင်သစ်သမ္မတနဲ့ ညစာစားနေတုန်း ဒီသဘောတူညီချက်စာချုပ်ပေါ်မှာ လက်မှတ်ထိုးခဲ့တာ” လို့ ဆိုပါတယ်။ အဲဒီသတင်းထောက်ရဲ့ အဆိုအရ “လက်မှတ်ထိုးထားတဲ့ စာရွက်စာတမ်း ဓာတ်ပုံကို အီရန်ဘက်နဲ့ ကြားဝင်စေ့စပ်ပေးနေတဲ့ နိုင်ငံတွေဆီကို ပို့ပေးလိုက်ပြီ” လို့လည်း သိရပါတယ်။