နိုင်ငံရေးသဘောထားကွဲလွဲမှုများနှင့် အခြားအကြောင်းမျိုးမျိုးကြောင့် အမေရိကန်နိုင်ငံအပါအဝင် အခြားနိုင်ငံများသို့ရောက်ရှိနေသည့် မြန်မာနိုင်ငံသားများ မိခင်နိုင်ငံသို့ပြန်လာလိုပါက ကြိုဆိုကြောင်း နိုင်ငံတော်ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။
ပြည်ထောင်စုသမ္မတမြန်မာနိုင်ငံတော်နှင့် ဘယ်လာရုစ်သမ္မတနိုင်ငံတို့အကြား နှစ်နိုင်ငံတွေ့ဆုံဆွေးနွေးပွဲတွင် ထည့်သွင်းပြောကြားခဲ့ခြင်းဖြစ်သည်။
ပြီးခဲ့သည့် ၂၅ ရက်နေ့တွင် အမေရိကန်နိုင်ငံ၊ အမိမြေလုံခြုံရေးဝန်ကြီးဌာနအနေဖြင့် ၎င်းတို့နိုင်ငံသို့ ရောက်ရှိနေသည့် မြန်မာနိုင်ငံသား ၄၀၀၀ ခန့်အား TPS – Temporary Protected Status ပေးထားမှုမှ ရုတ်သိမ်း၍ ရက်ပေါင်း ၆၀ အတွင်း ပြန်လည်စေလွှတ်သွားမည်ဟု ထုတ်ပြန်ထားကြောင်း၊ နိုင်ငံရေးသဘောထားကွဲလွဲမှုများနှင့် အခြားအကြောင်းမျိုးမျိုးကြောင့် အမေရိကန်နိုင်ငံအပါအဝင် အခြားနိုင်ငံများသို့ ရောက်ရှိနေသည့် မြန်မာနိုင်ငံသားများရှိကြောင်း၊ ၎င်းတို့အမိမြန်မာနိုင်ငံသို့ပြန်လာမည်ဆိုပါက မိမိတို့အနေဖြင့် ကြိုဆိုသည်ကိုပြောကြားလိုကြောင်း နိုင်ငံတော်ယာယီသမ္မတ နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌက ပြောသည်။
ထို့ပြင် ၎င်းတို့အနေဖြင့် ဆန္ဒရှိမည်၊ ရွေးကောက်ပွဲကာလနှင့် အကျုံးဝင်မည်၊ မဲစာရင်းတွင်ပါဝင်မည်ဆိုပါက ရွေးကောက်ပွဲတွင် ဆန္ဒမဲလာရောက်ပေးနိုင်ရေး ဆောင်ရွက်ပေးသွာမည်ကို မိမိအနေဖြင့် အဆွေတော်အား အသိပေးပြောကြားလိုကြောင်း၊ မြန်မာနိုင်ငံအနေဖြင့် မိမိတို့နိုင်ငံ၏အခြေအနေနှင့်ကိုက်ညီသည့် နိုင်ငံရေးစနစ်ကိုကျင့်သုံးရာတွင် ဘယ်လာရုစ်နိုင်ငံအနေဖြင့် ထောက်ခံအားပေး ကူညီမှုများအတွက်လည်းကျေးဇူးတင်ရှိကြောင်း၊ မိမိတို့နိုင်ငံတွင် ရွေးကောက်ပွဲ ကျင်းပပြုလုပ်ပြီးချိန်၌ နှစ်နိုင်ငံပူးပေါင်းဆောင်ရွက်မှုများ ဆက်လက် တိုးမြှင့်ဆောင်ရွက်သွားနိုင်မည်ဟု ယုံကြည်ကြောင်း နိုင်ငံတော်ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌက ဆက်လက်ပြောကြားခဲ့သည်။