အမေရိကန်ဓားစာခံပြန်လွှတ်ပေးရန် ဟာမတ်စ်သဘောတူ

ပါလက်စတိုင်း ဟာမတ်စ်အဖွဲ့သည် အမေရိကန်နိုင်ငံသား အစ္စရေးလူမျိုး ဓားစာခံတစ်ဦးကို လွှတ်ပေးရန် သဘောတူကြောင်း သူတို့၏ Telegram လိုင်းတွင် အတည်ပြုထုတ်ပြန်ခဲ့သည်။

“လွန်ခဲ့သည့် ရက်အနည်းငယ်အတွင်း ဟာမတ်စ်အဖွဲ့သည် ထရမ့်အုပ်ချုပ်ရေးအဖွဲ့နှင့် ဆွေးနွေးညှိနှိုင်းမှုများ ပြုလုပ်ခဲ့ပြီး ယင်းဆွေးနွေးမှုများအပြီးတွင် အပြုသဘောဆောင်သော သဘောထားကို ပြသရန်နှင့် အစ္စရေးနှင့် နှစ်နိုင်ငံသား ပြန်ပေးဆွဲခံထားရသူ Edan Alexander ကို လွှတ်ပေးရန် ဆုံးဖြတ်ခဲ့သည်” ဟု ၎င်းတို့၏ ထုတ်ပြန်ချက်တွင် ဖော်ပြထားသည်။

ထိုသို့ပြုလုပ်ရာတွင် ဟာမတ်စ်အဖွဲ့က ထိုသုံ့ပန်းလွှတ်ပေးမှုသည် ဂါဇာကမ်းမြှောင်ဒေသတွင် စစ်ရေးပစ်ခတ်မှုရပ်စဲရေး အာမခံချက်များအဖြစ် “နယ်စပ်ရှိ စစ်ဆေးရေးဂိတ်အားလုံးကို ဖွင့်ပေးခြင်း” နှင့် “လူသားချင်းစာနာထောက်ထားမှု အကူအညီများ သွင်းခွင့်ပြုခြင်း” အပါအဝင် အစီအမံများ၏ တစ်စိတ်တစ်ပိုင်းဖြစ်သင့်ကြောင်း အတိအလင်း ဖော်ပြခဲ့သည်။

ဧပြီလ ၁၅ ရက်နေ့တွင် ဟာမတ်စ်အဖွဲ့က Edan Alexander ထိန်းသိမ်းခံထားရသည့် နေရာကို အစ္စရေးတို့က ဗုံးကြဲတိုက်ခိုက်ခဲ့ပြီး သူ့အား စောင့်ကြပ်နေသည့် လက်နက်ကိုင်များနှင့် ဆက်သွယ်မှု ပြတ်တောက်သွားခဲ့ကြောင်း သတင်းထုတ်ပြန်ခဲ့သည်။ ထို့နောက်ပိုင်းတွင်မူ ထိုသူ၏ အခြေအနေနှင့်ပတ်သက်၍ တရားဝင်ထုတ်ပြန်ချက် မရှိတော့ပေ။

ဧပြီလ ၂၉ ရက်နေ့တွင်မူ ဟာမတ်စ်နှင့် နီးစပ်သည့် Maan သတင်းဌာနက ဂါဇာနှင့်ပတ်သက်သည့် သွယ်ဝိုက်ညှိနှိုင်းမှုများတွင် Edan Alexander အပါအဝင် အစ္စရေးသုံ့ပန်းများအား မေလအတွင်း လွှတ်ပေးရန် သဘောတူညီမှု ရရှိခဲ့ကြောင်း သတင်းထုတ်ပြန်ခဲ့သည်။