အနူတင်ကို ဝန်ကြီးချုပ်ကိုယ်စားလှယ်လောင်းအဖြစ် Bhumjaithai ပါတီ ရွေးချယ်

 ထိုင်းယာယီဝန်ကြီးချုပ် အနူတင်ချန်ဗီရာကူလ်ကို ဖေဖော်ဝါရီလဆန်းပိုင်းတွင် ကျင်းပရန်စီစဉ်ထားသည့် အထွေထွေရွေးကောက်ပွဲတွင် ဝန်ကြီးချုပ်ကိုယ်စားလှယ်လောင်းအဖြစ် တင်သွင်းရန် ဗုဒ္ဓဟူးနေ့တွင် ၎င်း၏ပါတီက တရားဝင်ရွေးချယ်လိုက်သည်။
         
ဝန်ကြီးချုပ်အဖြစ် ရွေးချယ်တင်မြှောက်ခံရအပြီး ရက်ပေါင်း ၁၀၀ မပြည့်မီတွင် ၎င်း၏ လူနည်းစုအစိုးရအပေါ် အယုံအကြည်မရှိအဆိုတင်သွင်းခံရနိုင်သည့် အလားအလာနှင့် ရင်ဆိုင်ခဲ့ရပြီးနောက် အနူတင်သည် ယခုလအစောပိုင်းတွင် ပါလီမန်ကို ဖျ-က်သိမ်းခဲ့သည်။ ပါလီမန်ဖျ-က်သိမ်းလိုက်မှုကြောင့် ဖေဖော်ဝါရီလ ၈ ရက် နေ့တွင် ကြားဖြတ်ရွေးကောက်ပွဲကျင်းပရန် အခြေအနေကိုဖြစ်ပေါ်စေခဲ့သည်။
       
သူနှင့် Bhumjaithai ပါတီသည် အာဏာပြန်လည်ရယူရန် ပြင်ဆင်ထားပြီးဖြစ်ကြောင်းနှင့် လာမည့်ရွေးကောက်ပွဲသည် ၂၀၀၈ ခုနှစ်တွင် ပါတီကို စတင်ဖွဲ့စည်းခဲ့ပြီးနောက်ပိုင်း ကွန်ဆာဗေးတစ်ပါတီအတွက် အရေးအပါဆုံး ရွေးကောက်ပွဲဖြစ်ကြောင်း ဗုဒ္ဓဟူးနေ့က ပါတီဝင်များနှင့် ပါတီထောက်ခံသူများကို မိန့်ခွန်းပြောကြားရာတွင် အနူတင်က ထည့်သွင်းပြောကြားခဲ့သည်။
        
“ထိုင်းနိုင်ငံနဲ့ ပြည်သူတွေရဲ့အကျိုးကို သယ်ပိုးဖို့ရာ ရွေးကောက်ပွဲကို ဝင်ရောက်ယှဉ်ပြိုင်ဖို့ ဒီနေ့မှာ ကျွန်တော်တို့ လုံး၀ အသင့်ဖြစ်နေပါပြီ” ဟု ၎င်းက ပြောဆိုခဲ့သည်။ ထိုင်းပြည်သူများက Bhumjaithai ပါတီအပေါ် ပထမဆုံးအကြိမ် မျှော်လင့်ချက်ကြီးမားစွာထားရှိနေချိန်ဖြစ်ကြောင်းလည်း ၎င်းက ဆိုခဲ့သည်။
       
ပြန်လည်ရွေးကောက်တင်မြှောက်ခံရပါက ဘဏ္ဍာရေးဝန်ကြီး၊ နိုင်ငံခြားရေးဝန်ကြီးနှင့် ကူးသန်းရောင်းဝယ်ရေးဝန်ကြီးအပါအဝင် လက်ရှိ၎င်းအစိုးရအဖွဲ့၏ အဖွဲ့ဝင်များသည် ၎င်းတို့၏ ရာထူးများကို ပြန်လည်ရရှိမည်ဖြစ်ကြောင်း အနူတင်က ပြောကြားခဲ့သည်။
       
အိမ်စောင့်အစိုးရဝန်ကြီးချုပ်သည် ၎င်း၏ ရာထူးသက်တမ်းအတွင်း ပြန်လည်ပေါ်ပေါက်လာသော ကမ္ဘောဒီးယားနှင့် ပဋိပက္ခကြောင့် ဖြစ်ပေါ်လာသည့် အမျိုးသားရေးစိတ်ဓာတ်နိုးကြားလာမှုကို အသုံးချရန် ကြိုးပမ်းနေသည်။

သို့သော်လည်း ရွေးကောက်ပွဲသည် အကြိတ်အနယ်ယှဉ်ပြိုင်ရနိုင်ပြီး မည်သည့်ပါတီမျှ အစိုးရဖွဲ့နိုင်လောက်သည့် မဲအပြတ်အသတ်အနိုင်ရမှုမျိုး မရှိနိုင်ကြောင်း လေ့လာသူများက သတိပေးခဲ့သည်။

Ref: သည်ဗိုက်ဘ်စ်