အမေရိက၏ မဟာမိတ်နိုင်ငံကို ကသောင်းကနင်းအခြေအနေအတွင်း ကျဆင်းစေခဲ့သည့် စစ်အုပ်ချုပ်ရေးအမိန့် ကာလတိုပြဌာန်းခဲ့မှုအတွက် သူ့အပေါ်စွပ်စွဲပြစ်တင်ခြင်းအဆိုကို မဲခွဲဆုံးဖြတ်ရာတွင် သူ့ပါတီအမတ်များကပါ အတိုက်အခံတို့နှင့် ပူးပေါင်းသွားနိုင်ခြေရှိလာသဖြင့် အဆိုပါကိစ္စအတွက် အဆုံးအထိ တိုက်ပွဲဝင်သွားမှာဖြစ်ကြောင်း တောင်ကိုရီးယားသမ္မတ ယွန်းဆွတ်ယိုးလ်က ဒီဇင်ဘာ ၁၂ ရက်တွင် ပြောကြားလိုက်သည်။
ရှည်လျားသော ရုပ်သံမိန့်ခွန်းတွင် အာရှ၏ စတုတ္ထမြောက်စီးပွားရေးအင်အားကြီးနိုင်ငံ၏ခေါင်းဆောင်က မြောက်ကိုရီးယားသည် တောင်ကိုရီးယားရွေးကောက်ပွဲကော်မရှင်ကို ဟက်လုပ်ခဲ့ကြောင်းနှင့် ဧပြီလက သူ့ပါတီ၏ ရွေးကောက်ပွဲ ၌ အပြတ်အသတ်အနိုင်ရခဲ့မှုကို သံသယဖြစ်စေခဲ့ကြောင်း ပြောကြားသွားခဲ့သည်။
မစ္စတာယွန်းအနေဖြင့် သူ့ပါတီ မဟာမိတ်များက သူ့ဘက်တွင် ထောက်ခံရပ်တည်လိမ့်မည်ဟု မျှော်လင့်ထားသော်လည်း သူ၏ အာဏာရပါတီ PPP ခေါင်းဆောင်ကိုယ်တိုင်က မစ္စတာယွန်းကို ရာထူးမှနုတ်ထွက်လျှင်ထွက်ရန် သို့မဟုတ်ပါက လွှတ်တော်တွင် စွပ်စွဲပြစ်တင်မှုလုပ်ရန် အချိန်တန်ပြီဟု တုန့်ပြန်လာမှုကြောင့် အဆိုပါမျှော်လင့်ချက်သည် အလားအလာနည်းလာခဲ့သည်။
သူ့ပါတီမှ အနည်းဆုံး အမတ် ၇ ဦးခန့် သည် ဒုတိယအကြိမ် စွပ်စွဲပြစ်တင်ခြင်းအဆိုကို မဲခွဲမှုကို ထောက်ခံဖွယ်ရှိနေပြီး ယင်းတွင် ပါတီဝင်အမတ်နှစ်ဦးက ထောက်ခံမဲပေးမည်ဟု လူသိရှင်ကြား ထုတ်ဖော်ပြောဆိုထားသည်။ ယွန်းအပေါ် စွပ်စွဲပြစ်တင်မှုအဆိုအတွက် PPP ပါတီထံမှ အနည်းဆုံး ထောက်ခံမဲ ၈ မဲရရှိရုံဖြင့် အဆိုအောင်မြင်ရန်အတွက် လိုအပ်သော မဲအများစု သုံးပုံနှစ်ပုံကို ရရှိသွားမည်ဖြစ်သည်။
အတိုက်အခံတို့သည် ဒီမိုကရေစီနည်းကျ ရွေးကောက်တင်မြှောက်ထားသည့် သမ္မတကို ရာထူးမှဖြုတ်ချရန် ကြိုးစားခြင်းဖြင့် မိုက်မဲစွာ ဟန်ရေးပြ ကြုံးဝါးနေသည်ဟု မစ္စတာယွန်းက ပြောဆိုခဲ့သည်။
“ကျွန်တော်အဆုံးအထိ တိုက်ပွဲဝင်သွားမှာပါ၊ သူတို့ ကျွန်တော်ကို စွပ်စွဲပြစ်တင်သည်ဖြစ်စေ စုံစမ်းစစ်ဆေးသည်ဖြစ်စေ အားလုံးရှင်းသွားသည်အထိ ရင်ဆိုင်သွားမှာပါ” ဟု သူက ပြောဆိုခဲ့သည်။
Ref: သည်စရိတ်တိုင်းမ်စ်