ကျန်းမာရေးဝန်ကြီးဌာနနှင့် ပဲခူးတိုင်းအစိုးရအဖွဲ့တို့၏ လမ်းညွှန်မှုဖြင့် ပဲခူးမြို့၊ ခုတင် (၅၀၀) ဆံ့ အထွေထွေရောဂါကုဆေးရုံကြီးမှ အထူးကုဆရာဝန်ကြီးများပါဝင်သော ကျန်းမာရေးဝန်ထမ်းများသည် နိုဝင်ဘာ ၉ ရက်က အင်းတကော်မြို့ရှိ ကျေးလက်ကျန်းမာရေးဌာနတွင် ကျန်းမာရေးစောင့်ရှောက်မှုအဖြစ် ကွင်းဆင်းကုသပေးခဲ့ကြသည်။
အထွေထွေရောဂါသမားတော်၊ ခွဲစိတ်အထူးကု၊ သားဖွားမီးယပ်အထူးကု၊ ကလေးအထူးကု၊ မျက်စိအထူးကု၊ နားနှာခေါင်းလည်ချောင်းအထူးကု၊ အကြောအဆစ်အထူးကု၊ ဓါတ်မှန်အထူးကု၊ သွားနှင့် ခံတွင်းအထူးကု၊ စိတ်ကျန်းမာရေးအထူးကုဆရာဝန်ကြီးများနှင့် ကျန်းမာရေးဝန်ထမ်းများက လူနာ (၇၀၀) ဦးကျော်အား ကျန်းမာရေးစစ်ဆေးကုသပေးခဲ့ကြသည်။
ထိုသို့ ကျန်းမာရေးစစ်ဆေးကုသပေးခြင်းအား ပဲခူးတိုင်းဝန်ကြီးချုပ်ဦးမျိုးဆွေဝင်းနှင့် ဇနီးတို့ကကြည့်ရှုအားပေး၍ လာရောက်ပြသသူများအား နေ့လည်စာထမင်းဗူးနှင့် ရေသန့်တို့ကိုလိုက်လံပေးအပ်ပြီး အထူးကုဆရာဝန်ကြီးများနှင့် ကျန်းမာရေးဝန်ထမ်းများကို ဂုဏ်ပြုချီးမြှင့်ငွေများပေးအပ်ခဲ့သည်။