အခြေခံစားသောက်ကုန်ပစ္စည်းများကို နေ့စဉ်မဖြစ်မနေဝယ်ယူစားသုံးနေရသည့်ပြည်သူများ ကုန်ဈေးနှုန်းကြီးမားမှုမရှိစေရန် ကြိုးပမ်းဆောင်ရွက်လျက်ရှိသည်ဟု နစက ဥက္ကဋ္ဌမှ ဇွန် ၁၀ ရက်နံနက်ပိုင်းက ရန်ကုန်တိုင်း၊ကျောက်တန်းမြို့နယ်၊ရန်ကုန်မြစ်နှင့်မှော်ဝန်းချောင်းကြားနေရာရှိ သီလဝါဘက်စုံစိုက်ပျိုးမွေးမြူရေးဇုန် အကောင်အထည်ဖော်နေမှုအား ကြည့်ရှုစစ်ဆေးစဥ်ပြောကြားခဲ့ခြင်းဖြစ်သည်။
ပြည်သူလူထုအနေဖြင့် အခြေခံစားသောက်ကုန်ပစ္စည်းများကို နေ့စဉ်မဖြစ်မနေဝယ်ယူစားသုံးနေရ၍ အခြေခံစားကုန်များဈေးနှုန်းကြီးမားမှုမရှိစေရန် မိမိတို့အနေဖြင့် ကြိုးပမ်းဆောင်ရွက်လျက်ရှိသည်ဟု ဆိုသည်။
ရန်ကုန်မြို့သို့ ရှမ်းပြည်နယ်(တောင်ပိုင်း)၊အေးသာယာမှ ကြက်ဥများ၊ ပဲခူးတိုင်းနှင့်ဧရာဝတီ တိုင်းတို့မှ ဘဲဥများကိုများစွာတင်ပို့ရောင်းချရာတွင် ကျသင့်သည့်သယ်ယူပို့ဆောင်ခများထက် ရောင်းချသည့်ဈေးနှုန်းများမှာ များစွာကွာခြားလျက်ရှိပြီး ပိုမိုဈေးတင်ထားသည်ကိုတွေ့ရှိရသဖြင့် ဝိသမလောဘသားများ၏ ထိုက်သင့်သည့်ဈေးထက် ပိုမိုဈေးတင်ရောင်းချနေခြင်းအား တာဝန်ရှိသူများမှစိစစ်ရမည်ဟု မှာကြားခဲ့သည်။
ထို့ပြင် အစိုးရအနေဖြင့် နိုင်ငံ့စီးပွားမြှင့်တင်ရေးကို အလေးထားအားပေးဆောင်ရွက်လျက်ရှိကာ မိမိတို့တာဝန်ယူစဥ် နိုင်ငံတည်ငြိမ်အေးချမ်းရေးနှင့်ဖွံ့ဖြိုးတိုးတက်ရေးကို မလိုလားသူများ၏ စီးပွားရေးပိတ်ဆို့ခြင်း၊ကုန်ပစ္စည်းများဈေးနှုန်းမြင့်တက်အောင်ဆောင်ရွက်ခြင်း၊ငွေကြေးလည်ပတ်မှုအခက်အခဲဖြစ်အောင် ဆောင်ရွက်ခြင်းများဖြင့် နိုင်ငံရေးအခက်အခဲအကြပ်အတည်းများဖြစ်အောင်ဆောင်ရွက်ခဲ့ကြသည်ဟု ဆိုသည်။
“မိမိတို့အနေနဲ အဲဒီအခက်အခဲတွေကို ကျော်လွှားနိုင်ခဲ့ပါတယ်၊ စားသောက်ကုန်တွေ ဈေးနှုန်းကြီးမြင့်မှုမရှိစေဖို့အတွက် စိုက်ပျိုးမွေးမြူရေး လုပ်ငန်းတွေကို တိုးတက်အောင်မြင်အောင်ဆောင်ရွက်ဖို့လိုပါတယ်၊ အဲဒီလို ဆောင်ရွက်ရာမှာလည်း စိုက်ပျိုးမွေးမြူရေးဧရိယာတွေ တိုးချဲ့တာထက် အထွက်နှုန်းတိုးတက်အောင် ဆောင်ရွက်ဖို့လိုပါတယ်”ဟု နစက ဥက္ကဋ္ဌကမှာကြားခဲ့သည်။
ထို့ပြင် ရန်ကုန်တိုင်းအတွင်း မွေးမြူရေးလုပ်ငန်းများကို စနစ်တကျဆောင်ရွက်၍ အထွက်နှုန်းတိုးတက်အောင်ဆောင်ရွက်ရမည်ဖြစ်ကာ အမှန်တကယ်အကျိုးရှိသည့် စိုက်ပျိုးမွေးမြူရေးလုပ်ငန်းများဖြစ်စေလိုပြီး ရန်ကုန်မြို့နေ လူဦးရေ၏စားရေးကိုအထောက်အကူပြုနိုင်ရမည်ဟုလည်း မှာကြားခဲ့သည်။
ထို့နောက် နစက ဥက္ကဋ္ဌသည် သီလဝါဘက်စုံစိုက်ပျိုးမွေးမြူရေးဇုန်တွင်မွေးမြူထားရှိသည့် ငါးအမျိုးအစားနမူနာပြသထားရှိမှုများ၊စိုက်ပျိုးမွေးမြူရေးလုပ်ငန်းများမှ ထွက်ရှိသည့် ဘဲဥ၊ထိုင်ဝမ်သင်္ဘောနို့ထွက်ပစ္စည်းများ၊ငါးသားဖောက်လုပ်ငန်း ဆောင်ရွက်နေမှု၊ငါးမွေးမြူထားရှိမှုနှင့်ဘဲမွေးမြူထားရှိမှု၊ငါးမွေးမြူရေးလုပ်ငန်းအဆင့်ဆင့်တို့ကို ကြည့်ရှုစစ်ဆေးခဲ့သည်။
