နိုင်ငံတော် အာဏာကို အကြမ်းဖက်နည်းလမ်းများဖြင့် ရယူရန်ကြိုးစားမှုများ ရှိနေဆဲဖြစ်ပြီး ရွေးကောက်ပွဲ ကျင်းပရန် ပြင်ဆင်ချိန်လိုအပ်နေဆဲ ဖြစ်သည့်အတွက် အရေးပေါ်ကာလ (၆) လ သက်တမ်းထပ်တိုးရန် ကာလုံအစည်းဝေးဆုံးဖြတ်လိုက်ကြောင်း သိရသည်။
ယနေ့ ဇူလိုင်လ (၃၁) ရက် နံနက်ပိုင်းက ကျင်းပသည့် အမျိုးသား ကာကွယ်ရေးနှင့် လုံခြုံရေးကောင်စီ အစည်းအဝေးတွင် ၂၀၂၃ ခုနှစ် ဖေဖေါ်ဝါရီ (၁) ရက်မှ ဇူလိုင်လ (၃၁) ရက်အထိ (၆) လတာ ကာလအတွင်း တိုင်းပြည်၏ အခြေအနေကို တပ်မတော် ကာကွယ်ရေး ဦးစီးချုပ်က တင်ပြခဲ့ခြင်းဖြစ်ပြီး ယင်းသို့ တင်ပြမှုကို ယာယီသမ္မတအပါအဝင် ကာလုံအဖွဲ့ဝင်များက ပြန်လည်သုံးသပ်ခဲ့ခြင်း ဖြစ်သည်။
ယင်းသို့ သုံးသပ်ရာတွင် အကြမ်းဖက် အဖွဲ့အစည်းများ အနေဖြင့် တိုင်းပြည်၏ တည်ငြိမ်အေးချမ်းရေးနှင့် တရားဥပဒေစိုးမိုးရေးကို ပျက်ပြားစေရုံသာမကဘဲ ပြည်သူလူထုကို အကြောက်တရားဖြင့်လွှမ်းမိုးကာ နိုင်ငံတော်၏ အာဏာကို အကြမ်းဖက်မှုနည်းလမ်းများဖြင့်ရယူရန် ကြိုးပမ်းလုပ်ဆောင်လျက်ရှိသည့် အခြေအနေရှိနေဆဲ ဖြစ်ကြောင်း ထည့်သွင်းဆွေးနွေးခဲ့ကြသည်။
ထို့အပြင် ရွေးကောက်ပွဲကျင်းပပြုလုပ်နိုင်ရေးအတွက် နိုင်ငံရေးပါတီများ၏ ပြင်ဆင်ချိန်၊ စည်းရုံးချိန်များတွင် လုံခြုံရေးအရခြိမ်းခြောက်မှုများ တွေ့ကြုံနေရခြင်း၊ မဲစာရင်းများ မှန်ကန်တိကျမှုရှိစေရေးအတွက် သန်းခေါင်စာရင်းကောက်ယူမှုလုပ်ငန်းများ ဆောင်ရွက်ဆဲဖြစ်ခြင်း၊ ရွေးကောက်ပွဲကျင်းပပြုလုပ်ရာတွင် လွတ်လပ်၍ တရားမျှတပြီး အကြောက်တရား ကင်းစွာဖြင့် မဲပေးနိုင်ရေးအတွက် လိုအပ်သည့် လုံခြုံရေးလုပ်ငန်းများဆောင်ရွက်ရန် လိုအပ်ဆဲ ဖြစ်ခြင်းတို့ကြောင့် အရေးပေါ်ကာလကို သက်တမ်းတိုးမြှင့်ပေးရန်လိုအပ်မည်ဖြစ်ကြောင်းလည်း ဆွေးနွေးခဲ့ကြသည်။
အဆိုပါ ဆွေးနွေးချက်၊ ဆုံးဖြတ်ချက်များအရ တပ်မတော်ကာကွယ်ရေးဦးစီးချုပ် အနေဖြင့် တာဝန်များပြီးမြောက်အောင် ဆောင်ရွက်နိုင်ရန်အတွက် ၂၀၀၈ ဖွဲ့စည်းပုံအခြေခံဥပဒေပုဒ်မ ၄၂၅ အရလည်းကောင်း၊ ၂၀၂ ၃ ခုနှစ်၊ ဖေဖော်ဝါရီ (၁) ရက်တွင် ထုတ်ပြန်ခဲ့သည့် နိုင်ငံတော်ဖွဲ့စည်းပုံအခြေခံ ဥပဒေဆိုင်ရာခုံရုံး၏ သဘောထားထုတ်ပြန်ချက်အရလည်းကောင်း နိုင်ငံတစ်ဝန်းလုံး အရေးပေါ်အ ခြေအနေကြေညာထားသည့်ကာလအား ၂၀၂၃ ခုနှစ် ဩဂုတ်လ (၁) ရက်မှစ၍ နောက်ထပ် (၆) လ သက်တမ်း တိုးမြှင့်လိုက်သည်။
ယနေ့ကျင်းပသည့် ကာလုံအစည်းအဝေးသို့ ယာယီသမ္မတ ဦးမြင့်ဆွေ၊ ဒုတိယသမ္မတ ဦးဟင်နရီဗန်ထီးယူ၊ ပြည်သူ့လွှတ်တော်ဥက္ကဋ္ဌ ဦးတီခွန်မြတ်၊တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်၊ ဒုတိယတပ်မတော်ကာကွယ်ရေးဦးစီးချုပ်၊ ကာကွယ်ရေးဦးစီးချုပ်(ကြည်း) ဒုတိယ ဗိုလ်ချုပ်မှူးကြီး စိုးဝင်း၊ ကာကွယ်ရေးဝန်ကြီးဌာန ပြည်ထောင်စုဝန်ကြီး ဗိုလ်ချုပ်ကြီး မြထွန်းဦး၊ ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယ ဗိုလ်ချုပ်ကြီး စိုးထွဋ်၊ နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဦးသန်းဆွေ၊ နယ်စပ်ရေးရာဝန်ကြီးဌာန ပြည်ထောင်စုဝန်ကြီး ဒုတိယ ဗိုလ်ချုပ်ကြီး ထွန်းထွန်းနောင်၊ အထူးဖိတ်ကြားထားသည့် နိုင်ငံတော်စီမံအုပ်ချုပ်ရေးကောင်စီ အတွင်းရေးမှူး ဒုတိယဗိုလ်ချုပ်ကြီး အောင်လင်းဒွေး၊ တွဲဖက် အတွင်းရေးမှူး ဒုတိယဗိုလ်ချုပ်ကြီး ရဲဝင်းဦး၊ ဥပဒေရေးရာဝန်ကြီးဌာန ပြည်ထောင်စုဝန်ကြီးနှင့် ပြည်ထောင်စု ရှေ့နေချုပ် ဒေါ်သီတာဦးတို့ တက်ရောက်ခဲ့ကြောင်း သိရသည်။
