တိုင်းနှင့်ပြည်နယ်အချို့တွင် ဖြစ်ပေါ်လျက်ရှိသည့် ဖောက်ခွဲမှုများ၊လုပ်ကြံသတ်ဖြတ်မှုများတွင် ဖမ်းဆီးရမိသူများဌားရမ်းနေထိုင်သည့် နေအိမ်တိုက်ခန်းများအား သက်သေခံအဖြစ်သိမ်းဆည်းပြီး တရားရုံးတွင်စစ်ဆေးပေါ်ပေါက်ပါက နိုင်ငံတော်ဘဏ္ဍာအဖြစ်သိမ်းဆည်းသွားမည်ဟု အကြမ်းဖက်မှုတိုက်ဖျက်ရေးဗဟိုအဖွဲ့မှထုတ်ပြန်ခဲ့သည်။
အကြမ်းဖက်သမားများကို ငှားရမ်းနေထိုင်ခွင့်ပြုသည့် နေအိမ်တိုက်ခန်းပိုင်ရှင်များနှင့်ပတ်သက်၍ သိရှိလိုက်နာနိုင်ရန်အသိပေးထုတ်ပြန်ချက်အဖြစ် ဇွန် ၁၂ ရက်က ထပ်မံအသိပေးထုတ်ပြန်ခဲ့ခြင်းဖြစ်သည်။
အကြမ်းဖက်လုပ်ငန်းလုပ်ဆောင်သူများသည် ၎င်းတို့အား အလွယ်တကူခြေရာခံနိုင်ခြင်းမရှိစေရန် အဆောင်များ၊နေအိမ်တိုက်ခန်းများတွင် ငှားရမ်းနေထိုင်ကာ အကြမ်းဖက်လုပ်ရပ်များကို လုပ်ဆောင်လျက်ရှိသည်ဟု ထုတ်ပြန်ချက်၌ရေးသားထားသည်။
ထို့ကြောင့် အဆောင်၊နေအိမ်တိုက်ခန်းပိုင်ရှင်များအနေဖြင့် ငှားရမ်းသူများ၏ ကိုယ်ရေးအချက်အလက်အထောက်အထားပြည့်စုံမှသာ ငှားရမ်းခြင်းနှင့်ယင်းအချက်အလက်အထောက်အထားများဖြင့် သက်ဆိုင်ရာရပ်ကွက်(သို့)ကျေးရွာအုပ်ချုပ်ရေးမှူးရုံးများသို့ ဧည့်စာရင်းတိုင်ကြားရမည်ဖြစ်သည်။
အကြမ်းဖက်မှုကျူးလွန်သည့် ငှားရမ်းနေထိုင်သူများအား အကြမ်းဖက်မှုတိုက်ဖျက်ရေးဥပဒေအရ အရေးယူရာတွင် ငှားရမ်းထားသည့် နေအိမ်၊တိုက်ခန်းများကို သက်သေခံအဖြစ်သိမ်းဆည်းကာ တရားရုံးတွင်စစ်ဆေးပေါ်ပေါက်ချက်အရ နိုင်ငံတော်ဘဏ္ဍာအဖြစ် သိမ်းဆည်းသွားမည်ဟု အကြမ်းဖက်မှုတိုက်ဖျက်ရေးဗဟိုအဖွဲ့က အသိပေးထုတ်ပြန်ထားပြီးဖြစ်သည်။
သို့ရာတွင် နေအိမ်တိုက်ခန်းပိုင်ရှင်အချို့သည် ဆက်လက်ငှားရမ်းပေးနေခြင်းမှာ အကြမ်းဖက်မှုများကို ဆက်လက်ကျူးလွန်နိုင်ရန် အားပေးကူညီရာရောက်ပြီး အကြမ်းဖက်မှုတိုက်ဖျက်ရေးဥပဒေတွင် အကြမ်းဖက်သမားများနှင့်အကြမ်းဖက်အုပ်စုများကို အဆောက်အအုံနှင့်နေရာတစ်ခုခုအား အသုံးပြုခွင့်၊ယာယီတည်းခိုနေထိုင်ခွင့်ပြုသူများသည် အကြမ်းဖက်သမားများနည်းတူ အကြမ်းဖက်မှုကို ကျူးလွန်ရာရောက်သည်ဟု ပြဋ္ဌာန်းထားသည်။
ထို့ကြောင့် ပြစ်မှုကျူးလွန်သူများအား ဖမ်းဆီးရမိချိန်တွင် နေအိမ်တိုက်ခန်းပိုင်ရှင်များအနေဖြင့် စနစ်တကျစိစစ်ငှားရမ်းခြင်း၊ဧည့်စာရင်းတိုင်ကြားထားခြင်းမရှိကြောင်းတွေ့ရှိပါက ငှားရမ်းထားသည့် နေအိမ်တိုက်ခန်းများကို သက်သေခံအဖြစ်သိမ်းဆည်းပြီး တရားရုံးတွင်စစ်ဆေးပေါ် ပေါက်ပါက နိုင်ငံတော်ဘဏ္ဍာအဖြစ်သိမ်းဆည်းကာ အကြမ်းဖက်မှုအား အားပေးကူညီသူအဖြစ် အရေးယူသွားမည်ဟု အသိပေးထုတ်ပြန်ခဲ့သည်။