ဧရာဝတီတိုင်း၊ဟင်္သာတမြို့ရှိ လယ်တီကွင်းမြို့ဝင်စစ်ဆေးရေးဂိတ်တွင် ဇန်နဝါရီ ၂ ရက်နံနက်ပိုင်းက ဖမ်းဆီးရမိခဲ့ခြင်းဖြစ်ကြောင်း သိရသည်။
ယင်းနေ့နံနက် ၁၀ နာရီခွဲခန့်က ဟင်္သာတမြို့ လယ်တီကွင်းမြို့ဝင်စစ်ဆေးရေးဂိတ်တွင် လုံခြုံရေးအဖွဲ့ဝင်များက မြို့တွင်းသို့ဝင်လာသည့်ကျောက်တင်ကားအားစစ်ဆေးရန် ရပ်တန့်ခိုင်းခဲ့သည်။
အဆိုပါ ကျောက်တင်ကားမှာ ရပ်တန့်ခြင်းမရှိဘဲ မောင်းနှင်ထွက်ပြေးသဖြင့် လုံခြုံရေးအဖွဲ့ဝင်များက လိုက်လံဖမ်းဆီးရာ ဟင်္သာတတက္ကသိုလ်ရှေ့၌ ဖမ်းဆီးရမိခဲ့ပြီး ကားမောင်းသူနှင့်ယာဥ်နောက်လိုက်တို့မှာ ထွက်ပြေးတိမ်းရှောင်သွားခဲ့ကြောင်း သိရသည်
လုံခြုံရေးအဖွဲ့ဝင်များက ကျောက်တင်ကားအားစစ်ဆေးရာ တစ်ဦးမှမတွေ့ရှိရသဖြင့် စုံစမ်းမှုများပြုလုပ်ရာ ကားပေါ်တွင်လိုက်ပါလာသည့် လူမျိုးခြားများသည် မြဝတီရပ်ကွက်အတွင်း ထွက်ပြေးတိမ်းရှောင်သွားကြောင်း ဖော်ထုတ်သိရှိခဲ့ရသည်။
ထို့ကြောင့် လူမျိုးခြားများအား ဖမ်းဆီးရမိရေးအတွက် ရပ်ကွက်တာဝန်ရှိသူများနှင့်အတူ ပိတ်ဆို့ရှာဖွေစစ်ဆေးရာမှ တရားမဝင်ဝင်ရောက်လာသည့် ဘင်္ဂလီလူမျိုး အမျိုးသား ၃၆ ဦးနှင့်အမျိုးသမီး ၃ ဦး(စုစုပေါင်း ၃၉ ဦး)တို့အား ဖမ်းဆီးရမိခဲ့သည်။
ဖမ်းဆီးရမိခဲ့သည့် ဘင်္ဂလီလူမျိုးများအား ဥပဒေအရအရေးယူရန် သက်ဆိုင်ရာရဲစခန်းသို့ပို့ဆောင်၍ စစ်ဆေးလျက်ရှိကာ ထွက်ပြေးတိမ်းရှောင်သွားသည့် ကျောက်တင်ကားမောင်းသူနှင့်ယာဥ်နောက်လိုက်တို့အား ဖမ်းဆီးရမိရေးအတွက် စုံစမ်းလျက်ရှိကြောင်း သိရသည်။
