သုခဒဂုံ ပြည်သူ့အငှားအိမ်ရာစီမံကိန်းမှ ပထမအဆင့် ပြီးစီးမည့် တိုက်ခန်း (၁၂၀၀) ခန့်ကို စတင်ငှားရမ်းနေထိုင်ခွင့်ပြုမည်ဖြစ်ကြောင်း ဇူလိုင်လ ၂၁ ရက်က DUHD-Ygn က ထုတ်ပြန်ကြေညာခဲ့သည်။
ရန်ကုန်တိုင်းဒေသကြီး၊ ဒဂုံမြို့သစ်(တောင်ပိုင်း)မြို့နယ်၊ အမှတ် (၂)လမ်းမကြီးအနီး နှင့် မြို့ပတ်လမ်းတွင် တည်ဆောက်လျက်ရှိသည့် သုခဒဂုံ ပြည်သူ့အငှားအိမ်ရာစီမံကိန်းမှ ပထမအဆင့် ပြီးစီးမည့် တိုက်ခန်း (၁၂၀၀) ခန့်တွင် ဝင်ငွေနည်းပြီး နေရေးအခက်အခဲရှိသော ပြည်သူ၊ အငြိမ်းစားဝန်ထမ်းနှင့် တာဝန်ထမ်းဆောင်ဆဲ နိုင်ငံ့ ဝန်ထမ်းများကို (၅)နှစ် သက်တမ်းဖြင့် စတင်ငှားရမ်းနေထိုင်ခွင့်ပြုသွားဖြစ်ကြောင်း သိရသည်။
အမှန်တစ်ကယ် နေရေးအခက်အခဲ ရှိသူများအနေဖြင့် သက်ဆိုင်ရာ မြို့နယ်အထွေထွေ အုပ်ချုပ်ရေးမှုးရုံးများတွင် လျှောက်လွှာများ ဝယ်ယူ၍ ဇူလိုင်လ ၃၁ ရက် နောက်ဆုံးထားပြီး လျှောက်လွှာများ ပြန်လည်တင်ပြရန် အသိပေးထုတ်ပြန်ထားသည်။
အိမ်ခန်းငှားရမ်းခြင်း သက်တမ်းမှာငါးနှစ်ဖြစ်ပြီး ငါးနှစ်နေထိုင်ပြီးပါက အိမ်ခန်းကို ပြန်လည်အပ်နှံရမည်ဖြစ်ကာ တစ်လငှားရမ်းခနှုန်းထားများမှာ ပထမထပ် – ၆၇၀၀၀ ကျပ်၊ ဒုတိယထပ် – ၆၀၀၀၀ ကျပ်၊ တတိယထပ် – ၅၅၀၀၀ ကျပ်၊ စတုတ္ထထပ် – ၄၆၀၀၀ ကျပ်တို့ဖြစ်ကြောင်း သိရသည်။
သုခဒဂုံပြည်သူ့အငှားအိမ်ရာသည် အမှန်တစ်ကယ်နေရေးအခက်အခဲရှိသော ပြည်သူများ၊ အငြိမ်းစားနိုင်ငံ့ဝန်ထမ်းများနှင့် ဝန်ထမ်းအိမ်ရာမရှိသဖြင့် နေရေးအခက်အခဲရှိနေသော တာဝန်ထမ်းဆောင်ဆဲ နိုင်ငံ့ဝန်ထမ်းများအတွက် ရည်ရွယ်ထားကြောင်း သိရသည်။
ပြည်သူများ၊ အငြိမ်းစားဝန်ထမ်းများနှင့် နိုင်ငံ့ဝန်ထမ်းများအနေဖြင့် အိမ်ခန်းလျှောက်လွှာများကို မိမိတို့ သက်ဆိုင်ရာမြို့နယ်အုပ်ချုပ်ရေးမှူးရုံးများတွင် ဝယ်ယူပြီး သတ်မှတ်ပုံစံများအတိုင်း ဖြည့်စွက်၍ မိမိတို့ဝယ်ယူခဲ့သည့်နေရာမှာပင် သတ်မှတ်ရက်အတွင်း လျှောက်လွှာများကို ပြန်လည်တင်ပြသွားရမည်ဖြစ်သည်။
ရန်ကုန်တိုင်းဒေသကြီးအတွင်း တာဝန်ထမ်းဆောင်ဆဲ နိုင်ငံ့ဝန်ထမ်းများအနေဖြင့် မိမိတို့၏ သက်ဆိုင်ရာဌာနများမှ စုစည်း၍ ဌာနအလိုက် မြို့ပြနှင့်အိမ်ရာဖွံ့ဖြိုးရေးဦးစီးဌာ၊ ရန်ကုန်တိုင်းဒေသကြီး ညွှန်ကြားရေးမှူးရုံးတွင် ဝယ်ယူ၍ လျှောက်လွှာများကို ပြန်လည်တင်ပြသွားရမည်ဖြစ်ကြောင်း သိရသည်။
သုခဒဂုံပြည်သူ့အငှားအိမ်ရာစီမံကိန်းသည် အမှတ် (၂) လမ်းနှင့် အမှတ် (၇) မြိုပတ်လမ်းဆုံအနီးရှိ မြေဧရိယာ ၁၇၁ ဧကတွင် ဆောင်ရွက်လျက်ရှိပြီး ပထမအဆင့်အဖြစ် အဆောက်အအုံ ၁၉၄ လုံး၊ အခန်း ၃၁၀၄ ခန်းကို ဆောက်လုပ်လျက်ရှိကြောင်းနှင့် မြန်မာနိုင်ငံဆောက်လုပ်ရေးဆိုင်ရာလုပ်ငန်းရှင်များအသင်းချုပ် (MCEF) နှင့် မြန်မာနိုင်ငံလိုင်စင်ရ ကန်ထရိုက်တာများအသင်းချုပ် (MLCA) တို့မှ အဆောက်အအုံ ၉၇ လုံးစီ ခွဲဝေဆောက်လုပ်ခြင်းဖြစ်ကြောင်းသိရသည်။
