ရန်ကုန်တိုင်းဒေသကြီး၊ ဒဂုံမြို့သစ်(တောင်ပိုင်း)ရှိ သုခဒဂုံ ပြည်သူ့အငှားအိမ်ရာစီမံကိန်း နေထိုင်ခွင့်အတွက် လျှောက်လွှာ (၁၆၀၀၀) ကျော် ရောင်းချထားပြီး ပထမအဆင့်အဖြစ် ဆောက်လုပ်ပြီးစီးသည့် တိုက်ခန်း(၁,၁၆၈)ခန်းကို ဝင်ငွေနည်းပြီး နေထိုင်ရေးအခက်အခဲရှိသည့် ပြည်သူများ၊ အငြိမ်းစားဝန်ထမ်းနှင့် တာဝန်ထမ်းဆောင်ဆဲနိုင်ငံ့ဝန်ထမ်းများကို ဩဂုတ်လတွင် စတင်ငှားရမ်းနေထိုင်ခွင့်ပြုသွားမည်ဖြစ်ကြောင်း တိုင်းဒေသကြီး မြို့ပြနှင့်အိမ်ရာဖွံ့ဖြိုးရေးဦးစီးဌာနမှ သိရသည်။
‘’ သုခဒဂုံပြည်သူ့အငှားအိမ်ရာ စီမံကိန်းကို ကျွန်တော်တို့က အခန်းပေါင်း (၃၀၀၀) ကျော် ဆောက်လုပ်နေတာဖြစ်ပြီး အဲဒီအထဲမှာ ပြီးစီးမှုအနေနဲ့ အဆင့် (၃) ဆင့်ခွဲပြီးတော့မှ နေရာချထားရေး ဆောင်ရွက်မှာ ဖြစ်ပါတယ်။ ပထမအဆင့်အနေနဲ့ အခု ၈ လပိုင်းမှာ ပြီးစီးအောင်လျာထားပါတယ်။ အခန်း (၁၁၆၈) ခန်း ပြီးဖို့အတွက် လျာထားပါတယ်။ ပထမအဆင့်အတွက် လျှောက်လွှာဖြန့်ဝေတဲ့အခါမှာ ပြည်သူနဲ့ အငြိမ်းစားကို ခရိုင် (၁၄) ခရိုင်ကတစ်ဆင့် မြို့နယ်တွေကို ဖြန့်ပါတယ်။ စုစုပေါင်း ပြည်သူ (၁၀၀၀၀) လောက် ဖြန့်ပြီးပါပြီ။ အငြိမ်းစားအတွက်တော့ (၃၈၀၀) လောက်ဖြန့်ထားပါတယ်။ လျှောက်လွှာတွေကို လိုလို့ရှိရင် လိုသလောက် ဝယ်လို့ရအောင် ဖြန့်ဝေပေးထားပါတယ်။ ဇူလိုင်လ ၂၈ ရက်နေ့အထိ ပြည်သူ (၈၀၀၀) ကို ရောင်းထားပြီးဖြစ်ပါတယ်။ အငြိမ်းစားအတွက် (၂၄၀၀) လောက် ရောင်းထားပြီးဖြစ်ပါတယ်။ ဝန်ထမ်းကတော့ (၆၅၀၀) လောက် ရောင်းထားပြီးဖြစ်ပါတယ်” ဟု တိုင်းဒေသကြီး မြို့ပြနှင့်အိမ်ရာဖွံ့ဖြိုးရေးဦးစီးဌာနမှ တာဝန်ရှိသူတစ်ဦးက ပြောကြားသည်။
အမှန်တစ်ကယ် နေရေးအခက်အခဲ ရှိသူများအနေဖြင့် သက်ဆိုင်ရာ မြို့နယ်အထွေထွေ အုပ်ချုပ်ရေးမှုးရုံးများတွင် လျှောက်လွှာများ ဝယ်ယူ၍ ဇူလိုင်လ ၃၁ ရက် နောက်ဆုံးထားပြီး လျှောက်လွှာများ ပြန်လည်တင်ပြရန် အသိပေးထုတ်ပြန်ခဲ့သည်။
အိမ်ခန်းငှားရမ်းခြင်း သက်တမ်းမှာငါးနှစ်ဖြစ်ပြီး ငါးနှစ်နေထိုင်ပြီးပါက အိမ်ခန်းကို ပြန်လည်အပ်နှံရမည်ဖြစ်ကာ တစ်လငှားရမ်းခနှုန်းထားများမှာ ပထမထပ် – ၆၇၀၀၀ ကျပ်၊ ဒုတိယထပ် – ၆၀၀၀၀ ကျပ်၊ တတိယထပ် – ၅၅၀၀၀ ကျပ်၊ စတုတ္ထထပ် – ၄၆၀၀၀ ကျပ်တို့ဖြစ်ကြောင်း သိရသည်။
သုခဒဂုံပြည်သူ့အငှားအိမ်ရာစီမံကိန်းသည် အမှတ် (၂) လမ်းနှင့် အမှတ် (၇) မြိုပတ်လမ်းဆုံအနီးရှိ မြေဧရိယာ ၁၇၁ ဧကတွင် ဆောင်ရွက်လျက်ရှိပြီး ပထမအဆင့်အဖြစ် အဆောက်အအုံ ၁၉၄ လုံး၊ အခန်း ၃၁၀၄ ခန်းကို ဆောက်လုပ်လျက်ရှိကြောင်းနှင့် မြန်မာနိုင်ငံဆောက်လုပ်ရေးဆိုင်ရာလုပ်ငန်းရှင်များအသင်းချုပ် (MCEF) နှင့် မြန်မာနိုင်ငံလိုင်စင်ရ ကန်ထရိုက်တာများအသင်းချုပ် (MLCA) တို့မှ အဆောက်အအုံ ၉၇ လုံးစီ ခွဲဝေဆောက်လုပ်ခြင်းဖြစ်ကြောင်းသိရသည်။
