သီရိလင်္ကာတွင်လောင်စာဆီလုံးဝပြတ်တောက်

သီရိလင်္ကာတွင်လောင်စာဆီလုံးဝပြတ်တောက်

ကိုလမ်ဘို၊ဇွန် ၂၅

သီရိလင်္ကာတွင်လောင်စာဆီနှင့် ဒီဇယ်ဆီ တင်ပို့မှုများ အကန့်အသတ်မရှိနှောင့်နှေးခဲ့ပြီးနောက် ဓာတ်ဆီနှင့်ဒီဇယ်ပြတ်လုနီးပါးဖြစ်နေသည်ဟု စွမ်းအင်ဝန်ကြီးက စနေနေ့ (ဇွန် ၂၅ ရက်)တွင် ပိုမိုဆိုးရွားလာသော လောင်စာဆီအကျပ်အတည်းအတွက် တောင်းပန်စကားပြောကြားခဲ့သည်။

ပြီးခဲ့တဲ့အပတ်ကရောက်ရှိမည့် ရေနံ ကုန်စည်များ ရောက်မလာခဲ့သလို လာမည့် အပတ်တွင် ရောက်ရန်စီစဉ်ထားသော်လည်း “ဘဏ်လုပ်ငန်း” ကြောင့် သီရိလင်္ကာသို့ မရောက်နိုင်တော့ကြောင်း Kanchana Wijesekera ကပြောကြားခဲ့သည်။

သီရိလင်္ကာနိုင်ငံသည် အစားအသောက်၊ လောင်စာဆီနှင့် ဆေးဝါးများအပါအဝင် မရှိမဖြစ်လိုအပ်သော တင်သွင်းကုန်များအတွက်ပင် ငွေကြေးထောက်ပံ့ရန် နိုင်ငံခြားငွေပြတ်လပ်မှုနှင့် ရင်ဆိုင်နေရပြီး နိုင်ငံတကာအကူအညီများရရှိရန်ကြိုးပမ်းလျက်ရှိသည်။

Wijesekera ကနိုင်ငံပိုင် Ceylon ရေနံ‌ ကော်ပိုရေးရှင်းသည် နိုင်ငံတွင်းဆီပြန်လည်ထောက်ပံ့နိုင်မည့်အချိန်ကို အတိအကျမပြောနိုင်သေးကြောင်းပြောကြားခဲ့ပြီး CPC အနေဖြင့်လည်း ရေနံစိမ်းပြတ်လပ်မှုကြောင့် ၎င်း၏တစ်ခုတည်းသော ရေနံသန့်စင်စက်ရုံကိုပါပိတ်ထားရကြောင်း ၎င်းကဆက်လက်ပြောသည်။

ရေနံချက်စက်ရုံအတွက် ဒူဘိုင်းအခြေစိုက် Coral Energy မှ နှစ်လအကြွေးစနစ်ဖြင့် ဝယ်ယူသော ရုရှားရေနံစိမ်းတန်ချိန် ၉၀,၀၀၀ ကို ယခုလအစောပိုင်းတွင် စတင်လည်ပတ်ခဲ့သည်။နိုင်ငံတွင်းကျန်ရှိနေသော အနည်းငယ်သော‌လောင်စာကို အများပြည်သူပို့ဆောင်ရေးနှင့်ဓာတ်အားထုတ်လုပ်ခြင်းများအတွက်ဦးစားပေးမျှဝေပေးသွားမည်ဖြစ်သဖြင့် ယာဉ်မောင်းများကိုလာရောက် စောင့်ဆိုင်းတန်းစီခြင်းမပြုရန်လည်း ၎င်းကပြောကြားခဲ့သည်။

စွမ်းအင်အကျပ်အတည်းကြောင့် ပြီးခဲ့တဲ့အပတ်မှစကာ ကျောင်းများနှင့်အခြားအရေးမကြီးသည့် လုပ်ငန်းဌာနများကို အစိုးရကရပ်နားထားခဲ့သည်။ထိုအခြေနေများကြောင့်ပင် နိုင်ငံတစ်ဝှမ်းရှိ ဆေးရုံများတွင်လည်း ဆေးဘက်ဆိုင်ရာဝန်ထမ်းများ လုပ်ငန်းခွင်တက်ရောက်မှုသိသိသာသာကျဆင်းသွားခဲ့သည်။

ဝန်ကြီးချုပ် Ranil Wickremesinghe က လူဦးရေ ၂၂ သန်းရှိသော တောင်အာရှနိုင်ငံတွင်ခက်ခဲမှုများကို လအနည်းငယ်ကြာ ဆက်လက်ကြုံတွေ့ရဦးမည်ဟု ဗုဒ္ဓဟူး‌နေ့၌ပါလီမန်တွင် သတိပေးခဲ့ပြီး ပြည်သူများကိုလည်း လောင်စာဆီချွေချွေတာတာသုံးရန်တိုက်တွန်းခဲ့သည်။

“ကျွန်‌တော်တို့နိုင်ငံရဲ့စီးပွားရေးက လုံးဝပြိုလဲသွားပါပြီ၊ လောင်စာဆီ၊ ဓာတ်ငွေ့၊ လျှပ်စစ်နဲ့စားနပ်ရိက္ခာ ပြတ်တောက်မှု‌ တွေကြုံတွေ့ရပြီးနောက်ပိုင်းပိုဆိုးရွားတဲ့ အခြေအနေနဲ့ရင်ဆိုင်နေရပါတယ်” ဟု Wickremesinghe ကပြောကြားခဲ့သည်။

သီရိလင်္ကာသည် အမေရိကန်ဒေါ်လာ ၅၁ ဘီလီယံရှိသည့် နိုင်ငံခြား‌ချေးငွေကိုပြန်ဆပ်ရန်ပျက်ကွက်ခဲ့ကြောင်း ဧပြီလတွင်အစိုးရကကြေညာခဲ့ပြီး အရေးပေါ်အကူညီရရှိရန်အတွက်နိုင်ငံတကာငွေကြေးရန်ပုံငွေအဖွဲ့နှင့် ညှိနှိုင်းလျက်ရှိသည်။

Source – AFP/nh